ރަސްމާލެ މަޝްރޫއާ މެދު ކަންބޮޑުވުން ފާޅުކޮށް، އީގަލް ހިލްސްގެ ވެރިޔާ އަލައްބާރު އަށް ގައުމީ ހަރަކާތުން ހުޅުވާލެވިފައިވާ ސިޓީއެއް ފޮނުވައިފި
13 ނޮވެމްބަރު 2026 | ހުކުރު 07:18ރަސްމާލެ މަޝްރޫއުގެ ދަށުން އީގަލް ހިލްސް ކުންފުންޏަށް ބިން ދިނުމަކީ ގައުމުގެ ސިޔާދަތަށާއި އިސްލާމީ އައިޑެންޓިޓީއަށް ނުރައްކާވެދާނެ ކަމެއް ކަމަށް ބުނެ އިދިކޮޅު ފަރާތްތަކުން ވަނީ ކަންބޮޑުވުން ފާޅުކޮށްފައި. މި މަޝްރޫއު ކުރިއަށްގެންދަނީ ދެފުށް ފެންނަ ގޮތަކަށް ނޫން ކަމަށް ތުހުމަތުކޮށް، މިކަމާ ދެކޮޅަށް ބޮޑު މުޒާހަރާއެއް ބޭއްވުމަށް "ދަ މޯލްޑިވްސް ނޭޝަނަލް މޫވްމަންޓް އޮން ރަސްމާލެ" އިން ދަނީ ތައްޔާރުވަމުން
އީގަލް ހިލްސްގެ ވެރިޔާ އަލައްބާރު | ސޯޝަލް މީޑިއާ
ރަސްމާލެ މަޝްރޫއުގެ ދަށުން 500 ހެކްޓަރުގެ ބިން އީގަލް ހިލްސް ކުންފުންޏަށް ދިނުމަށް ނިންމާފައިވާ ނިންމުމާ މެދު ކަންބޮޑުވުން ފާޅުކޮށް، އެ ކުންފުނީގެ ޗެއާމަން މުހައްމަދު އަލީ ރާޝިދު އަލައްބާރު އަށް "ދަ މޯލްޑިވްސް ނޭޝަނަލް މޫވްމަންޓް އޮން ރަސްމާލެ" އިން ހުޅުވާލެވިފައިވާ ސިޓީއެއް ފޮނުވައިފި އެވެ.
ބުރާސްފަތި ދުވަހު ފޮނުވި މި ސިޓީގައި އެ ހަރަކާތުން ވަނީ، މި މަޝްރޫއާ މެދު ރާއްޖޭގެ ސިޔާސީ މަސްރަހުގައި ބޮޑެތި އިދިކޮޅު ހަރަކާތްތަކެއް ހިނގަމުންދާ ކަމަށާއި، މިއީ ގާނޫނީ ގޮތުން ސުވާލު އުފެދޭ ކަންތައްތަކެއް ހިމެނޭ މަޝްރޫއެއް ކަމަށް ބުނެފަ އެވެ.
މި ސިޓީގައި ފާހަގަކޮށްފައިވާ ގޮތުގައި ރާއްޖޭގެ އެންމެ ބޮޑު އިދިކޮޅު ޕާޓީ، މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން ވަނީ އީގަލް ހިލްސްއަށް ބިން ދިނުމާ މެދު ރައްޔިތުންގެ ފެންނަ ނުފެންނަ ވޯޓެއް ނެގުމަށް ގޮވާލާ ގަރާރެއް ފާސްކޮށްފަ އެވެ. އެމްޑީޕީގެ ގައުމީ މަޖިލީހުގެ 58 މެންބަރުންގެ ތެރެއިން 57 މެންބަރުންގެ ތާއީދާއެކު ފާސްކުރި މި ގަރާރުގެ އިތުރުން، ކުރީގެ ރައީސް އަބްދުﷲ ޔާމީން އަބްދުލްގައްޔޫމާއި އެމަނިކުފާނުގެ ޕީޕަލްސް ނޭޝަނަލް ފްރަންޓް (ޕީއެންއެފް) އިން ވެސް ވަނީ މި މަޝްރޫއަކީ ރާއްޖޭގެ ސިޔާދަތަށް ނުރައްކާވެދާނެ ކަމެއް ކަމަށް ބުނެ އެކަމާ ދެކޮޅަށް ތެދުވެފަ އެވެ.
އިދިކޮޅު ފަރާތްތަކުން މި މަޝްރޫއާ ދެކޮޅު ހަދާ މައިގަނޑު ދެ ސަބަބެއް މި ސިޓީގައި ބަޔާންކޮށްފައިވެ އެވެ. އެގޮތުން ފުރަތަމަ ކަމަކީ، ސައްތަ އިންސައްތަ މުސްލިމް ގައުމެއްގެ ގޮތުގައި އޮތް ރާއްޖޭގެ އިސްލާމީ އައިޑެންޓިޓީ ހިމާޔަތްކުރުމަށް ގާނޫނުއަސާސީގައި ހުރި ރައްކާތެރިކަމަށް، ބޭރުގެ ފަރާތްތަކަށް ރާއްޖޭގައި ދާއިމީކޮށް ދިރިއުޅުމުގެ ފުރުސަތާއި މިލްކުވެރިކަން ދިނުމުގެ ސަބަބުން އަސަރުކޮށްފާނެތީ އުފެދޭ ކަންބޮޑުވުމެވެ. ދެވަނަ ކަމަކީ، ރާއްޖޭގެ އެންމެ މަދު ވަސީލަތް ކަމަށްވާ ބިން، ބޭރުގެ މަސްލަހަތުތަކަށް ދިގު މުއްދަތަށް ދޫކޮށްލުމަކީ އަންނަން އޮތް ޖީލުތަކުގެ ހައްގުތަކަށް އުނިކަން އަންނާނެ ކަމެއް ކަމަށް ދެކޭ ދެކުމެވެ.
މީގެ އިތުރުން، ރައީސް ޑރ. މުހައްމަދު މުއިއްޒުގެ ސަރުކާރުން މި މަޝްރޫއު ކުރިއަށްގެންދަނީ ދެފުށް ފެންނަ ގޮތަކަށް ނޫން ކަމަށާއި، މިކަމުގައި ކޮރަޕްޝަނާއި މަގާމުގެ ނުފޫޒު ބޭނުންކުރުމުގެ ތުހުމަތުތަކެއް ހުރި ކަމަށް ވެސް ސިޓީގައި ފާހަގަކޮށްފައިވެ އެވެ. މި އަހަރުގެ ތެރޭގައި ސަރުކާރަށް ކުރިމަތިވި އިންތިހާބީ ނާކާމިޔާބީތަކަށް އިޝާރާތްކޮށް އެ ހަރަކާތުން ބުނީ، އޭޕްރީލް މަހު ބޭއްވި ރިފަރެންޑަމްގައި 69 އިންސައްތަ ރައްޔިތުން ސަރުކާރުގެ ހުށަހެޅުމާ ދެކޮޅަށް ވޯޓު ދީފައިވާ ކަމަށެވެ. އަދި ލޯކަލް ކައުންސިލް އިންތިޚާބުގައި ފަސް މޭޔަރުންގެ ގޮނޑި އިދިކޮޅުން ކާމިޔާބުކުރުމާއި، ހިތަދޫ އުތުރު ދާއިރާގެ ބައި-އިލެކްޝަނުން ސަރުކާރު ހިންގާ ޕާޓީ ބަލިވުމަކީ ސަރުކާރުގެ ތާއީދު ކުޑަވެފައިވާ ކަމުގެ ހެއްކެއް ކަމަށް ބުނެފައިވެ އެވެ.
އެހެންކަމުން، އީގަލް ހިލްސް އާއި އެ ކުންފުނީގެ ހިއްސާދާރުންނާއި އިންވެސްޓަރުންނަށް މި މަޝްރޫއާ ގުޅިގެން ކުރިމަތިވެދާނެ ސިޔާސީ، ގާނޫނީ އަދި މާލީ ނުރައްކާތަކަށް ސަމާލުވުމަށް މި ސިޓީގައި ވަނީ އިންޒާރު ދީފަ އެވެ. ރައްޔިތުންގެ ސީދާ ބައިވެރިވުމެއް ނެތި، ސިޔާސީ ގޮތުން ބަލިކަށިވެފައިވާ ސަރުކާރަކާއެކު މިފަދަ އެއްބަސްވުންތަކެއްގައި ސޮއިކުރުމަކީ އީގަލް ހިލްސްއިން ރާއްޖޭގެ ހާލަތުގެ ނާޖާއިޒު ފައިދާ ނެގުން ކަމަށް ދިވެހި ރައްޔިތުން ދެކޭނެ ކަމަށް ވެސް ބުނެފައިވެ އެވެ.
މި މަޝްރޫއާ ދެކޮޅަށް ރައްޔިތުންގެ މެދުގައި އޮތް ނުރުހުން އިތުރުވަމުންދާކަން ފާހަގަކުރަމުން، 2026 ނޮވެމްބަރު 13 ވާ ހުކުރު ދުވަހު މާލޭގައި ބޮޑު މުޒާހަރާއެއް ބޭއްވުމަށް ތައްޔާރުވަމުންދާ ކަމަށް ވެސް އެ ހަރަކާތުން ބުނެ އެވެ. މި މުޒާހަރާއަކީ ރަސްމާލެ އެއްބަސްވުމާ ދެކޮޅަށް، ދެފުށް ފެންނަ ގޮތަށް ކަންކަން ކުރުމަށާއި ރިފަރެންޑަމްއަކަށް ގޮވާލާ ބާއްވާ ހަރަކާތެކެވެ. ސިޓީ ނިންމާލަމުން ބުނެފައިވަނީ، ރާއްޖޭގެ ބިމާ މެދު ގޮތް ނިންމުމުގެ އެންމެ ފަހުގެ ބާރު އޮންނަންވާނީ ދިވެހި ރައްޔިތުންގެ އަތްމަތީގައި ކަމަށެވެ.
