ފަހު ވަގުތު ބެލްޖިއަމް ބަލިކޮށް، ޒިދާން އާއެކު ފްރާންސް ކުރިއަށް

ޔުއެފާ ނޭޝަންސް ލީގުގައި ބެލްޖިއަމްއާ ދެކޮޅަށް ކުޅުނު މެޗުން ފަހު ވަގުތު މޮޅުވެ، ފްރާންސް އިން އެ ޓީމުގެ ފޯމު ދަމަހައްޓައިފި އެވެ. 

އާދީއްތަ ދުވަހުގެރޭ ބެލްޖިއަމްއާ ދެކޮޅަށް ކުޅުނު މެޗު ފްރާންސް އިން ކާމިޔާބު ކުރީ 1-0 އިންނެވެ. މެޗުގައި ފްރާންސް އިން ލަނޑު ޖެހީ ވެސް ދެ ވަނަ ހާފުގަ އެވެ.

މެޗު ފަށައިގެން ދެ ޓީމުން ވެސް ވަނީ ލަނޑު ޖަަހަން ފުރުސަތުތަކެއް ހޯދައިފަ އެވެ. މެޗުގައި ފްރާންސް އިން ރަނގަޅަށް ކުޅުނުއިރު، ލަނޑު ޖަހަން ލިބުނު ފުރުސަތުތަކުގެ ބޭނުން އެ ޓީމަށް ކުރެވޭ ގޮތެއް ނުވި އެވެ. ކެޕްޓަން ކީލިއަން އެމްބާޕޭ ނުލައި ފްރާންސް އިން ކުޅުނު މެޗުގެ ނަތީޖާ އަނބުރާލީ ބަދަލު ކުޅުންތެރިންނެވެ.

މެޗުގެ ފުރިހަމަ ވަގުތު ހަމަވާން ދެ މިނެޓަށް ވެފައި ވަނިކޮށް ފްރާންސް މޮޅު ކޮށްދިނީ މައިކަލް އޮލައިސޭ އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ ރަޔަން ޗާކީ އެވެ. މެޗުގައި މި ދެ ކުޅުންތެރިން ވެސް ކުޅެން ނިކުމެފައި ވަނީ 77 ވަނަ މިނެޓުގަ އެވެ. އެގޮތުން އޮލައިސޭ ކުޅެން ނުކުމެފައި ވަނީ ބްރާޑްލޭ ބާކޮލާގެ ބަދަލުގަ އެވެ.

މިއީ ފްރާންސްގެ ކޯޗުކަމާ ހަވާލުވި ޒިނެދިން ޒިދާންގެ އިރުޝާދުގެ ދަށުން އެ ޓީމުން ކުޅުނު ދެ ވަނަ މެޗެވެ. ފުރަތަމަ މެޗުގައި ފްރާންސް އިން ވަނީ ތުރުކީ ބަލިކޮށްފަ އެވެ. ނޭޝަންސް ލީގުގައި ކުޅުނު ދެ މެޗުން ވެސް މޮޅުވެ، ހަ ޕޮއިންޓާ އެކު ފްރާންސް އޮތީ އެއް ވަނައިގައި އެވެ. ފްރާންސް އަށް ދެން އޮތީ އިޓަލީއާ ދެކޮޅަށް ކުޅޭ މެޗެވެ.