ޤާނޫނުއަސާސީއާ ޚިލާފަށް މެންބަރުން އޮބަހައްޓައިގެން އަބަދު ވެރިކަން ކުރެވޭނެކަމަށް ރައީސް މުއިއްޒުއަށް ހީފުޅުވާނަމަ އެއީ ގޯހެއް: ފައްޔާޒު
21 ނޮވެމްބަރު 2026 | ހޮނިހިރު 17:05ސަރުކާރުން މަޖިލީހަށް ހުށަހަޅާފައިވާ ބިލުތަކަކީ ގައުމަށް އޮތް ނުރައްކަލެއް ކަމަށް ފާހަގަކުރައްވައި، ރަސްމާލެ މަޝްރޫއުގެ ދަށުން ބިންތައް ދޫކުރަނީ ގާނޫނުއަސާސީއާ ހިލާފަށް ކަމަށް ފައްޔާޒް ވިދާޅުވެއްޖެ. މީގެ އިތުރުން ރާއްޖޭގެ އަގު ބޭރުގެ އިންވެސްޓަރުންގެ ކުރިމަތީގައި ވެއްޓެމުންދާ ކަމަށާއި، ވެރިކަން ކުރާ އުސޫލުތައް އިސްލާހުކުރަން ޖެހޭ ކަމަށް ވެސް އޭނާ ވިދާޅުވި

ކުރީގެ އިކޮނޮމިކް މިނިސްޓަރ ފައްޔާޒް އިސްމާއިލް | ރާއްޖެ ޓީވީ
ރައީސް ޑރ. މުހައްމަދު މުއިއްޒު އަށް ގާނޫނުއަސާސީއާ ޚިލާފަށް މެންބަރުން އޮބަހައްޓައިގެން އަބަދު ވެރިކަން ކުރެވޭނެ ކަމަށް ހީފުޅުކުރައްވާނަމަ އެއީ ގޯހެއް ކަމަށް ކުރީގެ އިކޮނޮމިކް މިނިސްޓަރު ފައްޔާޒް އިސްމާއީލް ވިދާޅުވެއްޖެ އެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަ ދައްކަވަމުން ފައްޔާޒު ވިދާޅުވީ، އަބަދު ރައްޔިތުން ވެސް މަޑަކުން ނުތިބޭނެ ކަމަށާއި ރައީސް މުއިއްޒު ކަންކުރައްވާ ގޮތުން ބޭރުގެ އިންވެސްޓަރުންގެ ކުރިމަތީގައި ވެސް ރާއްޖޭގެ އަގު ދާނީ ވެއްޓެމުން ކަމަށެވެ.
ފައްޔާޒު ވިދާޅުވީ މުސްތަގުބަލުގައި ރައީސްގެ މަގާމުގައި ހުންނަ ބޭފުޅަކަށް ބޭނުންހާ ގޮތަކަށް ވެރިކަން ނުކުރެވޭނެ ގޮތަށް ގާނޫނުތަކަށް ބަދަލު ގެންނަންޖެހޭ ކަމަށެވެ. ބޮޑު ބަދަލުގެ ނަމުގައި އެމްޑީޕީން ގެންނަން މަސައްކަތްކުރާ ބަދަލުތަކުގެ މަގްސަދަކީ ވެސް އެއީ ކަމަށް އޭނާ ވިދާޅުވި އެވެ.
މި ސަރުކާރުން މަޝްރޫއުތައް ހަވާލުކުރާ ގޮތާ ބެހޭ ގޮތުން ވާހަކަ ދައްކަވަމުން ފައްޔާޒު ވިދާޅުވީ، އެމްޑީޕީގެ ވެރިކަމުގައި މަޝްރޫއުތައް ހަވާލުކޮށްފައި އޮތީ މިއަދުގެ ވެރިކަމުގައި ރަސްމާލެ ދޫކުރުމުގެ ކަންކަން އެ ކުރިއަށްދާ ގޮތަކަށް ނޫން ކަމަށެވެ. މިސާލަކަށް ނޫނު އަތޮޅު އޭރު ދީފައި އޮތީ ޓޫރިޒަމްގެ ގާނޫނުގެ ދަށުން ރިސޯޓު ހެދުމަށް ކަމަށް އޭނާ ވިދާޅުވި އެވެ.
ނަމަވެސް ރަސްމާލެ މަޝްރޫއަކީ ރިއަލް އެސްޓޭޓް މަޝްރޫއެއް ކަމަށާއި، އެއީވެސް ދާއިމަށް ދެވޭ ގޮތަށް އަބަދު 99 އަހަރު އައުވެގެންދާ ގޮތަށް ކަމަށް ފައްޔާޒް ވިދާޅުވި އެވެ.
ސަރުކާރުން މަޖިލީހަށް ހުށަހަޅާފައިވާ ބިލުތަކަކީ ރާއްޖެ އާއި ދިވެހިންނަށް ބޮޑު ނުރައްކަލެއް ކަމަށް ވެސް ފައްޔާޒު ވަނީ ވިދާޅުވެފަ އެވެ. އެގޮތުން ފައްޔާޒް ވިދާޅުވީ ގާނޫނުއަސާސީއާ ހިލާފަށް 99 އަހަރަށް ދިވެހި ބިން ދޫކޮށްލުމަށް ހީލަތްތެރި މާއްދާތަކެއް ރިއަލް އެސްޓޭޓު ބިލުގައި ހިމަނާފައިވާ ކަމަށާއި، ރަސްމާލެއާ ގުޅޭ ރެފަރެންޑަމަކަށް ގޮސްފިނަމަ ބޮޑުތަނުން ބަލިވާނެކަން ރައީސް މުއިއްޒުއަށް އެނގިވަޑައިގަންނަވާ ކަމަށެވެ.











