ސަރުކާރުން ކުއްލި ކުއްލިއަށް ގެންނަމުންދާ ބަދަލުތަކުގެ ސަބަބުން ކަންމަތީ ފިހާރަތަކުން ފެށިގެން ރިސޯޓުތައް ހިންގުމަށް ވެސް ވަނީ ދަތިވެފައި: ފައިސަލް
17 ނޮވެމްބަރު 2026 | އަންގާރަ 11:45ސަރުކާރުން ކުއްލި ބަދަލުތައް ގެނައުމުގެ ސަބަބުން ވިޔަފާރިތަކަށް ބޮޑެތި ގޮންޖެހުންތަކެއް ކުރިމަތިވެ، ތަރައްގީގެ މަޝްރޫއުތައް ހުއްޓިފައިވާތީ ކުރީގެ ނައިބު ރައީސް ފައިސަލް ނަސީމް ކަންބޮޑުވުން ފާޅުކުރައްވައިފި. ވަޒީފާގެ ބިރުދެއްކުމާއި ސިޔާސީ މަޖުބޫރުކުރުންތައް ހުއްޓާލުމަށް ގޮވާލައްވަމުން، ރައްޔިތުންގެ އަސާސީ ބޭނުންތަކަށް އިސްކަންދީ އިގްތިސާދީ ލުއިފަސޭހަކަން ހޯދައިދިނުމަށް އެމަނިކުފާނު ބާރުއެޅުއްވި


ކުރީގެ ނައިބު ރައީސް ފައިސަލް ނަސީމް | ރާއްޖެ އެމްވީ
ރައީސް ޑރ. މުހައްމަދު މުއިއްޒުގެ ސަރުކާރުން ކުއްލި ކުއްލިއަށް ގެންނަމުންދާ ބަދަލުތަކުގެ ސަބަބުން ކަންމަތީ ފިހާރަތަކުން ފެށިގެން ރިސޯޓުތައް ހިންގުމަށް ވެސް ދަތިވެފައިވާ ކަމަށް ކުރީގެ ނައިބު ރައީސް ފައިސަލް ނަސީމް ވިދާޅުވެއްޖެ އެވެ.
އެމްޑީޕީގެ ރިޔާސީ އިންތިޚާބުގައި ވާދަކުރައްވާކަން އިއުލާންކުރައްވާފައިވާ ފައިސަލް އަދި އާޒިމްގެ ޓީމުން އަންގާރަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ފައިސަލް ވިދާޅުވީ ރައްޔިތުންގެ މަޖިލިސް މެދުވެރިކޮށް ސަރުކާރު ހިންގުމަށް ފަސޭހަ ކުރުމަށްޓަކައި ގިނަ މަސައްކަތްތަކެއް ކުރަމުންދާ ކަމަށް ވިދާޅުވި ނަމަވެސް، ރައްޔިތުންނާ ދޭތެރޭ ވިސްނައިގެން ކުރާ އެއްވެސް ކަމެއް ފެނިވަޑައިނުގަންނަވާ ކަމަށެވެ.
އެގޮތުން، ދައުލަތުގެ ވަޒީފާގައި ތިބޭ ފަރާތްތަކާއި އެފަރާތްތަކުގެ އާއިލާތަކުގެ ކަންބޮޑުވުން އިންތިހާއަށް އޮތް ކަމަށް ފައިސަލް ވިދާޅުވި އެވެ. ވަކި ޕާޓީއަކަށް ވަންނަން މަޖުބޫރު ކުރުމަކީ ގާނޫނު އަސާސީއާ މުޅިން ހިލާފު ކަމެއް ކަން ފާހަގަކުރައްވާ ފައިސަލް ވިދާޅުވީ މިއީ ހުއްޓާލަން ޖެހޭ ކަމެއް ކަމަށެވެ.
ހަމައެއާއެކު ފައިސަލް ވަނީ އެކި ފެންވަރުގެ މީހުންނަށް ދިރިއުޅެވޭނެ ގޮތަތައް ހޯދައިދިނުމަކީ ސަރުކާރުން ކުރަން ޖެހޭ ކަމެއް ކަމަށް ވިދާޅުވެފަ އެވެ.
އެގޮތުން ވިޔަފާރިތަކަށް ލުއިފަސޭހަކަން ގެނެވެން އެބަ ޖެހޭ، މިހާރު ހަމަ އެނގިވަޑައިގަންނަވާނެ ޓީޓީއެއް ފޮނުވަންވެއްޖެ ކަމުގައި ވަންޏާ ވަރަށް ބޮޑު އުނދަގޫތަކެއްގެ ތެރޭގައި އުޅެން މިޖެހެނީ އެތައް ދުވަސްތަކެއް، ހަފްތާތަކެއް، މަސްތަކެއް ދާ ކަމަށް ވިޔަފާރިވެރިން މި ވާހަކަ ދައްކަމުން މިދަނީ، މީގެ ސަބަބުން ގެންނަ ކުއްލި ކުއްލި ބަދަލުތަކުގެ ސަބަބުން ކަންމަތީ ފިހާރަތަކުން ފެށިގެން ރިސޯޓުތައް ހިންގުމަށް ވެސް މިވަނީ ދަތިވެފައިފައިސަލް ނަސީމް
މީގެ އިތުރުން، ފައިސަލް ވަނީ ކުރީ ސަރުކާރުން ފަށާފައިވާ ތަރައްގީގެ މަޝްރޫއުތަކާއި މިސަރުކާރުން ވެފައިވާ ވައުދުތައް ނުފުއްދާ ކަމަށް ވިދާޅުވެ ކަންބޮޑުވުން ފާޅުކުރައްވާފަ އެވެ. އެގޮތުން ފެނާއި ނަރުދަމާގެ އިތުރުން އަސާސީ އެހެނިހެން ކަންކަން ހުއްޓިފައި ވުމުން މީގެ ކުރިން ދިވެހިރާއްޖޭގެ ރައްޔިތުންގެ ކަންބޮޑުވުން ނެތް މިންވަރަށް މިއަދު އެބައޮތް ކަމަށް ފައިސަލް ވިދާޅުވި އެވެ.










