"ކުލަ ހެދުމުގައި" ތިބޭ އިސްރާއީލު ސިފައިން ވެސް ޓެރެރިސްޓު ވަޒަންވެރިންގެ ޖަރީމާތަކުގައި ބައިވެރިވޭ: ތަހުގީގު

ހުޅަނގު އައްސޭރީގައި ފަލަސްޠީނުގެ ރައްޔިތުންނާ ދެކޮޅަށް ލާއިންސާނީ ޖަރީމާތައް ހިންގަމުންދާ ޔަހޫދީ ޓެރެރިސްޓު ވަޒަންވެރިންނާ ގުޅިގެން "ކުލަ ހެދުމުގައި" ނުވަަތަ އާދައިގެ ހެދުމުގައި ތިބޭ އިސްރާއީލުގެ ސިފައިން ބައިވެރިވެ، ގުޅިގެން ހަރަކާތްތެރިވަމުންދާ ކަން ހޯމަ ދުވަހު އާންމުކުރި ތަހުގީގީ ރިޕޯޓަކުން ހާމަވެއްޖެ އެވެ. މި ކަން ހާމަވެފައި މި ވަނީ އަލް ޖަޒީރާއިން ހިންގި ތަހުގީގީ ރިޕޯޓަކުންނެވެ.

މި ގޮތުން، ފަލަސްޠީނުގެ 14 މީހަކު ޝަހީދުކޮށްލުމުގައި ބައިވެރިވި ޓެރެރިސްޓު ވަޒަންވެރިންނަކީ އަސްކަރިއްޔާގައި ޚިދުމަތްކުރަމުންދާ ސިފައިން ކަމާއި، އެ ޖަރީމާތައް ހިންގި ވަގުތު އޭގެ ތެރެއިން ބައެއް މީހުން ތިބީ އަސްކަރީ ޔުނިފޯމުގައި ކަން ލިޔެކިޔުންތަކުން ސާބިތުވާ ކަމަށް އެ ރިޕޯޓުގައި ބުނެފައިވެ އެވެ. އާދައިގެ އާންމު ހެދުމުގައި ތިބެ ފަލަސްޠީނުގެ އަވަށްތަކަށް ދޭ ހަމަލާތަކުގައި ސިފައިން ބައިވެރިވާތީ، ހަތިޔާރުއެޅި ޓެރެރިސްޓު ވަޒަންވެރިންނާއި ސިފައިން ވަކިކޮށް ދެނެގަތުމަށް ބޮޑެތި ހުރަސްތަކެއް ކުރިމަތިވާ ކަމަށް ވެސް އެ ތަހުގީގުން ވަނީ ފާހަގަކޮށްފަ އެވެ.

Advertisement

މި ތަހުގީގު މައިގަނޑު ގޮތެއްގައި އަލިއަޅުވާލާފައި ވަނީ އިސްރާއީލު އަސްކަރިއްޔާގެ ސަރަހައްދީ ދިފާޢީ ޔުނިޓެއް ކަމަށްވާ 'ހަގްމާރް' އަށެވެ. އިސްތިއުމާރީ ޓެރެރިސްޓު ވަޒަންވެރިން ރިޒާވިސްޓުންގެ ގޮތުގައި ވައްދާ މި ޔުނިޓުގެ ސަފުތައް 2023 ވަނަ އަހަރުން ފެށިގެން ހަ ގުނައަށް އިތުރުވެފައިވާއިރު، ޤާނޫނާ ޚިލާފަށް ހަދާފައިވާ އާބާދީތައް ބެލެހެއްޓުމުގެ ބަދަލުގައި އެ ޔުނިޓުގެ ދައުރު މިހާރު ވަނީ ފަލަސްޠީނުގެ މުޖުތަމަޢުތަކަށް ސީދާ ހަމަލާދިނުމަށް ވާގިވެރިވުމަށް ބަދަލުވެފައި ކަމަށް އެ ރިޕޯޓުގައި ބަޔާންކޮށްފައިވެ އެވެ. ހަމަމިއާއެކު، އަސްކަރީ ޚިދުމަތުގެ ސަބަބުން، ފަލަސްޠީނު މީހުންނާ ގުޅޭ ނާޒުކު މަޢުލޫމާތުތަކާއި، ހުއްދަ އޮންނަ ހަތިޔާރުގެ އިތުރުން ގަވާއިދުން ދެވޭ އަސްކަރީ ތަމްރީނުތައް ހޯދުމުގެ ފުރުސަތު އިސްތިއުމާރީ ޓެރެރިސްޓު ވަޒަންވެރިންނަށް ލިބިގެންދާ ކަމަށް މަޢުލޫމާތު އިނގޭ އިތުބާރުހުރި މަސްދަރުތަކާ ހަވާލާދީ އެ ރިޕޯޓުގައި ބުންޏެވެ.

އެ ރިޕޯޓުގައި ފާހަގަކޮށްފައިވާ އެއް ހާދިސާއަކީ، ހުޅަނގު އައްސޭރީގެ ދެކުނުގައި އޮންނަ އަލް-ޚަލީލް ގެ ދަނޑުބިމެއްގައި ފަލަސްޠީނު މީހަކު ބަޑިޖަހައި ޝަހީދުކޮށްލި މައްސަލަ އެވެ. އެ މީހާ ޝަހީދުކޮށްލުމުގައި ކުލަ ހެދުމުގައި ހުރި އިސްރާއީލު ސިފައިންގެ މީހެއްގެ ސީދާ ބައިވެރިވުން އޮތްކަން ހާމަވެފައިވާ ކަމަށް ތަހުގީގީ ރިޕޯޓުގައި ބުނެފައިވެ އެވެ. އެ ސިފައިންގެ މީހަކީ އިސްތިއުމާރީ ޓެރެރިސްޓު ވަޒަންވެރިންގެ ޖަމާޢަތްތަކުގައި ހަރަކާތްތެރިވާ އެކްޓިވިސްޓެއް ކަމަށާއި، 2024 ވަނަ އަހަރު އެމެރިކާއިން އޭނާއާ ދެކޮޅަށް ދަތިކުރުމުގެ ފިޔަވަޅު އެޅުމަށްފަހު ފަހުން އެ ފިޔަވަޅުތައް އުވާލާފައިވާ ކަމަށް ބަޔާންކޮށްފައިވީ ނަމަވެސް، އޭނާގެ ނަން އެ ރިޕޯޓުގައި ހާމަކޮށްފައެއް ނުވެ އެވެ. މިއާއެކު، ނާބުލުސްގައި ޒައިތޫނި ހައްދާ ފަލަސްޠީނުގެ ދަނޑުވެރިންނަށް އާންމު ހެދުމުގައި ހުރި އެހެން ސިފައިންގެ މީހަކު އަނިޔާކުރާ މަންޒަރު ފެންނަ ވީޑިއޯ އަދި ފޮޓޯތަކެއް ވެސް އެ ތަހުގީގުގައި ވަނީ ދައްކާލާފަ އެވެ.

މި ހޯދުންތައް ފެންމަތިވެފައި މި ވަނީ، އިރުމަތީ ޤުދުސް ހިމެނޭހެން އިސްތިއުމާރު ކޮށްފައިވާ ހުޅަނގު އައްސޭރީގެ އެކި ސަރަހައްދުތަކުގައި ފަލަސްޠީނުގެ ރައްޔިތުންނަށާއި އެ މީހުންގެ މުދަލަށް ދޭ ހަމަލާތައް އިންތިހާއަށް އިތުރުވަމުންދާ ދަނޑިވަޅެއްގަ އެވެ. މި ގޮތުން، ނިމިދިޔަ އޮކްޓޫބަރު މަހު އެކަނި ވެސް އިސްތިއުމާރީ ޓެރެރިސްޓު ވަޒަންވެރިންގެ ފަރާތުން 1،369 ހަމަލާއެއް ދީފައިވާ ކަމަށް، ފަލަސްޠީނުގެ ވޯލް އެންޑް ސެޓްލްމަންޓް ރެސިސްޓެންސް ކޮމިޝަނުން ވަނީ ރެކޯޑުކޮށްފަ އެވެ. އަދި، 2023 އޮކްޓޫބަރު މަހުން ފެށިގެން 2026 ޖޫން މަހުގެ ނިޔަލަށް އިސްތިއުމާރީ ޓެރެރިސްޓުންގެ 12،506 ހަމަލާ ރެކޯޑުކުރެވިފައިވާއިރު، އެ ހަމަލާތަކުގައި ފަލަސްޠީނުގެ 52 މީހަކު ޝަހީދުކޮށްލައި، ފަލަސްޠީނު މީހުންގެ މުދަލާއި ދަނޑުބިންތަކުގައި 890 އަލިފާނުގެ ހާދިސާ ހިންގާފައިވާ ކަމަށް އެ ކޮމިޝަނުން ހާމަކުރެ އެވެ.