އަޅުގަނޑަކީ ޒަޔަނިޒަމަށް ތާއީދުކުރާ މީހެއް ނޫން: ނަޝީދު
22 ނޮވެމްބަރު 2026 | އާދީއްތަ 06:17ޒުވާން ދުވަސްވަރުން ފެށިގެން ފަލަސްތީނުގެ ހައްގުގައި މަސައްކަތް ކުރައްވާފައިވާނެ ކަމަށާއި، އެމަނިކުފާނާ ދެކޮޅަށް ދައްކަނީ ސިޔާސީ މަގުސަދެއްގައި ފަތުރާ ހަގީގަތާ ޚިލާފު ވާހަކަތަކެއް ކަމަށް ކުރީގެ ރައީސް ނަޝީދު ވިދާޅުވި. އެމަނިކުފާނަކީ ޒަޔަނިޒަމަށް ތާއީދުކުރާނެ މީހެއް ނޫންކަން ދަންނަ މީހުންނަށް އެނގޭނެ ކަމަށާއި، މިފަދަ ވާހަކަތަކަކީ ރައްޔިތުންގެ މެދުގައި ބިރުވެރިކަން އުފެއްދުމަށް ދައްކާ ވާހަކަތަކެއް ކަމަށްވެސް ނަޝީދު ފާހަގަކުރެއްވި.


ކުރީގެ ރައީސް އަދި އެމްޑީޕީގެ ޗެއަރޕާސަން މުހައްމަދު ނަޝީދު "ބޮޑު ބަދަލު" ޖަލްސާގައި ވާހަކަދައްކަވަނީ | އެމްޑީޕީ
އެމަނިކުފާނަކީ ޒަޔަނިޒަމަށް ނުވަތަ ޔަހޫދީންނަށް ތާއީދުކުރައްވާ ބޭފުޅެއް ނޫން ކަމަށާއި، ޒުވާން ދުވަސްވަރުން ފެށިގެން ވެސް ފަލަސްތީނުގެ ހައްގުގައި މަސައްކަތް ކުރައްވާފައިވާނެ ކަމަށް ކުރީގެ ރައީސް އަދި އެމްޑީޕީގެ ޗެއަރޕާސަން މުހައްމަދު ނަޝީދު ވިދާޅުވެއްޖެ އެވެ.
ހޮނިހިރު ދުވަހު ބޭއްވި ނޫސްވެރިންގެ ބައްދަލުވުމެއްގައި ނަޝީދު ވިދާޅުވީ، އެމަނިކުފާނާ ނުރުހޭ މީހުން އެކި ދުވަސްވަރު އެކި ސިފަޔަށް ވާހަކަ ދައްކަމުންދާ ކަމަށެވެ.
އެގޮތުން އިބިލީހާއި ޝައިތާނާ ފަދަ ނަންނަމުން ސިފަކޮށް ވާހަކަ ފަތުރަމުންދާ ކަމަށް ވިދާޅުވި އެވެ.
ދެން އެކިއިރު އަޅުގަނޑާ ނުރުހޭ ބައިވަރު މީހުން އުޅޭ. ދެން އެ މީހުން އަޅުގަނޑަކީ އިބިލީސް ކަމަށް ސިފަކުރުމަށް، ސައިތާނާ ކަމަށް ސިފަކުރުމަށް، އެކިއެކި ބާވަތުގައި އެކިއެކި ވާހަކަ ދައްކާ. އަޅުގަނޑަކީ ޔަހޫދީންނާ ގުޅޭ މީހެއް ނޫން. އަޅުގަނޑުގެ ޒުވާން، ވަރަށް ޒުވާން އިރުއްސުރެ ފަށައިގެން ޔުނިވަރސިޓީ އިރުއްސުރެ ފަށައިގެން އަޅުގަނޑާ އެއްވަރަށް އަޅުގަނޑަކަށް ހިއެއްނުވޭ ރާއްޖޭގައި ވަކި ފަރުދަކު އުޅޭނެހެން ފަލަސްތީނާ އެއްކޮޅަށް މުޒާހަރާކޮށްފައި ހުރީ.މުހައްމަދު ނަޝީދު
ނަޝީދު ވިދާޅުވީ ޔުނިވަރސިޓީގައި ކިޔަވަން އުޅުއްވި ދުވަސްވަރު ވެސް ހަފުތާއެއް ދޫނުކުރައްވައި ފަލަސްތީނުގެ ހައްގުގައި މުޒާހަރާތަކުގައި ބައިވެރިވެވަޑައިގެންނެވި ކަމަށާއި، އެކަމާ ގުޅޭ ލިޔުންތަކާއި އެކި ތަންތަނުގައި ދައްކަވާފައި ހުރި ވާހަކަތައް އަދިވެސް ފެންނަން ހުންނާނެ ކަމަށެވެ. އަދި އެމަނިކުފާނާ ގުޅުވައިގެން ކޮންމެ ފަދަ ވާހަކައެއް ދެއްކި ނަމަވެސް، މިއަދުގެ ރައްޔިތުން އެ ވާހަކަތައް ބަލައިނުގަންނާނެ ކަމަށް ވިދާޅުވި އެވެ.
އެމްޑީޕީގެ އެތެރޭގައި އިންތިޚާބެއް އޮތަތީ، އޭގެ ސަބަބުން އަޅުގަނޑު ތާއީދުކުރާ ފަރާތްތަކަށް ނުވަތަ އަޅުގަނޑު ރުހޭ ފަރާތްތަކަށް ދެރަ ދިނުމަށްޓަކައި އަޅުގަނޑަކީ އެވެނި ބާވަތުގެ މީހެކޭ، މިވެނި ބާވަތެއްގެ މީހެކޭ އެހެން ކިޔަމުން ހިންގުން. ދެން އެ ބާވަތުގެ ވާހަކަ ދައްކަވާ ގިނަ ބޭފުޅުންނަކީ ހަގީގަތުގައި ވަރަށް ރަނގަޅަށް އަޅުގަނޑު ދަންނަ މީހުން. އެ މީހުންނަށް އެނގޭނެ އަޅުގަނޑަކީ ޒައިނިޒަމަށް ތާއީދުކުރާނެ މީހެއް ނޫންކަންމުހައްމަދު ނަޝީދު
މީގެ އިތުރުން ނަޝީދު ވިދާޅުވީ، މިއީ ރަންނަމާރީގެ ވާހަކަ ފަދައިން ހަގީގަތެއް ނެތް، ބިރުވެރިކަން އުފެއްދުމަށްޓަކައި ދައްކާ ވާހަކަތަކެއް ކަމަށެވެ. އަދި އިސްލާމުންނަށް ދެރަދޭން ކަނޑައެޅިގެން ވިސްނައިގެން އުޅޭ އެއްވެސް ޒަޔަނިސްޓް ދިވެއްސަކު ދެކެވަޑައިގެންފައި ނުވާ ކަމަށް ވެސް ވިދާޅުވި އެވެ.











