ރާއްޖޭގެ އިގްތިސާދީ ހާލަތު މިހާ ދަށު ދަރަޖައަކަށް ވެއްޓިގެން ދިޔަ ޒަމާނެއް ދިވެހީން މިހާތަނަށް ދެކެފައި ނުވޭ: އަމީތު
5 ނޮވެމްބަރު 2026 | ބުރާސްފަތި 08:13ރާއްޖޭގެ އިގްތިސާދު ފުން އަނދަވަޅަކަށް ވެއްޓި، ތަކެތީގެ އަގު އުފުލުމުގެ ސަބަބުން އާންމުންނަށް ބޮޑެތި ދަތިތަކެއް ކުރިމަތިވަމުންދާ ކަމަށް ކުރީގެ މެންބަރު އަމީތު ވިދާޅުވި. އަދި ޑޮލަރު މާރުކުރުމުގެ ގަވާއިދުގެ ސަބަބުން ރިސޯޓު މުވައްޒަފުންގެ އާމްދަނީއަށް ނޭދެވޭ އަސަރުކުރަމުންދާތީ، އިގްތިސާދީ ވަޒީރު އިސްތިއުފާ ދެއްވަން ޖެހޭ ކަމަށް އޭނާ ވިދާޅުވި
ރާއްޖެޓީވީގެ ފަލަސުރުހީ ޕްރޮގްރާމްގައި ރައްޔިތުންގެ މަޖިލީހުގެ މަޑުއްވަރީ ދާއިރާގެ ކުރީގެ މެންބަރު މުހައްމަދު އަމީތު ވާހަކަ ދައްކަވަނީ | ރާއްޖެއެމްވީ
ރާއްޖޭގެ އިގްތިސާދީ ހާލަތު މިހާ ދަށު ދަރަޖައަކަށް ވެއްޓިގެން ދިޔަ ޒަމާނެއް ދިވެހީން ދެކެފައި ނުވާ ކަމަށާއި، މި ހާލަތުން އަރައިގަތުމަށް ސަރުކާރު ނުކުޅެދިފައިވާ ކަމަށް ރައްޔިތުންގެ މަޖިލީހުގެ މަޑުއްވަރީ ދާއިރާގެ ކުރީގެ މެންބަރު މުހައްމަދު އަމީތު ވިދާޅުވެއްޖެ އެވެ.
ރާއްޖެޓީވީގެ ފަލަސުރުޚީ ޕްރޮގްރާމްގައި ވާހަކަދައްކަވަމުން އަމީތު ވިދާޅުވީ، ރާއްޖޭގެ އިގްތިސާދު މިއިން ދުވަހަކު ނުވެއްޓޭހާ ފުން އަނދަވަޅަކަށް ވެއްޓިފައިވާ ކަމަށެވެ.
ރާއްޖޭގެ އިގްތިސާދީ ހާލަތު މި ދަރަޖައަށް ދިޔަ ޒަމާނެއް އަޅުގަނޑުމެން ދިވެހީން ދެކެފައެއް ނުވޭ. ރައްޔިތު މީހާ މި ދަރަޖައަށް ނިކަމެތިވެގެން ދިޔަ ޒަމާނެއް އަޅުގަނޑުމެން ދެކެފައެއް ނެތް. ތަކެތީގެ އަގު މި ދަރަޖައަށް އުފުލިގެން ދިޔަ ޒަމާނެއް އަޅުގަނޑުމެން ދެކެފައެއް ނެތް. ޑޮލަރު މާރުކުރުމުގެ ނަމުގައި ގާނޫނުތައް ހަދައިގެން ވިޔަފާރިވެރިން އޮބަހައްޓައިގެން ގަދަ ބާރުން ވިޔަފާރިވެރިން ލައްވާ ޑޮލަރު މާރުކުރުވައިގެން ވެސް ހައްލެއް ނައީމުހައްމަދު އަމީތު
އޭގެ ނޭދެވޭ އަސަރު ސީދާ އާންމު ރައްޔިތުންނަށް ކުރަމުންދާކަން ފާހަގަކުރައްވައި އަމީތު ވިދާޅުވީ، ރިސޯޓުތަކުގައި މަސައްކަތްކުރާ މުވައްޒަފުންގެ މުސާރައިން ބޮޑުބައެއް އުނިވެގެން ގޮސްފައިވާ ކަމަށެވެ.
އެގޮތުން ކުރިން ޑޮލަރުން ދެމުން އައި މުސާރަ ރުފިޔާއަށް ބަދަލުކުރަން ގިނަ ރިސޯޓުތަކަށް މަޖުބޫރުވެފައިވާ ކަމަށާއި، ނަތީޖާއެއްގެ ގޮތުން މުވައްޒަފުން ގެއަށް ގެންދަން ލިބޭ އާމްދަނީން ވަރަށް ބޮޑު އަދަދެއް މަދުވެ، އެ ދަތިކަން އާދައިގެ އާއިލާތަކުން ތަހައްމަލުކުރަން ޖެހިފައިވާ ކަމަށް ވިދާޅުވި އެވެ.
އިގްތިސާދީ ހާލަތަށް އިޝާރާތް ކުރައްވައި އަމީތު ވިދާޅުވީ، ރައްޔިތުންގެ މަޖިލީހުން އިތުބާރު ނެތްކަމުގެ ވޯޓަކާ ހަމައަށް ދިއުމުގެ ކުރިން އިގްތިސާދީ ވަޒީރު އިސްތިއުފާ ދެއްވަންޖެހޭ ކަމަށެވެ. ނަމަވެސް އެއާ ޚިލާފަށް ސަރުކާރުން އަދިވެސް ދައްކަނީ އިގްތިސާދު ރަނގަޅަށް މެނޭޖުކުރަމުންދާ ކަމުގެ ވާހަކަތައް ކަމަށާއި، ސަރުކާރުގެ ބަހާއި އަމަލާ އެއްގޮތަކަށް ވެސް ދިމާނުވާ ކަމަށް އޭނާ ވިދާޅުވި އެވެ.
މީގެ އިތުރުން، މިފަދަ ހާލަތެއްގައި އެމްޑީޕީން އަދާކުރަންޖެހޭ ގާނޫނީ ޒިންމާ އަދާކޮށްފައިވާ ކަމަށާއި، އެ ޕާޓީގެ ޕާލަމެންޓްރީ ގްރޫޕުގެ މެންބަރުން ރައްޔިތުންގެ ހައްގުގައި ކޮށްދެއްވީ ވަރަށް މުހިންމު މަސައްކަތެއް ކަމަށް ވެސް އަމީތު ވިދާޅުވި އެވެ.
