އަންނަ އަހަރު އައު މަގާމުތައް ނުއުފައްދަން ރައީސް ވަނީ ނިންމަވާފައި: ފިނޭންސް މިނިސްޓަރު
9 ނޮވެމްބަރު 2026 | ހޯމަ 09:35އަންނަ އަހަރުގެ ބަޖެޓުގައި މުސާރައާއި ސަބްސިޑީއަށް ބޮޑު ހޭދައެއް ކަނޑައަޅާފައިވާއިރު، ސަރުކާރުގެ އިދާރާތަކުގެ ހިއުމަން ރިސޯސް އޮޑިޓެއް ހެދުމަށް ފިނޭންސް މިނިސްޓްރީން ވަނީ ނިންމާފައި. މި އޮޑިޓުގެ ބޭނުމަކީ މުވައްޒަފުން ބޭނުންވާ މިންވަރު ދެނެގަނެ، އިތުރުވާ މުވައްޒަފުން ބޭނުންޖެހިފައިވާ އެހެން ދާއިރާތަކަށް ބަދަލުކޮށްގެން ޚަރަދު ކުޑަކުރުން
އަންނަ އަހަރަށް ލަފާކޮށް ސަރުކާރުން ހުށަހެޅި ބަޖެޓާ ބެހޭ ގޮތުން ބަޖެޓު ދިރާސާކުރާ ކޮމިޓީން ބޭއްވި ބައްދަލުވުން | މަޖިލިސް
އަންނަ އަހަރު އައު މަގާމުތައް ނުއުފައްދަން ރައީސް ޑރ. މުހައްމަދު މުއިއްޒު ނިންމަވާފައިވާ ކަމަށް ފިނޭންސް މިނިސްޓަރު ހަސަން ޒަރީރު ހާމަކުރައްވައިފި އެވެ.
އަންނަ އަހަރަށް ލަފާކޮށް ސަރުކާރުން ހުށަހެޅި ބަޖެޓާ ބެހޭ ގޮތުން ބަޖެޓު ދިރާސާކުރާ ކޮމިޓީން ބޭއްވި ބައްދަލުވުމުގައި މިނިސްޓަރު ހަސަން ޒަރީރު ވިދާޅުވީ، އަންނަ އަހަރު އައު މަގާމުތައް ނުއުފައްދަން ރައީސް ނިންމަވާފައިވާ ކަމަށާއި، ހަމައެއާ އެކު ރިޕްލޭސްމަންޓު ވެސް ހަމައެކަނި ކޮންމެހެން ބޭނުންވާ މަގާމުތަކަށް އެކަނި ނެގުމަށް ނިންމަވާފައިވާ ކަމަށެވެ.
އަންނަ އަހަރަށް ލަފާކުރާ ބަޖެޓުގައި މުސާރައާއި ދޭންޖެހޭ އިނާޔަތްތައް ދިނުމަށް 17.1 ބިލިއަން ރުފިޔާ ހިމެނޭ ކަމަށް މިނިސްޓަރު ހާމަކުރެއްވި އެވެ. އަދި ހަމަ އެއާއެކު ގާތްގަނޑަކަށް 13 ބިލިއަން ރުފިޔާ ސަބްސިޑީގެ ގޮތުގައި ހަރަދުވާނެ ކަމަށް ލަފާކޮށްފައިވާ ކަމަށް މިނިސްޓަރު ވިދާޅުވި އެވެ.
ސަރުކާރުގެ މުއައްސަސާތަކުގައި މިހާރު މުވައްޒަފުން ހުރީ ކޮންމެހެން ބޭނުންވާ ވަރަށްތޯ ބެލުމަށްޓަކައި ފިނޭންސް މިނިސްޓްރީ އާއި ޕޭ ކޮމިޝަން ގުޅިގެން އެޗްއާރު އޮޑިޓެއް ކުރުމަށް ވިސްނަވާފައިވާ ކަމަށް ވެސް މިނިސްޓަރު ހާމަކުރެއްވި އެވެ.
އެޗްއާރު އޮޑިޓުގެ ތެރެއިން މުވައްޒަފުން ބޭނުންވާ މިންވަރު ދެނެގަނެ، ބޭނުންވާ ވަރަށް ވަރަށް ގިނައިން މުވައްޒަފުން ތިބި ނަމަ، މުވައްޒަފުން ބޭނުންވާ އެހެން ދިމާލަކަށް ބަދަލުކުރާނެ ކަމަށް މިނިސްޓަރު ވިދާޅުވި އެވެ.
ބަޖެޓު ދިރާސާކުރާ ކޮމިޓީން ބޭއްވި މި ބައްދަލުވުމަށް ފިނޭންސް މިނިސްޓްރީގެ އިސް ބޭފުޅުން ވަނީ ހާޒިރުކޮށްފަ އެވެ. މި ބައްދަލުވުމުގައި އަންނަ އަހަރަށް ލަފާކޮށް ސަރުކާރުން ހުށަހެޅި ބަޖެޓާ ބެހޭ ގޮތުން މަޝްވަރާ ކުރެވިފައިވެ އެވެ.
ސަރުކާރުން އަންނަ އަހަރަށް ލަފާކޮށްފައިވާ ބަޖެޓުގައި މުސާރައާއި ސަބްސިޑީއަށް ހަރަދުކުރާ އަދަދުތަކަށް ބަލާއިރު، އަންނަ އަހަރު މިއަހަރަށްވުރެ ވެސް މުސާރައާއި އިނާޔަތްތަކަށް ކުރާ ހޭދަ ބޮޑެވެ.
