ބަޖެޓް 2027: ބަޖެޓުގެ މަސައްކަތްތައް 2 ހަފްތާ ތެރޭގައި ނިންމުމަށް ފާސްކޮށްފި
5 ނޮވެމްބަރު 2026 | ބުރާސްފަތި 12:52އަންނަ އަހަރަށް ލަފާކުރާ 56.7 ބިލިއަން ރުފިޔާގެ ބަޖެޓު ދިރާސާކުރުމަށް ފިނޭންސް މިނިސްޓްރީ އާއި މިނިވަން މުއައްސަސާތަކާ ބައްދަލުކުރުމަށް ބަޖެޓު ކޮމިޓީން ވަނީ ނިންމާފައި. މި ބަޖެޓުގެ ބޮޑު ބައެއް ރިކަރަންޓް ޚަރަދަށް ކަނޑައަޅާފައިވާއިރު، ޕީއެސްއައިޕީ މަޝްރޫއުތަކަށް 8.2 ބިލިއަން ރުފިޔާ ޚަރަދުކުރުމަށް ވަނީ ހިމަނާފައި
ބަޖެޓް ދިރާސާކުރާ ކޮމިޓީއިން ބޭއްވި ފުރަތަމަ ބައްދަލުވުމުގެ ތެރެއިން | ރައްޔިތުންގެ މަޖިލިސް
2027 ވަނަ އަހަރަށް ލަފާކޮށް ދައުލަތުން ހުށަހަޅާފައިވާ ބަޖެޓް ނޮވެންބަރު މަހުގެ 19 ގެ ކުރިން ނިންމުމަށް ފާސްކޮށްފި އެވެ.
މި ނިންމުން ފާސްކޮށްފައިވަނީ ބުރާސްފަތި ދުވަހު ބަޖެޓް ދިރާސާކުރާ ކޮމިޓީއިން ބޭއްވި ބައްދަލުވުމުގަ އެވެ. އެގޮތުން އެ ކޮމިޓީއިން ވަނީ ބަޖެޓާ ގުޅޭ ގޮތުން ފިނޭންސް މިނިސްޓްރީ ހާޒިރުކުރާން ނޮވެންބަރު 9 ވަނަ ދުވަސް ކަނޑައަޅާފަ އެވެ.
ނަމަވެސް ރައްޔިތުންގެ މަޖިލީހުގެ ގަވާއިދުގައިވާ ގޮތުގެ މަތިން މޯލްޑިވްސް މޮނިޓަރީ އޮތޯރިޓީ (އެމްއެމްއޭ) އަދި އޮޑިޓަރ ޖެނެރަލްއާއި ބައްދަލުކޮށް، ބަޖެޓާ މެދު ހިޔާލު ހޯދުމަށް މަޖިލީހަށް ހާޒިރު ކުރާނެ ދުވަހެއް ކަނޑައަޅާފައި ނުވެ އެވެ.
ހަމައެއާއެކު، ފުނަދޫ ދާއިރާގެ މެންބަރު މުހައްމަދު މަމްދޫހު ވަނީ މިނިވަން މުއައްސަސާތަކާއި ބައްދަލުނުކޮށް ހަމައެކަނި ލިޔުމުން ހިޔާލު ހޯދުމަށް ހުށަހަޅާފަ އެވެ. އަދި އެ ކޮމިޓީއިން ވަނީ އެ ހުށަހެޅުން ފާސްކޮށްފަ އެވެ. ނަމަވެސް އެކަމާ ގުޅޭ ގޮތުން ކަންބޮޑުވުން ފާޅުކޮށް ހިތަދޫ ދެކުނު ދާއިރާގެ އެމްޑީޕީ މެންބަރު އިބްރާހީމް ނާޒިލް ވަނީ މިނިވަން މުއައްސަސާތައް ކޮމިޓީއަށް ހާޒިރުވެ ހިޔާލު ހުށަހެޅުމުގެ ފުރުސަތު ދިނުމަށް ހުށަަހަޅާފަ އެވެ.
އެހެންކަމުން ކޮމިޓީއިން ވަނީ މެންބަރު ނާޒިލްގެ ހުށަހެޅުމަށް ވެސް ތާއިދުކޮށްފަ އެވެ.
ސަރުކާރުން ކަނޑައަޅާފައިވާ އަމާޒުތަކަށް ވާސިލުވުމަށްޓަކައި 2027 ވަނަ އަހަރަށް އަމާޒުކޮށް ސަރުކާރުން ރައްޔިތުންގެ މަޖިލީހަށް ވަނީ 59،704،440،795 (ފަންސާސް ނުވަ ބިލިއަން، ހަތްސަތޭކަ ހަތަރު މިލިއަން، ހަތަރުލައްކަ ސާޅީސްހާސް، ހަތްސަތޭކަ ނުވަދިހަ ފަސް ) ރުފިޔާގެ ބަޖެޓެއް ހުށަހަޅާފަ އެވެ.
ހުށަހަޅާފައިވާ ބަޖެޓުގެ ތެރެއިން ދައުލަތުގެ ޖުމުލަ ޚަރަދުގެ ގޮތުގައި 52.6 ބިލިއަން ރުފިޔާ ހިނގާނެކަމަށް ފިނޭންސް މިނިސްޓަރު ހަސަން ޒަރީރު ވިދާޅުވި އެވެ. އޭގެ ތެރެއިން 42.7 ބިލިއަން ރުފިޔާއަކީ ރިކަރަންޓު ޚަރަދު ނުވަތަ ހިންގުމުގެ ޚަރަދު ކަމަށާއި، އަދި ތަރައްޤީގެ މަޝްރޫއުތަކާ އިންވެސްޓްމަންޓު ހިމެނޭ ކެޕިޓަލް ޚަރަދުގެ ގޮތުގައި 9.9 ބިލިއަން ރުފިޔާ ހިމަނާފައިވާނެ ކަމަށް ވިދާޅުވި އެވެ.
ކެޕިޓަލް ޚަރަދުގެ ތެރޭގައި ޕީއެސްއައިޕީ މަޝްރޫއުތަކަށް ކަނޑައަޅާފައިވާ 8.2 ބިލިއަން ރުފިޔާ ހިމެނޭކަމަށް ވެސް މިނިސްޓަރު ޒަރީރު ވިދާޅުވި އެވެ.
