ޖެޓްސްކީގެ ފޮޓޯތަކާއެކު ފްރާންސްގެ ރައީސް މެކްރޮން ހޫނު ފެނަށް، ސިޔާސީ ލީޑަރުންގެ ފާޑު ކިޔުން!
16 އޯގަސްޓު 2026 | އާދީއްތަ 07:33މެޗް މެގަޒީންގެ ކަވަރުގައި ބުނެފައިވަނީ، މިއީ އަންނަ އަހަރު ދެވަނަ އަދި ފަހު ދައުރު ނިމި ރިޔާސީ ގަނޑުވަރުން މެކްރޮން ނުކުންނެވުމުގެ ކުރިން، މިގޮތަށް ޗުއްޓީއެއް ހޭދަކުރައްވާނެ ފަހު ފަހަރު ކަމަށް. މި ހޫނު މޫސުމުގައި ފްރާންސްގައި ހޫނު ގަދަވެ މަރުތަކެއް ހިނގި ދަނޑިވަޅެއްގައި މެކްރޮން ފޮއިލް ސަރފިން ފަދަ ފެން ކުޅިވަރުތައް ކުޅުއްވަމުން ގެންދެވި ފޮޓޯތައް ވެސް މެގަޒީންގައި ޝާއިއު ކޮށްފައިވޭ
މެގަޒިންގެ ބޭރު ސަފްހާގައި ޖަހާފައިވާ މެކްރޮންގެ ފޮޓޯގަނޑު | ސޯޝަލް މީޑިއާ
ފްރާންސްގެ ރައީސް އިމަނުއެލް މެކްރޮން ބޭނުން ކުރައްވަމުން ގެންދެވި ޖެޓްސްކީގެ ފޮޓޯތައް ޕެރިސް މެޗް މެގަޒީންގައި ޝާއިއު ކުރުމާ ގުޅިގެން، އެތައް ބައެއްގެ ފާޑު ކިޔުން އަމާޒުވެއްޖެ އެވެ.
އުމުރުފުޅުން 48 އަހަރުގެ މެކްރޮން އޮގަސްޓު މަހުގެ ޗުއްޓީގައި ރިވިއޭރާގައި ޖެޓްސްކީ ބޭނުން ކުރައްވަމުން ގެންދެވި ފޮޓޯތައް އެ މެގަޒީންގެ ކަވަރުގައި ޝާއިއު ކޮށްފައިވެ އެވެ. ފްރާންސްގެ ރައީސް ބްރެގަންކޯން ގަލާގައި ޗުއްޓީ ހޭދަ ކުރައްވަނިކޮށް، ލައިފް ވެސްޓް އަޅުއްވައިގެން ކުޅިވަރު ކުޅުއްވުމުގެ ތެރޭގައި ފޮޓޯތައް ނަގައި އާންމުކޮށްފައިވެ އެވެ.
މެޗް މެގަޒީންގެ ކަވަރުގައި ބުނެފައިވަނީ، މިއީ އަންނަ އަހަރު ދެވަނަ އަދި ފަހު ދައުރު ނިމި ރިޔާސީ ގަނޑުވަރުން މެކްރޮން ނުކުންނެވުމުގެ ކުރިން، މިގޮތަށް ޗުއްޓީއެއް ހޭދަކުރައްވާނެ ފަހު ފަހަރު ކަމަށެވެ. މި ހޫނު މޫސުމުގައި ފްރާންސްގައި ހޫނު ގަދަވެ މަރުތަކެއް ހިނގި ދަނޑިވަޅެއްގައި މެކްރޮން ފޮއިލް ސަރފިން ފަދަ ފެން ކުޅިވަރުތައް ކުޅުއްވަމުން ގެންދެވި ފޮޓޯތައް ވެސް އެ މެގަޒީންގައި ޝާއިއު ކޮށްފައިވެ އެވެ.
އެކަމާ ގުޅޭ ގޮތުން މެކްރޮންގެ މުވައްޒަފުން ބުނެފައި ވަނީ، އެ ފޮޓޯތައް ނެގުމަށް ހުއްދަ ދީފައި ނުވާނެ ކަމަށެވެ. އަދި ނުވަ އަހަރު ވަންދެން ކޮންމެ އަހަރަކު ވެސް އެއްވެސް ހުއްދައެއް ނުވަތަ އިޒުނައެއް ނެތި ރައީސް މެކްރޮންގެ ފޮޓޯ ނަގައި އާންމުކުރަމުން ގެންދާ ކަމަށެވެ.
މެކްރޮންގެ މި ފޮޓޯތަކަށް ގިނަ ބައެއްގެ ފާޑު ކިޔުން ވަނީ އަމާޒުވެފައި އެވެ. ގްރީންސްގެ ލީޑަރު މެރީން ޓޮންޑެލިއާ ވިދާޅުވީ، ފްރާންސްގެ ރައްޔިތުން ގަދަ ހޫނުގެ ވޭން ތަހަންމަލު ކުރަމުން ގެންދާއިރު ވެސް، ރައީސް ގެންދަވަނީ ޗުއްޓީ ހޭދަ ކުރައްވައި، މަޖާ ކުރައްވަމުން ކަމަށެވެ.
ސޯޝަލިސްޓް ލީޑަރު އޮލިވިއާ ފޯރު ވިދާޅުވީ، މެކްރޮން އެ ދެއްވަނީ ގޯސް މެސެޖެއް ކަމަށެވެ. އޭނާ ވިދާޅުވީ ހޫނު ގަދަވެ ފްރާންސް އަނދަމުންދާއިރު، ޤައުމުގެ ގިނަ ރައްޔިތުންނަށް ޗުއްޓީ އަށް ދެވޭނެ ގޮތެއް ނެތް ނަމަވެސް، ރައީސް މެކްރޮން ގެންދަވަނީ ޗުއްޓީ ހޭދަ ކުރައްވައި، ޖެޓްސްކީ ދުއްވައި މަޖާ ކުރައްވަމުން ކަމަށެވެ.
ކޮމިއުނިސްޓް ސެނެޓަރު ޕިއަރ އުޒޫލިއާސް ވިދާޅުވީ، އެ ފޮޓޯތަކަކީ އެކަށީގެންވާ ފޮޓޯތަކެއް ނޫން ކަމަށެވެ. އޭނާ ވިދާޅުވީ، ފްރާންސްގައި މިހާރު އަނދަމުންދާ އަލިފާންގަނޑު ކޮންޓްރޯލްކުރުމަށް، މެކްރޮން ފަޔަރ ފައިޓަރުންނަށް އެހީތެރިވެވަޑައިގަންނަވަނިކޮށް ފެނުން މާ މުހިއްމު ކަމަށާއި، އެއީ މެކްރޮން ހުންނަވަން ޖެހޭ ތަން ކަމަށެވެ.
ޕެރިސް މެޗް މެގަޒީން އިން ބުނީ މެކްރޮންގެ ޗުއްޓީ އަކީ މަސައްކަތަށް ފޯކަސްކުރެވިފައިވާ ޗުއްޓީއެއް ކަމަށާއި، އޮފީހެއް ގާއިމުކޮށް ރައީސް ދުވަސްތައް ހޭދަކުރައްވަނީ ފޯނުގައި ކަމަށެވެ.
މަސްދަރު: ފްރާންސް24
