ފަރަންސޭސިވިލާތުގެ ހަމަނުޖެހުންތަކުން ބޮޑެތި ގެއްލުންތަކެއް، އާ މުޒާހަރާތަކެއްގެ އިންޒާރާއެކު ފުލުހުން އެލާޓުގައި
21 އޮކްޓޯބަރު 2026 | ބުދަ 08:36ފަރަންސޭސިވިލާތުގައި ދިރިއުޅުމުގެ ޚަރަދު ބޮޑުވުމާ ދެކޮޅަށް ކުރި މުޒާހަރާތަކުގައި ހިނގި ހަމަނުޖެހުންތަކާ ގުޅިގެން ގިނަ ބަޔަކު ހައްޔަރުކޮށްފައިވާއިރު، ކުރިއަށް އޮތް ހޮނިހިރު ދުވަހު އަލުން މުޒާހަރާ ބޭއްވުމަށް ވަނީ ރާވާފައި. މި ފަދަ ހަމަނުޖެހުންތައް ތަކުރާރުވިޔަ ނުދިނުމަށް ސަރުކާރުން ހަރުދަނާ ފިޔަވަޅުތަކެއް އަޅާނެ ކަމުގެ ޔަގީންކަން ވަނީ ދީފައި
ފަރަންސޭސިވިލާތުގެ ލިޔޯންގައި ހުންނަ އެޗްއެންޑްއެމްގެ ފިހާރަ ލޫޓުވައި، ހުރިހާ މުދަލެއް ވަގަށް ގެންގޮސްފައިވާ ކަމަށް ބުނާ މަންޒަރުތައް | އެކްސް
ހުސްވި ހަފުތާ ބަންދުގައި ހިނގައިދިޔަ ހަމަނުޖެހުންތަކާއި އަނިޔާވެރި އަމަލުތަކުގެ ސަބަބުން ލިބުނު ގެއްލުން "ދިހަވަރަކަށް ނުވަތަ ފަހަރެއްގައި އެތައް ސަތޭކަ މިލިޔަން" ޔޫރޯއަށް އަރާނެ ކަމަށް ލަފާކުރެވޭ ކަމަށް، ފަރަންސޭސިވިލާތުގެ އިގުތިސާދީ ވަޒީރު ރޮލޯން ލިސްކިޔޯ ބުދަ ދުވަހު ވިދާޅުވެއްޖެ އެވެ.
ހިނގައިދިޔަ ހާދިސާތަކަކީ "އިންތިހާއަށް ސީރިއަސް" ކަންތައްތަކެއްގެ ގޮތުގައި ސިފަކުރައްވައި، ފަރަންސޭސިވިލާތުގެ އެތެރެއިން ހަމަލާދީފައި ވަނީ "ހަމަނުޖެހުން ހިންގާ ދެ ހަރަކާތެއް: އެނާކިސްޓުންނާއި ގޭންގުތައް" ކަމަށް، ފަރަންސޭސިވިލާތުގެ އާރްޓީއެލް ރޭޑިއޯއަށް މައުލޫމާތު ދެއްވަމުން ލިސްކިޔޯ ވިދާޅުވި އެވެ. ގެއްލުން ލިބުނު ފިހާރަތަކުގެ ވެރިންނަށް އެހީތެރިކަން ފޯރުކޮށްދިނުމަށް ޓަކައި އިންޝުއަރެންސް ކުންފުނިތަކާ ގުޅިގެން ސަރުކާރުން މަސައްކަތް ކުރަމުންދާ ކަމަށާއި، މި ފަދަ ކަމެއް ތަކުރާރުވިޔަ ނުދިނުމަށް ކަމާބެހޭ އިދާރާތަކުން އަޅަންޖެހޭ ހުރިހާ ފިޔަވަޅުތަކެއް އަޅާނެ ކަމުގެ ޔަގީންކަން ލިސްކިޔޯ ދެއްވި އެވެ. ހޮނިހިރު ދުވަހަށް އާ މުޒާހަރާތަކެއް ރޭވިފައިވާ ދަނޑިވަޅެއްގައި، "މި ފަދަ ކަމެއް އަލުން ތަކުރާރުވިޔަ ނުދިނުމަށް ކުރެވެން ހުރި ހުރިހާ ކަމެއް އަޅުގަނޑުމެން ކުރާނަން،" ކަމަށް ލިސްކިޔޯ ވިދާޅުވި އެވެ.
ހޮނިހިރު ދުވަހު ޕެރިހުގައި މުޒާހަރާއެއް ބޭއްވުމަށް ރޭވިފައިވާ ކަމަށާއި، މިކަމާ ގުޅޭ ރަސްމީ ލިޔުން ޕެރިހުގެ ފުލުހުންގެ އިދާރާއަށް ހުށަހަޅާފައިވާ ކަމަށް ކޯޑިނޭޓަރު ބެންޖަމިން ބޯލް ބުނެފައިވާ ކަމަށް، 'ޔެލޯ ވެސްޓް' ހަރަކާތާ ހަވާލާދީ ފަރަންސޭސިވިލާތުގެ ބްރޯޑްކާސްޓަރު ބީއެފްއެމްޓީވީން ވަނީ ރިޕޯޓްކޮށްފަ އެވެ. ބަސްޓީ ސަރަހައްދަށް އެއްވުމަށް ޖެނެރަލް ކޮންފެޑެރޭޝަން އޮފް ލޭބާގެ ޕެރިސް ގޮތްޕާއި ދަރިވަރުންގެ ޔޫނިއަނަކުން ރާވާފައިވާ ކަމަށް ވެސް އޭނާ ވިދާޅުވި އެވެ.
މި މުޒާހަރާ ބޭއްވުމަށް ތައްޔާރުވަމުން މި ދަނީ، ފަރަންސޭސިވިލާތުގެ ވެރިރަށުގައި ދިރިއުޅުމުގެ ޚަރަދުތައް ބޮޑުވުމާ ދެކޮޅަށް ކުރި މުޒާހަރާތައް ހަމަނުޖެހުންތަކަކަށް ބަދަލުވެ، އަނިޔާވެރި އަމަލުތަކާއި މުދަލަށް ގެއްލުންދިން ހާދިސާތަކެއް ހިނގިތާ ހަފުތާއެއް ފަހުންނެވެ. އޮކްޓޫބަރު މަހުގެ 17 ވަނަ ދުވަހު ފަރަންސޭސިވިލާތުގެ އެކި ކަންކޮޅުތަކުގައި ގާތްގަނޑަކަށް 550،000 މީހުން މަގުތަކަށް ނުކުމެފައިވާއިރު، މުޒާހަރާގެ ބައިވެރިންނާއި ފުލުހުންނާ ދެމެދު ވަރުގަދަ ކުރިމަތިލުންތަކެއް ހިނގައި، އުޅަނދުތަކުގައި ހުޅުޖަހައި، އެތައް ފިހާރައެއް ލޫޓުވައި، އަދި، 2،000 އަށް ވުރެ ގިނަ މީހުން ވަނީ ހައްޔަރުކޮށްފަ އެވެ.
މަސްދަރު: އަނަދޮލު އޭޖެންސީ
