ފްރާންސްގެ އެއްބަސްވުމުގައި ޒިދާން ސޮއިކޮށްފި، ވަރަށް އަވަހަށް އިއުލާން ކުރާނެ

ފްރާންސްގެ ޤައުމީ ޓީމުގެ ކޯޗުކަމާ ހަވާލުވުމަށް، ފްރާންސް ފުޓުބޯޅަ ފެޑެރޭޝަން އާއެކު ޒިނެދިން ޒިދާން އެއްބަސްވުމުގައި ސޮއިކޮށްފައިވާ ކަމަށާއި، ފްރާންސް އިން ވަރަށް އަވަހަށް އެކަން އިއުލާން ކުރާނެ ކަމަށް މީޑިއާ ރިޕޯޓުތައް ބުނެފި އެވެ.

ފްރާންސްގެ ކޯޗު ކަމުގެ މަގާމުގައި އެންމެ ފަހުން ހުރި ޑިޑިއޭ ޑެޝޯމްޕްސް ވަނީ، ދާދި ފަހުން ނިމުނު ފީފާ ވޯލްޑް ކަޕަށް ފަހު ފްރާންސްގެ ކޯޗުކަން ދޫކޮށްލައިފަ އެވެ. 2012 ވަނަ އަހަރު ފްރާންސްގެ ކޯޗުކަމާ ހަވާލުވި ޑެޝޯމްޕްސް ވަނީ، ވޯލްޑް ކަޕަށް ފަހު އެ ޓީމުގެ ކޯޗުކަން ދޫކޮށްލާނެކަން ކުރިން ވެސް އިއުލާން ކޮށްފައި އެވެ. 

އެއާ އެކު ފްރާންސް އިން ވަނީ، އެ ޓީމުގެ ލެޖެންޑް ޒިދާން އާއެކު މަޝްވަރާތައް ފަށައިފަ އެވެ. ފްރާންސްގެ ޤައުމީ ޓީމަށް އިރުޝާދު ދިނުމުގެ ޝައުޤުވެރިކަން އަބަދު ވެސް ހުންނަ ޒިދާން، އެންމެ ފުރަތަމަ ވެސް ފްރާންސްގެ ކޯޗުކަމާ ހަވާލުވާން އެއްބަސްވި ކަމަށް ރިޕޯޓުތަކުގައި ވަނީ ބުނެފައި އެވެ. އަދި މިހާރު ޒިދާން ފްރާންސްގެ އެއްބަސްވުމުގައި ސޮއިކޮށްފައިވާ ކަމަށާއި، އެއީ ދިގު މުއްދަތުގެ އެއްބަސްވުމެއް ކަމަށް ވެސް ރިޕޯޓުތައް ބުނެ އެވެ. 

ސްޕެއިންގެ ރެއާލް މެޑްރިޑް އިން ކޯޗިން ކެރިއަރު ފެށި ޒިދާން އަކީ، ދުނިޔޭގައި ފާހަގަކޮށްލެވޭ މަޝްހޫރު ކޯޗުންގެ ތެރޭގައި ހިމެނޭ ކޯޗެކެވެ. އޭނާ ވަނީ ރެއާލް މެޑްރިޑާ އެކު ގިނަ ކާމިޔާބީތަކެއް ހޯދައިފަ އެވެ. ދެ ފަހަރެއްގެ މަތިން ޒިދާން ރެއާލް އަށް އިރުޝާދު ދީފައިވާއިރު، އޭނާގެ އިރުޝާދުގެ ދަށުން ރެއާލް އިން ވަނީ 10 ތައްޓެއް ވެސް ކާމިޔާބު ކޮށްފައި އެވެ. އޭގެ ތެރޭގައި ޖެހި ޖެހިގެން ތިން އަހަރު ޔުއެފާ ޗެމްޕިއަންސް ލީގު ކާމިޔާބު ކުރުން ހިމެނެ އެވެ. 

ފްރާންސް ވެގެން ދާނީ ޒިދާންގެ ކޯޗިން ކެރިއަރުގައި އޭނާާ އިރުޝާދު ދޭނެ ދެ ވަނަ ޓީމަށެވެ. އުމުރުން 54 އަހަރުގެ ޒިދާން އަކީ މީގެ ކުރިން ފްރާންސް ޤައުމީ ޓީމަށް ވެސް ކުޅެފައިވާ ކުޅުންތެރިޔެކެވެ. ފްރާންސް އާއެކު އޭނާ ވަނީ 1998 ވަނަ އަހަރުގެ ވޯލްޑް ކަޕް އަދި 2000 ވަނަ އަހަރުގެ ޔޫރޯ މުބާރާތް ކާމިޔާބުކޮށްފަ އެވެ.