"ދިރާގު މޯލްޑިވްސް ރޯޑް ރޭސް 2026" ގައި ކުރީގެ ނައިބު ރައީސް ފައިސަލް ބައިވެރިވަޑައިގެންފި
20 ނޮވެމްބަރު 2026 | ހުކުރު 15:42ހުޅުމާލޭގައި ހުކުރު ދުވަހު ހަވީރު ބޭއްވި 17 ވަނަ ދިރާގު މޯލްޑިވްސް ރޯޑް ރޭހުގެ 5 ކިލޯމީޓަރުގެ ދުވުމުގައި ކުރީގެ ނައިބު ރައީސް ފައިސަލް ނަސީމް ބައިވެރިވެވަޑައިގެންފި. ދުޅަހެޔޮ ސިއްހަތަކަށް ބާރުއެޅުމުގެ ގޮތުން ބޭއްވި މި ދުވުމުގައި 5،500 އަށް ވުރެ ގިނަ މީހުން ބައިވެރިވިއިރު، މީގެ ކުރިން ވެސް އިޖުތިމާއީ އެކި ހަރަކާތްތަކާއި ދުވުންތަކުގައި އެމަނިކުފާނު އަމަލީގޮތުން ބައިވެރިވެވަޑައިގެންފައިވޭ


"ދިރާގު މޯލްޑިވްސް ރޯޑް ރޭސް 2026" ގައި ކުރީގެ ނައިބު ރައީސް ފައިސަލް އަދި މާލޭގެ މޭޔަރު އާދަމް އާޒިމް ބައިވެރިވެޑައިގަތުން | ފައިސަލް - އާޒިމް ކެމްޕެއިން ޓީމް
ރާއްޖޭގައި ބާއްވާ އެންމެ ބޮޑު ދުވުމުގެ ހަރަކާތް ކަމަށްވާ، "ދިރާގު މޯލްޑިވްސް ރޯޑް ރޭސް 2026" ދުވުމުގައި، އެމްޑީޕީގެ ރިއާސީ ޕްރައިމަރީގެ ކެންޑިޑޭޓް، ކުރީގެ ރައީސް ފައިސަލް ނަސީމް ހުކުރު ދުވަހު ހަވީރު ބައިވެރިވަޑައިގެންފި އެވެ.
ތިން ދުރުމިނަކަށް ދުވާ ގޮތަށް އިންތިޒާމުކޮށްފައިވާ މިއަހަރުގެ ދިރާގު ރޯޑް ރޭސްގައި، ފައިސަލް ބައިވެރިވެވަޑައިގަތީ ހުކުރު ދުވަހު ހަވީރު އޮތް ފަސް ކިލޯމީޓަރުގެ ދުވުމުގަ އެވެ. މިއަހަރު މި ބޭއްވީ ދިރާގު ރޯޑް ރޭހުގެ 17 ވަނަ ދުވުމެވެ. މި ދުވުމުގައި 5،500 އަށް ވުރެ ގިނަ ބައިވެރިން ދުވެފައިވެ އެވެ.
ހުޅުމާލޭ ސެންޓްރަލް ޕާކުގެ މެދުތެރެއިން ފެށި މި ދުވުމަކީ ވޯލްޑް އެތުލެޓިކްސް ރޭންކިންގ ކޮމްޕެޓިޝަނެއްގެ ގޮތުގައި ބަލައިގެންފައިވާ، އޭއައިއެމްއެސް ސެޓިފައިޑް ރޫޓެއްގައި ބޭއްވި ދުވުމެކެވެ.
ދުޅަހެޔޮ ސިއްހަތަކަށް އާންމުން ހޭލުންތެރިކުރުވުމަށާއި އިޖުތިމާއީ އެކި ކަންކަމަށް އެހީތެރިވުމުގެ ގޮތުން މާލެއާއި އަތޮޅުތަކުގައި އިންތިޒާމުކުރާ އެކި ހިނގާލުންތަކާއި ކުރު ދުވުންތަކުގައި، މީގެ ކުރިން ވެސް ފައިސަލް ބައިވެރިވެވަޑައިގެންފައިވެ އެވެ.
އެ ގޮތުން ރާއްޖޭގެ މުވާސަލާތީ މައި ދެ ކުންފުނި ކަމަށްވާ ދިރާގުން އިންތިޒާމުކުރާ، ދިރާގު މޯލްޑިވްސް ރޯޑް ރޭސް އާއި އުރީދޫ މޯލްޑިވްސް އިން އިންތިޒާމުކުރާ، ފަން ރަން ކުރިން ކަލަރ ރަންގެ ނަމުގައި ގައި ވެސް އެމަނިކުފާނު ބައިވެރިވެވަޑައިގެންފައިވެ އެވެ.
އޭގެ އިތުރުން މޯލްޑިވްސް ސްޕޯޓްސް ކޯޕަރޭޝަނުން އިންތިޒާމު ކޮށްގެން ޖެނުއަރީ 2023 ގައި ބޭއްވި ސްޓެލްކޯ 5ކޭ ޓީމް ރަންގައި ވެސް ބައިވެރިވެވަޑައިގަތެވެ. އަދި މޯލްޑިވްސް މެރިއޮޓް ބިޒިނަސް ކައުންސިލުން އިންތިޒާމުކޮށް، "ރޯޑް ޓު ގިވް"ގެ ނަމުގައި، އޮކްޓޫބަރު 7، 2023 ގައި ހުޅުމާލޭގައި ބޭއްވި ޗެރިޓީ ދުވުމުގައި ވެސް ފައިސަލް ބައިވެރިވެޑައިގަތެވެ.











