ސުވާލު އަމާޒުވި ވަގުތު ހަނު ހުންނެވުމަށްފަހު ފަހުން ބަޔާނެއް ނެރުއްވައި މިނިސްޓަރު އަބްދުﷲ ވިދާޅުވީ ދަބަހުގައި ހުރީ ފުޓުބޯޅަ ކުޅޭ ސާމާނުކަމަށް!
16 ނޮވެމްބަރު 2026 | ހޯމަ 08:32ހައުސިންގ މިނިސްޓަރު ޑރ. މުއްތަލިބު ބޮޑު ދަބަހެއް ހިއްޕަވައިގެން މަޖިލީހަށް ވަޑައިގަތީ ރިއަލް އެސްޓޭޓް ބިލާ ގުޅޭގޮތުން މެންބަރުންނާ ބައްދަލުކުރެއްވުމަށް ކަމަށް ވިދާޅުވެއްޖެ. އެއީ ފުޓުބޯޅަ ކުޅުއްވަން ގެންގުޅުއްވި ސާމާނު ހުރި ދަބަހެއް ކަމަށާއި، މަޖިލީހަށް ވެންނެވީ ސެކިއުރިޓީ ޗެކްތައް ފުރިހަމަކުރެއްވުމަށްފަހު ކަމަށް މިނިސްޓަރު ވިދާޅުވި

މިނިސްޓަރު ޑރ. އަބްދުﷲ މުއްތަލިބް އާދިއްތަ ދުވަހުގެ ރޭ ކަޅު ދަބަހެއް ހިއްޕަވައިގެން މަޖިލީހުގެ އިދާރާއަށް ވަނީ ވަޑައިގަންނަވާފައި | ރާއްޖެ ޓީވީ
ހައުސިންގ މިނިސްޓަރު ޑރ. އަބްދުﷲ މުއްތަލިބު ބޮޑު ކަޅު ދަބަހެއް ހިއްޕަވައިގެން ރައްޔިތުންގެ މަޖިލީހަށް ވަޑައިގަތުމާ ގުޅިގެން އަމާޒުވި ފާޑުކިޔުންތަކާއި ތުހުމަތުތަކަށް މިނިސްޓަރު ރައްދު ދެއްވައިފި އެވެ.
މިނިސްޓަރު ނެރުއްވި ބަޔާނެއްގައި ވިދާޅުވީ އާދިއްތަ ދުވަހުގެ ރޭ ރައްޔިތުންގެ މަޖިލީހުގެ އިދާރާއަށް އެޓަރނީ ޖެނެރަލާއެކު ވަޑައިގަތީ މަޖިލިސް މެންބަރުންތަކެއްގެ އެދުމަކަށް ރިއަލް އެސްޓޭޓް ވިޔާފާރީގެ ބިލު ގުޅޭގޮތުން އެމެންބަރުން ސާފުކުރަން ބޭނުންވާ ބައެއް ކަންކަން ސާފުކޮށްދެއްވުމަށް ކަމަށެވެ.
މިނިސްޓަރު ވިދާޅުވީ އެ ބައްދަލުވުން ހަމަޖައްސާފައި އޮތް ގަޑިއާއި އާރަށުން ފުޓުބޯޅަ ކުޅެގެން އެނބުރި ވަޑައިގެންނެވި ގަޑިއާ ދިމާވާތީ ލޯންޗުން ފޭބި ގޮތަށް މަޖިލީހުގެ އިދާރާއަށް ވަޑައިގެންނެވީ ކުޅެން ގެންގުޅުއްވި ސާމާނު އަޅާފައިވާ ދަބަސް ހިއްޕަވައިގެން ކަމަށެވެ.
މިނިސްޓަރު ފާހަގަކުރެއްވި ގޮތުގައި މަޖިލިސް އިދާރާއަށް އެ ދަބަސް ވެއްދެވީ ސެކިއުރިޓީ ޗެކްކުރުމަށްޓަކައި ސްކޭނަރ އިން ސްކޭން ވެސް ކޮށްގެންނެވެ. އަދި ބައްދަލުވުމަށްފަހު މަޖިލިސް އިދާރާއިން ނުކުމެވަޑައިގަތީ އެދަބަސް ކޮނޑުގައި އަޅުވައިގެން ކަމަށް ވެސް މިނިސްޓަރު ވިދާޅުވި އެވެ.
ރައްޔިތުންގެ މަޖިލީހުގެ އިދާރާއަކީ ދިވެހި ސިފައިން ސަލާމަތީ ކަންކަން ބަލަހައްޓާ، ސެކިއުރިޓީ ކެމެރާއާއި ދަބަސް ސްކޭނަރ އަދި ބޮޑީ ސްކޭނަރ ބެހެއްޓިފައިވާ ތަނެއް ކަމަށް މިނިސްޓަރު ފާހަގަކުރެއްވި އެވެ. އަދި ދައުލަތުގެ ވަޒީރުންނަށް ވެސް އެތަނަށް ވަދެވޭނީ އައިޑީ ކާޑުގެ ކޮޕީ ފޮނުވައިގެން ކުރިން ހުއްދަ ހޯދައިގެން ކަމަށް މިނިސްޓަރު ވިދާޅުވި އެވެ.
މިނިސްޓަރު ވިދާޅުވީ ރައްޔިތުންގެ މަޖިލީހުގެ އިދާރާގައި އޮތް ބައްދަލުވުމަށް ދިޔައީ އެ ވިދާޅުވި ގޮތަށް ސެކިއުރިޓީ ކަންކަން ފުރިހަމަކޮށްގެން ކަމަށެވެ.
ހައުސިންގ މިނިސްޓަރު ޑރ. އަބްދުﷲ މުއްތަލިބު ބޮޑު ކަޅު ދަބަހެއް ހިއްޕަވައިގެން ރައްޔިތުންގެ މަޖިލީހަށް ވަޑައިގަތުމާ ގުޅިގެން ގިނަ ބައެއްގެ ފާޑުކިޔުމާއި ތުހުމަތުތައް އަމާޒުވެފައިވެ އެވެ. މިކަމާ ގުޅޭގޮތުން ނޫސްވެރިން އެވަގުތު ސުވާލުކުރުމުން މިނިސްޓަރު ޖަވާބެއް ނުދެއްވި ނަމަވެސް، އެއީ ކުޅިވަރު ކުޅެން ގެންގުޅުއްވި ސާމާނު އަޅުއްވައިގެން ގެންގުޅުއްވި ދަބަހެއް ކަމަށް ފަހުން މިވަނީ ވިދާޅުވެފަ އެވެ.
މިނިސްޓަރުގެ މި ބަޔާން ނެރުއްވީ މި މައްސަލައިގައި އާންމުންގެ ފާޑުކިޔުން އިތުރުވަމުން ދިޔަ ދަނޑިވަޅެއްގަ އެވެ.











