ފާއިތުވި ހަފްތާގައި ސްކޭމްތަކުން ގެއްލުނު ފައިސާގެ 63.8 އިންސައްތަ އަނބުރާ ހޯދި!
17 ނޮވެމްބަރު 2026 | އަންގާރަ 16:57ނޮވެމްބަރު 8 އިން 14 އަށް ހުށަހެޅި 38 ސްކޭމް މައްސަލައެއްގައި 6 ލައްކައަށްވުރެ ގިނަ ރުފިޔާ ގެއްލިފައިވާއިރު، އޭގެ ތެރެއިން 63 އިންސައްތަ ފައިސާ ފުލުހުން ވަނީ ހޯދާފައި. އެންމެ ގިނައިން ރިޕޯޓްކޮށްފައިވަނީ އީ-ކޮމާސް ސްކޭމްތައް ކަމަށްވާތީ، އޯޓީޕީ ފަދަ މުހިންމު މައުލޫމާތު އެއްވެސް ފަރާތަކާ ހިއްސާނުކުރުމަށް ފުލުހުން އިލްތިމާސްކުރޭ


ފައިސާ ގުނާ މެޝިނެއްގައި ދިވެހި ރުފިޔާތަކެއް ގުނަނީ | ޝަޓާ ސްޓޮކް
މި ހިނގާ ނޮވެމްބަރު މަހުގެ 8 ވަނަ ދުވަހުން ފެށިގެން 14 ވަނަ ދުވަހުގެ ނިޔަލަށް ސްކޭމްއާ ގުޅޭ އެކި ބާވަތުގެ 38 މައްސަލަ ހުށަހަޅާފައިވާ ކަމަށް ފުލުހުންގެ އެންޓި ސްކޭމް ސެންޓަރުން ބުނެފި އެވެ.
އެ ސެންޓަރުން އާންމު ކޮށްފައިވާ ފާއިތުވި ހަފްތާގެ ތަފާސްހިސާބުތައް ދައްކާ ގޮތުން މިދިޔަ ހަފްތާގައި އެކަނި ވެސް ސްކޭމްގެ މައްސަލަތަކުގައި 6 ލައްކަ އަށް ވުރެ ގިނަ އަދަދެއްގެ ފައިސާ ވަނީ ގެއްލިފަ އެވެ. އެގޮތުން ޖުމްލަ 630,573.34 (ހަ ލައްކަ ތިރީސް ހާސް ފައްސަތޭކަ ހަތްދިހަ ތިން ރުފިޔާ ތިރީސް ހަތަރު ލާރި) ގެއްލިފައިވާ ކަމަށް ތަފާސްހިސާބުގައިވެ އެވެ.
ގެއްލުނު ފައިސާގެ 63.85 އިންސައްތަ ފައިސާ އަނބުރާ ހޯދާފައިވާއިރު، ހޯދިފައިވަނީ ޖުމްލަ 402,658.34 (ހަތަރު ލައްކަ ދެ ހާސް ހަ ސަތޭކަ ފަންސާސް އަށް ރުފިޔާ ތިރީސް ހަތަރު ލާރި) ކަމަށް އެންޓި ސްކޭމް ސެންޓަރުން ވަނީ ބުނެފަ އެވެ.
ފާއިތުވި ހަފްތާގައި އެންމެ ގިނައީ އީ-ކޮމާސް މެދުވެރިކޮށް ހިންގާފައިވާ ސްކޭމްގެ މައްސަލަތަކެވެ. އެގޮތުން އެ ބާވަތުގެ 13 މައްސަލަ ހުށަހެޅުނު ކަމަށް އެ ސެންޓަރުން ވަނީ ބުނެފަ އެވެ. އޭގެ އިތުރުން ހުއްދަ ނެތް ޓްރާންސެކްޝަންގެ 9 މައްސަލަ، ބުކިންގ ކެންސަލް އަދި ރިފަންޑްގެ 6 މައްސަލަ، ފައިސާ މާރުކުރުމުގެ 5 މައްސަލަ، އޮޅުވާލައިގެން ސްކޭމް ކުރުމުގެ 4 މައްސަލަ އަދި އިންވެސްޓްމަންޓްގެ 1 ހިމެނޭ ކަމަށް އެ ސެންޓަރުން ބުނެފައިވެ އެވެ.
އެންޓި ސްކޭމް ސެންޓަރުން ބުނީ އެއްވެސް މީހަކު އެމީހެއްގެ ޕިން، އޯޓީޕީ ނުވަތަ ބޭންކް ކޯޑް އެއްވެސް މީހަކާ ހިއްސާ ނުކުރުމަށް އިލްތިމާސް ކުރާ ކަމަށެވެ. އަދި ބޭންކުން ނުވަތަ އެއްވެސް އިދާރާއެއްގެ ނަމުގައި ގުޅައިގެން އޯޓީޕީ އަށް އެދުނަސް އެއީ ސްކޭމް ކުރުމަށް ހޯދާ މައުލޫމާތު ކަމަށާއި އެފަދަ ކޯލެއް ލިބިއްޖެނަމަ ވަގުތުން ފޯނު ކަނޑާލައި ރިޕޯޓް ކުރުމަށް އެދޭ ކަމަށެވެ.









