ފްރާންސްގައި ދިރިއުޅުމުގެ ޚަރަދުތައް ބޮޑުވަމުންދާތީ ޖެހިޖެހިގެން ހަވަނަ ހޮނިހިރު ދުވަހު މުޒާހަރާކޮށްފި
21 ނޮވެމްބަރު 2026 | ހޮނިހިރު 14:00ފްރާންސްގައި މުސާރަ ބޮޑުކުރުމަށާއި ދިރިއުޅުމުގެ ޚަރަދުތައް ކުޑަކުރުމަށް ގޮވާލައި ކުރިއަށްދާ މުޒާހަރާތަކާ ގުޅިގެން ސަލާމަތީ ފިޔަވަޅުތައް ވަނީ ވަރުގަދަކޮށްފައި. މުސާރައިގެ މަޝްވަރާތައް ލަސްވާތީ ޔޫނިއަންތަކުން ޑިސެމްބަރު އެކެއްގައި ބޮޑު ހަޅުތާލަކަށް ތައްޔާރުވަމުންދާއިރު، މުސާރަ ބޮޑުކުރުމުގެ ވިސްނުމެއް ނެތް ކަމަށް އެ ގައުމުގެ ސަރުކާރުން ވަނީ ބުނެފައި


ފްރާންސްގެ އެކި ކަންކޮޅުތަކުގައި މުޒާހަރާތައް ކުރިއަށްދާއިރު، މުސާރަ ބޮޑުކުރުމަށާއި، އަގުހެޔޮ ބޯހިޔާވަހިކަން ފޯރުކޮށްދިނުމުގެ އިތުރުން، ޓެކްސްގެ ނިޒާމު އިންސާފުވެރި ކުރުމަށް ގޮވާލައި ވެރިރަށް ޕެރިހުގެ މެދުތެރެއަށް ގާތްގަނޑަކަށް 400 އެއްހާ މުޒާހަރާގެ ބައިވެރިން އެއްވެއްޖެ | އަނަޑޯލޫ
ފްރާންސްގައި ދިރިއުޅުމުގެ ޚަރަދުތައް ބޮޑުވަމުންދާތީ، އެކަމާ ދެކޮޅަށް ޓްރޭޑް ޔޫނިއަންތަކާއި "ޔެލޯ ވެސްޓްސް" އަދި ޒުވާނުންގެ ޖަމާއަތްތަކުން ޖެހިޖެހިގެން ހަވަނަ ހޮނިހިރު ދުވަހު މުޒާހަރާކޮށްފި އެވެ.
މި މުޒާހަރާތަކުގެ ބައިވެރިން ދަނީ މުސާރަ ބޮޑުކުރުމަށާއި އަގުހެޔޮ ބޯހިޔާވަހިކަން ފޯރުކޮށްދިނުމުގެ އިތުރުން، އިންސާފުވެރި ޓެކްސްގެ ނިޒާމެއް ގާއިމުކުރުމަށް ގޮވާލަމުންނެވެ.
ފްރާންސްގެ ނޫހެއް ކަމަށްވާ "ލެ ޕެރިސިއަން" އިން ރިޕޯޓްކޮށްފައިވާ ގޮތުގައި، ވެރިރަށް ޕެރިހުގެ މެދުތެރޭގައި އޮންނަ "ޕްލޭސް ޑި ލަ ރިޕަބްލިކް" ސަރަހައްދަށް ގާތްގަނޑަކަށް 400 އެއްހާ މީހުން ވަނީ އެއްވެފަ އެވެ. މި މީހުން އެއްވީ އެ ސަރަހައްދުން ފެށިގެން "ޕްލޭސް ޑި ލަ ނޭޝަން" އާ ހަމައަށް ހިނގާލުމެއް ބޭއްވުމަށެވެ.
މަސައްކަތްތެރިންގެ ޖަމާއަތްތަކާއި ޒުވާނުންގެ ގްރޫޕްތަކުން މި ހިނގާލުމުގައި ބައިވެރިވީ "ރައިޓް ޓު ހައުސިންގް" އެސޯސިއޭޝަނާ ގުޅިގެން ކަމަށް ނޫސްތަކުން ރިޕޯޓްކުރެ އެވެ.
ތެލުގެ އަގު ބޮޑުވުމާ ގުޅިގެން މީގެ އަށް އަހަރު ކުރިން އުފެދުނު "ޔެލޯ ވެސްޓްސް" ހަރަކާތުން ވަނީ، މަގުތަކުގެ ބޮޑެތި ކަންމަތިތަކާއި ޓޯލް ބޫތުތަކަށް އެނބުރި އައުމަށް އެ ހަރަކާތުގެ ސަޕޯޓަރުންނަށް ގޮވާލާފަ އެވެ. މީގެ އިތުރުން، ފްރާންސްގެ ދެކުނުގެ ސިޓީއެއް ކަމަށްވާ މާސޭގައި ވެސް މުޒާހަރާ ބޭއްވުމަށް ޓްރޭޑް ޔޫނިއަންތަކުން ވަނީ ގޮވާލާފަ އެވެ.
ކަމާބެހޭ އިދާރާތަކުން ސަލާމަތީ ފިޔަވަޅުތައް ވަރުގަދަކުރުން މި މުޒާހަރާތަކާ ގުޅިގެން ޕެރިހުގެ ފުލުހުން ވަނީ ރޭލު ސްޓޭޝަންތަކާއި އާންމު ދަތުރުފަތުރުގެ ނިޒާމުތަކުގައި ކުރިއަށްގެންދާ ޗެކްކުރުންތައް އިތުރުކޮށްފަ އެވެ.
ނަމަވެސް ލިޔޯން ސިޓީގައި، ހުއްދަ ނެތް އެއްވުންތަކެއް ބޭއްވުމަށް ގޮވާލަމުންދާތީ، އެ ސިޓީގެ މެދުތެރޭގައި މެންދުރު 12:00 އިން ފެށިގެން ރޭގަނޑު 10:00 އާ ހަމައަށް މުޒާހަރާކުރުން ކަމާބެހޭ ފަރާތްތަކުން ވަނީ މަނާކޮށްފަ އެވެ.
އެ ޤައުމުގެ އިންޓީރިއާ މިނިސްޓަރު ލޯރެންޓް ނޫނޭޒް ވިދާޅުވި ގޮތުގައި، މުޅި ގައުމުގައި ސަލާމަތީ ކަންކަން ބެލެހެއްޓުމަށް ގާތްގަނޑަކަށް 70,000 ފުލުހުންނާއި މިލިޓަރީ ފުލުހުން ހަރަކާތްތެރިވާނެ އެވެ.
މުޒާހަރާތަކުގައި ބައިވެރިވާ މީހުންގެ އަދަދު އޮކްޓޯބަރު މަހުގެ 17 ވަނަ ދުވަހުން ފެށިގެން ވަނީ މަދުވާން ފަށާފަ އެވެ. އެ ދުވަހު މުޅި ފްރާންސްގެ 565,000 މީހުން މުޒާހަރާކުރި ކަމަށް ފުލުހުން ބުނާއިރު، އިންތިޒާމުކުރި ފަރާތްތަކުން ބުނަނީ އެ އަދަދު 800,000 އަށް އަރާނެ ކަމަށެވެ.
ވޭތުވެދިޔަ ދެ ހޮނިހިރު ދުވަހު މުޒާހަރާތަކުގައި ބައިވެރިވީ 100,000 އަށްވުރެ ކުޑަކޮށް ގިނަ މީހުން ކަމަށް ކަމާބެހޭ އިދާރާތަކުން ބުނާއިރު، އިންތިޒާމުކުރި ފަރާތްތަކުގެ އަންދާޒާއަކީ އެއަށްވުރެ ދެގުނަ ގިނަ މީހުން ބައިވެރިވި ކަމަށެވެ.
ޑިސެމްބަރު 1 ގައި ހަޅުތާލު ކުރުމަށް ޔޫނިއަންތަކުން ގޮވާލުން ސީއެފްޑީޓީ، ސީޖީޓީ އަދި އުންސާ ޔޫނިއަންތަކުން ވަނީ، ޑިސެމްބަރު 1 ވަނަ ދުވަހު ސަރުކާރުގެ މުވައްޒަފުން ކުރަން ރާވާފައިވާ ހަޅުތާލުގައި އަމިއްލަ ސެކްޓަރުގެ މުވައްޒަފުން ވެސް ބައިވެރިވުމަށް ގޮވާލާފަ އެވެ. އެ ޔޫނިއަންތަކުން ތުހުމަތުކުރާ ގޮތުގައި ވަޒީފާދޭ ފަރާތްތަކުން ދަނީ މުސާރައިގެ މަޝްވަރާތައް ލަސްކުރަމުންނެވެ.
އެ ޤައުމުގެ ސަރުކާރުގެ މުވައްޒަފުންގެ ޔޫނިއަންތަކުން އެދެމުންދަނީ މުސާރަ ހިސާބުކުރުމަށް ބޭނުންކުރާ އަސާސީ ރޭޓް ބޮޑުކޮށްދިނުމަށެވެ.
އެހެންނަމަވެސް، 2027 ވަނަ އަހަރުގެ ނިޔަލަށް އެ ރޭޓް ބޮޑުކުރުމުގެ އެއްވެސް ވިސްނުމެއް ނެތް ކަމަށް ފްރާންސް ސަރުކާރުން ވަނީ ނިންމާފަ އެވެ.
މަސްދަރު: އަނަޑޯލޫ











