އަންނަ އަހަރަށް ލަފާކޮށް ސަރުކާރުން ހުށަހަޅާފައިވާ ބަޖެޓުގެ 70 އިންސައްތައަކީ ރިކަރަންޓް ހަރަދު: ރައީސް ނަޝީދު
10 ނޮވެމްބަރު 2026 | އަންގާރަ 09:44ސަރުކާރުން ވަޒީފާ އިތުރުކޮށް އިސްރާފު ބޮޑުކުރާކަމަށް ވިދާޅުވެ، ރައީސް ނަޝީދު ވަނީ ދަރަނި ރީސްޓްރަކްޗަރ ކުރުމުގައި ސަރުކާރު ފެއިލްވެފައިވާ ކަމަށް ތުހުމަތުކުރައްވާފައި. އަދި ދަރަނި ދެއްކުމުގެ ސިޔާސަތެއް ނެތުމުން ރާއްޖޭގައި ހުރި ހުރިހާ ފައިސާއެއް އެކަމަށް ހޭދަކުރަން ޖެހުމަކީ ޑޮލަރުގެ ތާށިކަން ކުރިމަތިވި މައިގަނޑު ސަބަބު ކަމަށް އެމަނިކުފާނު ފާހަގަކުރެއްވި
ކުރީގެ ރައީސް އަދި އެމްޑީޕީ ޗެއަރޕާސަން މުހައްމަދު ނަޝީދު | އެމްޑީޕީ
އަންނަ އަހަރަށް ލަފާކޮށް ސަރުކާރުން ހުށަހަޅާފައިވާ ބަޖެޓުގެ 70 އިންސައްތައަކީ ރިކަރަންޓް ހަރަދު ކަމަށް ކުރީގެ ރައީސް އަދި އެމްޑީޕީގެ ޗެއަރޕާސަން މުހައްމަދު ނަޝީދު ވިދާޅުވެއްޖެ އެވެ.
އަންގާރަ ދުވަހު އެމްޑީޕީން ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ރައީސް ނަޝީދު ވިދާޅުވީ އެމަނިކުފާނު ރިކަރަންޓް ހަރަދު ގޮތުގައި ފާހަގަކުރަނީ މުސާރައަށް ހަރަދު ކުރާ މިންވަރު ކަމަށެވެ. އެގޮތުން ރަށްރަށުގެ އިންޖީނުގެތަކުގައި ގިނަ އަދަދަކަށް މުވައްޒަފުން ނަގާފައި ހުންނަ ކަމަށް ރައީސް ނަޝީދު މިސާލު ދެއްކެވި އެވެ.
ބައްލަވާ ރާއްޖޭގެ ރަށެއްގެ އިންޖީނުގެ އޭގެން އިންޖީނު ގެޔެއްގައި އެއް މެގަވޯލްޓު ކަރަންޓް ވެސް ނުއުފައްދާ އެހެންނަމަވެސް އެ ތަނެއްގައި މަސައްކަތް ކުރަން ތިބެ ދާނެ 50 މުވައްޒަފުން. ރާއްޖޭގެ ރިސޯޓެއްގައި 5 މެގަ ވޯލްޓު ކަރަންޓް އުފައްދާ އިރުގައި އޭގެން ރިސޯޓެއްގައި އިންޖީނުގޭގައި މަސައްކަތް ކުރަން ތިބޭނީ ގިނަ ވެގެން 4، 5 މީހުންމުހައްމަދު ނަޝީދު
ސަރުކާރުން ކުރަމުންދާ އިސްރާފު އިންތިހާއަށް ބޮޑުކަން ފާހަގަކުރައްވާ ރައީސް ނަޝީދު ވިދާޅުވީ ސަރުކާރުގެ އުއްމީދަކީ ވޯޓު ހޯދުން ނަމަވެސް، އެއްވެސް ސަރުކާރަކަށް ވަޒީފާ ބަހައިގެން ވޯޓު ނުލިބުނު ކަމަށެވެ.
މީގެ އިތުރުން، 2023 ވަނަ އަހަރު ރައީސް ޑރ. މުހައްމަދު މުއިއްޒު ވެރިކަމަށް ވަޑައިގެންނެވި އިރުގައި 2026 ވަނަ އަހަރަކީ ބޮޑު އަދަދެއްގެ ދަރަނި އަނބުރާ ދައްކަން ޖެހޭ އަހަރެއްކަން ވަރަށް ސާފުކޮށް އެނގިވަޑައިގަންނަވާނެ ކަމަށް ރައީސް ނަޝީދު ވިދާޅުވި އެވެ.
ރައީސް ނަޝީދު ވިދާޅުވީ އެއް ބިލިއަން ޑޮލަރަށް ވުރެ ގިނަ ފައިސާ ދަރަނީގެ ގޮތުގައި އަނބުރާ ދައްކަން ޖެހޭކަން 2023 ވަނަ އަހަރު މި ސަރުކާރަށް އޮތީ ވަރަށް ރަނގަޅަށް ސާފުވެފައި ކަމަށެވެ. އަދި މިސަރުކާރަށް ދަރަނި އަލުން އަނބުރާ އެކުލަވާނުލެވުނު ކަމަށާއި 2024 އަދި 2025 ވަނަ އަހަރު ވެސް ސަރުކާރުން ރީސްޓްރަކްޗަރ ކުރަން މަސައްކަތް ކުރި ކަމަށް ރައީސް ނަޝީދު ވިދާޅުވި އެވެ.
އެންމެ ފުރަތަމަ މަސައްކަތް ކުރަމުން ދިޔައީ ނޭޗަރ ސްވޮޕްއެއް ޔޫއެސް ޑިވެލޮޕްމެންޓް ފައިނޭންސް ކޯޕަރޭޝަންނާއި ދި ނޭޗަރ ކޮންޒާވީޓީ ޖީއައިސީއާ މި ދެފެރަތާއި ގުޅިގެން ނޭޗަރ ސްވޮޕެއްގެ މަސައްކަތް ސަރުކާރުން ކުރި އެހެންނަމަވެސް އެބޭފުޅުންގެ ކިބައިގައި އެ ގާބިލުކަން ނެތުމާއި އެބާވަތުގެ ވާހަކައެއް ދައްކާން އެނގިވަޑައިނުގަތުމާއި އަދި ރައީސުލްޖުމްހޫރިއްޔާގެ ވެސް ލީޑަރޝިޕެއް ނެތުމާއިއެކުގައި މި މަސައްކަތް ދިޔައީ ނުކުރެވިމުހައްމަދު ނަޝީދު
އޭގެ ފަހުން ދަރަނީގެ މައްސަލާގައި ސީވީއެފްއިން ދިވެހި ސަރުކާރާއި މުއާމަލާތް ކުރި ކަމަށާއި ނަމަވެސް ސަރުކާރުގެ މިސްރާބެއް ނުވަތަ އަމާޒެއް އަދި ސިޔާސަތެއް ނެތުމުން އެ މަސައްކަތް ވެސް އޮތް ގޮތަށް އޮތީ ކަމަށް ރައީސް ނަޝީދު ވިދާޅުވި އެވެ.
އެހެންކަމުން، ރާއްޖޭގައި ހުރި ހުރިހާ ފައިސާއެއް ދަރަނި އަދާކުރަން ސަރުކާރުން ހޭދަކުރީ ކަމަށް ރައީސް ނަޝީދު ވިދާޅުވި އެވެ. އަދި ޑޮލަރުގެ ތާށިކަން ދިމާވެފައި ވަނީ މިކަމުގެ ސަބަބުން ކަަމަށް ރައީސް ނަޝީދު ވިދާޅުވި އެވެ.
