ފްރާންސް އާއި ޖަރުމަނު ގުޅިގެން 2038 ވަނަ އަހަރުގެ ވޯލްޑް ކަޕް ބާއްވަން ބިޑު ކުރަން ވިސްނަނީ

2038 ވަނަ އަހަރުގެ ފީފާ ވޯލްޑް ކަޕް ބޭއްވުމަށް، ފްރާންސް އާއި ޖަރުމަނު ގުޅިގެން ބިޑު ކުރުމުގެ ފުރުސަތު އޮތް ކަމަށް، ފްރާންސް އިން ހާމަކޮށްްފި އެވެ. 

ފްރާންސްގެ ކުޅިވަރާ ބެހޭ މިނިސްޓަރު މަރީނާ ފެރާރީ ވިދާޅުވީ، ބޮޑެތި ކުޅިވަރު މުބާރާތްތައް ބޭއްވުމަކީ ކުރިއަށް އޮތް އަހަރުތަކުގައި އެ ޤައުމުން ގެންގުޅޭނެ އެންމެ މުހިންމު އެއް ސިޔާސަތު ކަމަށެވެ. 

ފްރާންސްގެ ރޭޑިއޯ ޕްރޮގްރާމެއްގައި ވާހަކަ ދައްކަވަމުން ފެރާރީ ވިދާޅުވީ، 2038 ވަނަ އަހަރުގެ ވޯލްޑް ކަޕް ބޭއްވުމަށް ފްރާންސް އާއި ޖަރުމަނު ގުޅިގެން ބިޑު ކުރުމުގެ ވިސްނުން ހުރިކަން ރަސްމީކޮށް އިއުލާން ކުރުމުގެ މަރުހަލާ އަށް ނުދިޔަ ނަމަވެސް، އެކަމަށް އޭނާ ފުރިހަމަ އަށް ތާއީދު ކުރައްވާ ކަމަށެވެ.

މީގެ ކުރިން ފްރާންސްގެ "ލެ ޕެރިސިއަން" ނޫހުން ވެސް ވަނީ މިފަދަ ބިޑެެއް ހުށަހެޅުމުގެ ފުރުސަތު އޮތް ކަމަށް ރިޕޯޓުކޮށްފައި އެވެ. 

ފްރާންސްގެ ރޭޑިއޯ ނެޓްވީކް އާރްއެމްސީ އިން ރިޕޯޓުކޮށްފައިވާ ގޮތުގައި، މިނިސްޓަރު ފެރާރީ ވިދާޅުވީ މުބާރާތް ބޭއްވުމަށް ހުށަހެޅުމަކީ ކުޅިވަރު ފެޑެރޭޝަންތަކުގެ ޒިންމާއެއް ކަމަށެވެ. އަދި މިހާތަނަށް އެކަމާ ގުޅޭ ގޮތުން ރަސްމީކޮށް މަޝްވަރާ ކުރެވިފައި ނުވި ނަމަވެސް، މިއީ ޤައުމުގެ ކުޅިވަރު އަދި އިޤްތިޞާދު ކުރިއެރުވުމަށް ގެންގުޅޭ ސިޔާސަތާ ވަރަށް ބޮޑަށް ގުޅޭ ކަމެއް ކަމަށް އޭނާ ފާހަގަ ކުރެއްވި އެވެ. 

ފްރާންސް އާއި ޖަރުމަނާ ދެމެދު ކުޅިވަރުގެ ދާއިރާ އިން އޮންނަ ގުޅުން މިފަހަކަށް އައިސް ވަނީ ވަރަށް ބޮޑަށް އިތުރުވެފައި އެވެ. މިގޮތުން 2029 ވަނަ އަހަރުގެ ހޭންޑް ބޯޅަ ވޯލްޑް ޗެމްޕިއަންޝިޕް ވެސް މި ދެ ޤައުމުން ގުޅިގެން ބޭއްވުމަށް ވަނީ ނިންމައިފަ އެވެ. ފެރާރީ ވިދާޅުވީ، ޔޫރަޕުގެ ބައިވެރިންނާ އެކު ގުޅިގެން މަސައްކަތް ކުރުމަކީ ބޮޑެތި މުބާރާތްތައް ކާމިޔާބުކަމާ އެކު ބޭއްވުމަށް އޮތް ރަނގަޅު މޮޑެލެއް ކަމަށެވެ.

ބޮޑެތި މުބާރާތްތައް ބޭއްވުމުގެ ތަޖުރިބާާ އަށް ބަލާއިރު، ފްރާންސް އިން ވަނީ 2016 ވަނަ އަހަރުގެ ޔޫރޯ ފުޓުބޯޅަ މުބާރާތާއި، 2024 ވަނަ އަހަރުގެ ޕެރިސް އޮލިމްޕިކްސް އަދި ޕެރަލިމްޕިކްސް ކާމިޔާބުކަމާއެކު ބާއްވައިފަ އެވެ. ކުޅިވަރު މިނިސްޓަރު ފެރާރީ ފާހަގަކުރެއްވި ގޮތުގައި، ކޮންމެ އަހަރަކު ވެސް ބައިނަލްއަޤުވާމީ ބޮޑު މުބާރާތެއް ބޭއްވުމަށް ފްރާންސް އިން އަމާޒު ހިފާފައިވާއިރު، 2030 ވަނަ އަހަރުގެ ވިންޓަ އޮލިމްޕިކްސް ބޭއްވުމަށް ވެސް އެ ޤައުމުން ދަނީ ތައްޔާރުވަމުންނެވެ. 

ފްރާންސް އިން އެންމެ ފަހުން ވޯލްޑް ކަޕް ހޯސްޓު ކޯށްފައި ވަނީ 1998 ވަނަ އަހަރު އެވެ. އެ ފަހަރުގެ މުބާރާތް ފްރާންސް އިން ކާމިޔާބު ކުރިއިރު، އެއީ އެ ޤައުމުންް ވޯލްޑް ކަޕް ކާމިޔާބު ކުރި ފުރަތަމަ ފަހަރެވެ. އޭގެ ފަހުން 2018 ވަނަ އަހަރު ރަޝިޔާގައި އޮތް ވޯލްޑް ކަޕް ވެސް ފްރާންސް އިން ކާމިޔާބު ކުރި އެވެ. 

ކުރިއަށް އޮތް ވޯލްޑް ކަޕްތަކަށް ބަލާއިރު، 2030 ވަނަ އަހަރުގެ ވޯލްޑް ކަޕް ބޭއްވުމަށް ހަަމަޖެހިފައި ވަނީ ސްޕެއިން އާއި ޕޯޗުގަލް އަދި މޮރޮކޯ ގުޅިގެންނެވެ. އަދި 2034 ވަނަ އަހަރުގެ މުބާރާތް ބޭއްވުމުގެ ފުރުސަތު ލިބިފައި ވަނީ ސައުދީ އަރަބިއްޔާ އަށެވެ.