ސަރުކާރުން އަންނަ އަހަރަށް ލަފާކޮށް ހުށަހަޅާފައިވާ ބަޖެޓަކީ ހަރަދު، ޑިފެސިޓް އަދި ދަރަނި ވެސް ބޮޑުވާ ބަޖެޓެއް: ސަރުވަޝް
10 ނޮވެމްބަރު 2026 | އަންގާރަ 10:14އަންނަ އަހަރުގެ ބަޖެޓުގައި ޚަރަދުތައް 6.6 އިންސައްތަ އިތުރުވެފައިވާއިރު، ދަރަނި ދެއްކުމަށް ބޭނުންވާ ފައިސާ ހޯދާނެ އިތުބާރު ހުރި ރޭވުމެއް ނެތް ކަމަށް ސަރުވަޝް ވިދާޅުވި. އަދި ޚަރަދު ކުޑަކުރުމަށް ހަރުދަނާ އިސްލާހީ ފިޔަވަޅުތަކެއް ނެތުމާއި، ގެދޮރުވެރިކަމަށް ކަނޑައެޅި ބަޖެޓު އެދެވޭ ގޮތެއްގައި ބޭނުންނުކުރާތީ އޭނާ ކަންބޮޑުވުން ފާޅުކުރެއްވި. ސަރުކާރުން ފިސްކަލް ޑިސިޕްލިން ހިފަހައްޓަން މަސައްކަތް ނުކުރާކަން އޭނާ ފާހަގަކުރެއްވި
ފިނޭންސް މިނިސްޓްރީގެ ކުރީގެ ޗީފް ފައިނޭންޝަލް ބަޖެޓު އެގްޒެކެޓިވް އަދި ކުރީގެ ޕެންޝަން ބޯޑު މެންބަރު އަހުމަދު ސަރުވަޝް އާދަމް | ރާއްޖެ އެމްވީ
ސަރުކާރުން އަންނަ އަހަރަށް ލަފާކޮށް ހުށަހަޅާފައިވާ ބަޖެޓަކީ ހަރަދު، ޑިފެސިޓް އަދި ދަރަނި ވެސް ބޮޑުވާ ބަޖެޓެއް ކަމަށް ފިނޭންސް މިނިސްޓްރީގެ ކުރީގެ ޗީފް ފައިނޭންޝަލް ބަޖެޓު އެގްޒެކެޓިވް އަދި ކުރީގެ ޕެންޝަން ބޯޑު މެންބަރު އަހުމަދު ސަރުވަޝް އާދަމް ވިދާޅުވެއްޖެ އެވެ.
އެމްޑީޕީގެ މެކްރޮއިކޮނޮމިކް ކޮމެޓީގެ ފަރާތުން "ދަރަނި ބޮޑުވެ، ޚިދުމަތް ކުަޑަވާ" ނަމުގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ސަރުވަޝް ވިދާޅުވީ ސުކޫކް ދެއްކުމަށްފަހު ދަރަނި ދައްކާ މިންވަރު ކުޑަވުމުން، ހަރަދު ކުޑަވާނެ ކަމަށް ސަރުކާރުން ބުނި ނަމަވެސް ހަރަދު ވަނީ 6.6 އިންސައްތަ އިތުރުވެފައި ކަމަށެވެ.
އެގޮތުން، ސަރުވަޝް ވިދާޅުވީ ހަރަދު އިތުރުވެފައި ވަނީ 49.3 ބިލިއަން ރުފިޔާއިން 52.6 ބިލިއަން ރުފިޔާއަށް ކަމަށެވެ. އަދި 18.9 ބިލިއަން ރުފިޔާގެ ފައިނޭންސިންގ އެއް ހޯދަން ޖެހޭ ކަަމަށާއި ފައިނޭންސިންގ ހޯދާނެ ކްރެޑިބަލް ޕްލޭނެއް ނެތް ކަމަށް ސަރުވަޝް ވިދާޅުވި އެވެ.
ޑެފެސިޓް ވެސް ވަނީ ޖީޑީޕީގެ ނިސްބަތުން 7.3 އިންސައްތައިގައި އެއީ 9.4 ބިލިއަން ރުފިޔާގެ ޑެފެސިޓެއް. ބަޖެޓުގައި ހިމެނޭ އަހަރުތަކަށް ބަލާއިރު 2025ން 29ށް އޮތް އަހަރުތަކުގެ ތެރެއިން 2027 އަށް މިއޮތީ އެއަހަރުތަކުގައި އެންމެ ބޮޑު ޑެފެސިޓް ހުށަހަޅާފައި. އަދި ކުރިއަށް 3 އަހަރުގެ ހަރަދު ކުޑަ ކުރުމަށް އެއްވެސް ހަރުދަނާ ރިފޯމެއް އޮތް ކަމަކަށް ގަބޫލެއް ނުކުރެވޭއަހުމަދު ސަރުވަޝް އާދަމް
ހަމައެއާއެކު 2026 ވަނަ އަހަރު ބަޖެޓުގައި ތެރެއިން ކުރަން ބުނި އެއްވެސް ކަމެއް ވީތަނެއް ނުފެންނަ ކަމަށް ސަރުވަޝް ވިދާޅުވި އެވެ. އެގޮތުން، 2026 ވަނަ އަހަރުގެ ބަޖެޓަކީ ގެދޮރުވެރިކަމުގެ ބަޖެޓުކަމަށް ރައީސް މުއިއްޒު ވިދާޅުވެފައިވާކަން ފާހަގަކުރައްވާ ސަރުވަޝް ވިދާޅުވީ 1.6 ބިލިއަން ރުފިޔާ ފާސްކުރި ބަޖެޓުގައި ގެދޮރުވެރިކަމަށް ކަނޑައަޅާފައިވާ ކަމަށެވެ.
ނަމަވެސް ގެދޮރުވެރިކަމަށް ހަރަދުކޮށްފައި ވަނީ 600 މިލިއަންނަށް ވުރެ ކުޑަކޮށް ކަމަށް ސަރުވަޝް ވިދާޅުވި އެވެ. އަދި ފިއުލް ސަބްސިޑީއާއި އެސްއޯއީތަކަށް ހަރަދު ކުރަން ބަޖެޓް ކުރި މިންވަރަށްވުރެ އިތުރަށް ހަރަދުކޮށްފައިވާ ކަމަށް ސަރުވަޝް ވިދާޅުވި އެވެ.
ހަމައެއާއެކު، އަންނަ އަހަރަށް ލަފާކޮށް ހުށަހަޅާފައިވާ ބަޖެޓުގައި ރިކަރަންޓް ހަރަދު ބޮޑުވެފައި ވާތީ ސަރުވަޝް ވަނީ މިސަރުކާރުން ފިސްކަލް ޑިސިޕްލީން ހިފަހައްޓަން މަސައްކަތް ނުކުރާ ކަމަށް ވިދާޅުވެފަ އެވެ.
