މިދިޔަ ހަފްތާގައި ސްކޭމްގެ މައްސަލަތަކުގައި 4 ލައްކަ ރުފިޔާ ގެއްލުނުއިރު 2 ލައްކަ ރުފިޔާ އަނބުރާ ހޯދި
15 އޯގަސްޓު 2026 | ހޮނިހިރު 12:53މިދިޔަ ހަފުތާގައި ހިންގި ސްކޭމްތަކުގައި އާންމުންގެ އަތުން 4.7 ލައްކައަށްވުރެ ގިނަ ރުފިޔާ ގެއްލިފައިވާއިރު، އޭގެ ތެރެއިން 2.6 ލައްކަ ރުފިޔާ ފުލުހުން ވަނީ ހޯދާފައި. އެންމެ ގިނައިން ރިޕޯޓްކޮށްފައިވަނީ އޮންލައިން ވިޔަފާރި އާއި ބޭރު ފައިސާ މާރުކުރުމުގެ މުއާމަލާތްތަކާ ގުޅޭ މައްސަލަތައް ކަމަށްވާތީ، އޮންލައިންކޮށް ފައިސާގެ މުއާމަލާތްތައް ކުރުމުގައި އިތުރަށް ސަމާލުވުމަށް ފުލުހުން އިލްތިމާސްކުރޭ
ސްކޭމްތަކުގެ ސަބަބުން ގެއްލުނު ފައިސާ ހޯދުން | ޕޮލިސް
މި ހިނގާ އޮގަސްޓް މަހުގެ 2 އިން 8 އަށް ސްކޭމްގެ ޖުމްލަ 53 މައްސަލައެއް ރިޕޯޓްކޮށްފައިވާ ކަމަށް މޯލްޑިވްސް ޕޮލިސް ސަރވިސްގެ އެންޓި ސްކޭމް ސެންޓަރުން ބުނެފި އެވެ.
ރާއްޖޭގައި ހިންގާފައިވާ ސްކޭމްތަކުގެ ތަފާސްހިސާބުތަކަށް ބަލާއިރު އާންމުންގެ އަތުން ޖުމްލަ 475,275.76 (ހަތަރު ލައްކަ ހަތްދިހަ ފަސް ހާސް، ދުއިސައްތަ ހަތްދިހަ ފަސް ރުފިޔާ ހަތްދިހަ ހަ ލާރި) ގެއްލިފައިވެ އެވެ. ނަމަވެސް މީގެ ތެރެއިން 269,631.27 (ދެ ލައްކަ ފަސްދޮޅަސް ނުވަ ހާސް، ހަ ސަތެކަ ތިރީސް އެއް ރުފިޔާ ހަތަވީސް ލާރި) އަނބުރާ ހޯދިފައިވާ ކަމަށް ވެސް ފުލުހުން ވަނީ ހާމަކޮށްފަ އެވެ.
ސްކޭމްތައް ހިންގުމަށް ބޭނުންކޮށްފައިވާ ވަސީލަތްތަކަށް ބަލާއިރު، އޮންލައިން މެސެޖިންގ ޕްލެޓްފޯމްތަކާއި، އައިބޭ، ފޯނު ކޯލް، ގޮތް ނޭނގޭ ލިންކުތަކުގެ އިތުރުން ފޭސްބުކް މާކެޓް ޕްލޭސް މެދުވެރިކޮށް މިފަދަ އަމަލުތައް ހިންގާފައިވާކަން ފާހަގަކުރެވެ އެވެ. މީގެ ތެރެއިން އެންމެ ގިނަ މައްސަލަ ރިޕޯޓްކޮށްފައި ވަނީ އީ-ކޮމާސް ނުވަތަ އޮންލައިން ވިޔަފާރީގެ މުއާމަލާތްތަކާ ގުޅިގެންނެވެ. އެގޮތުން އީ-ކޮމާސްގެ 22 މައްސަލައެއް މިދިޔަ ހަފުތާގައި ވަނީ ހުށަހަޅާފަ އެވެ.
ދެން އެންމެ ގިނައިން ހުށަހަޅާފައި ވަނީ ބޭރު ފައިސާ މާރުކުރުމުގެ މުއާމަލާތްތަކާ ގުޅޭ ސްކޭމްތަކެވެ. މި ބާވަތުގެ 12 މައްސަލައެއް ރިޕޯޓްކޮށްފައިވާއިރު، ބުކިންގ ކެންސަލް ކުރުމާއި ރިފަންޑް ސްކޭމްގެ 7 މައްސަލައެއް ވަނީ ހުށަހަޅާފަ އެވެ. މީގެ އިތުރުން މީހުންގެ ފަރާތުން އޮޅުވާލައިގެން ފައިސާ ހޯދުމުގެ ނުވަތަ އިމްޕާސަނޭޝަންގެ 3 މައްސަލައަކާއި، އެހެނިހެން ބާވަތްތަކުގެ 9 މައްސަލައެއް ފުލުހުންނަށް ވަނީ ހުށަހަޅާފަ އެވެ.
ސްކޭމްތަކުގެ މައްސަލަ ރާއްޖޭގައި އިތުރުވަމުންދާތީ، އާންމު ރައްޔިތުން މިފަދަ ކަންކަމަށް ސަމާލުވުމަށް ފުލުހުން އަބަދު ވެސް އިލްތިމާސް ކުރެ އެވެ. ވަކިން ޚާއްސަކޮށް އޮންލައިންކޮށް ކުރާ މުއާމަލާތްތަކުގައި އިތުރަށް ސަމާލުވުމަށް ފުލުހުން ވަނީ އެދިފަ އެވެ.
