ޓްރަމްޕް ފެށްޓެވި ޣައިރުޤާނޫނީ ހަނގުރާމަ ހުއްޓުވުމަށް މިޞްރާއި އީރާނުގެ ޚާރިޖީ ވަޒީރުން މަޝްވަރާކުރައްވައިފި
7 ނޮވެމްބަރު 2026 | ހޮނިހިރު 02:36އީރާނާއި އެމެރިކާގެ މަސްރަހު ފިނިކުރުމަށް މިޞްރުން އިސްނަގައިގެން ކުރިއަށްގެންދާ ޚާރިޖީ މަސައްކަތްތަކުގެ ތެރެއިން، ދެ ޤައުމުގެ ޚާރިޖީ ވަޒީރުން ވަނީ ސަރަހައްދީ ހަމަޖެހުން ގާއިމުކުރުމަށް ފުޅާ ދާއިރާއެއްގައި މަޝްވަރާކުރައްވާފައި. މި މަޝްވަރާތަކުގައި އަސްކަރީ ކުރިމަތިލުންތައް ހުއްޓުވައި ސިޔާސީ ހައްލެއް ހޯދުމަށް ބާރުއެޅުއްވި ނަމަވެސް، ދަތިކުރުމުގެ ފިޔަވަޅުތަކާއި ނިއުކްލިއަރ މައްސަލައިގައި ދެ ފަރާތުގެ މެދުގައި ބޮޑެތި ޚިޔާލުތަފާތުވުންތަކެއް އެބަހުރި
މިޞްރުގެ ޚާރިޖީ ވަޒީރު ބަދްރު ޢަބްދުލްޢާޠީއާއި އީރާނުގެ ޚާރިޖީ ވަޒީރު ޢައްބާސް ޢަރާޤްޗީ ސަރަހައްދީ ސަލާމަތާއި ހަމަޖެހުމާ ގުޅޭ ގޮތުން މަޝްވަރާ ކުރައްވަނީ | އަނަދޮލު އޭޖެންސީ
ވޮޝިންގޓަނާއި ތެހެރާނާ ދެމެދު އަސްކަރީ ކުރިމަތިލުމެއް އަލުން ފެށުނަ ނުދިނުމަށާއި، މެދުއިރުމަތީގެ ސަރަހައްދީ ނުތަނަވަސްކަން ކޮންޓުރޯލު ކުރުމަށް ކުރެވެމުންދާ މަސައްކަތްތަކާ ގުޅޭ ގޮތުން މިޞްރުގެ ޚާރިޖީ ވަޒީރު ބަދްރު ޢަބްދުލްޢާޠީއާއި އީރާނުގެ ޚާރިޖީ ވަޒީރު ޢައްބާސް ޢަރާޤްޗީ ފޯނުން ގުޅުއްވައި މަޝްވަރާކުރައްވައިފި އެވެ.
މިއީ، އެމެރިކާއާއި އީރާނާ ދެމެދު އުފެދިފައިވާ ނުތަނަވަސްކަން ފިނިކޮށް، ދެ ޤައުމުގެ ދެމެދުގައި މަޝްވަރާތައް އަލުން ފެށުމަށް ސަރަހައްދީ ފެންވަރުގައި ކުރިއަށްދާ ޚާރިޖީ މަސައްކަތްތަކުގެ ތެރެއިން، މި ހަފުތާގެ އަންގާރަ ދުވަހަށްފަހު މި ދެ ބޭފުޅުން ފޯނުން ވާހަކަފުޅު ދެއްކެވި ދެވަނަ ފަހަރެވެ. މި މަޝްވަރާތައް ބޭއްވުނު ކަމަށް މިޞްރުގެ ޚާރިޖީ ވުޒާރާއިން ބުނީ ހުކުރު ދުވަހު އެވެ.
"ދެ ވަޒީރުން މަޝްވަރާކުރެއްވީ ސަރަހައްދީ މަސްރަހަށް އަންނަމުންދާ އެންމެ ފަހުގެ ބަދަލުތަކާއި، މިހާރު އުފެދިފައިވާ ނުތަނަވަސްކަން ކޮންޓުރޯލު ކުރުމަށް ކުރެވެމުންދާ މަސައްކަތްތަކާ ގުޅޭ ގޮތުން،" މިޞްރުގެ ޚާރިޖީ ވުޒާރާއިން ބުންޏެވެ. ހަމަމިއާއެކު، ދެ ޤައުމުގެ ދެމެދުގައި އަލުން އަސްކަރީ ކުރިމަތިލުމެއް ހިނގައިދާނެ ކަމުގެ ބިރުވެރިކަމާއި، އޭގެ ސަބަބުން ސަރަހައްދީ އަދި ބައިނަލްއަގުވާމީ ސަލާމަތާއި ހަމަޖެހުމަށް ކޮށްފާނެ ނޭދެވޭ އަސަރުތަކާމެދު ވެސް ދެ ވަޒީރުން ފުޅާ ދާއިރާއެއްގައި ޚިޔާލު ބަދަލުކުރެއްވި ކަން އެ ވުޒާރާއިން ފާހަގަކުރި އެވެ.
ޚާރިޖީ ހައްލުތައް އިސްކުރުމާއި ދޫދިނުމުގެ މުހިންމު ކަން
މި މައްސަލައަށް ސިޔާސީ ހައްލެއް ހޯދުމަށް ޓަކައި "ޚާރިޖީ ހައްލުތަކަށް އިސްކަންދިނުމުގެ" މުހިންމު ކަން މިޞްރުގެ ޚާރިޖީ ވަޒީރު ޢަބްދުލްޢާޠީ ވަނީ ފާހަގަކުރައްވާފަ އެވެ. ސަރަހައްދު "ނުތަނަވަސްކަމުގެ އައު ރާޅެއްގެ ތެރެއަށް ވެއްޓުނަ" ނުދިނުމަށާއި، ހުރިހާ ފަރާތްތަކެއްގެ މަސްލަހަތުތައް ރައްކާތެރިވާނެ ފަދަ އެކަށީގެންވާ ދޫދިނުންތަކާއި ލުއިގޮތްތައް އިޚުތިޔާރުކުރުމަށް ވެސް އޭނާ ބާރުއެޅުއްވި އެވެ.
ނިމިދިޔަ ހަފުތާގެ އަންގާރަ ދުވަހު ބޭއްވި ފޯނު ކޯލުގައި ވެސް ދެ ވަޒީރުން ވަނީ ސަރަހައްދީ މަސްރަހާއި، ނުތަނަވަސްކަން ކުޑަކުރުމުގެ މަސައްކަތްތަކާއި، އަދި ވާހަކަތަކަށް އަލުން ރުޖޫޢަވުމާ ގުޅޭ ގޮތުން މަޝްވަރާކުރައްވާފަ އެވެ. މި އެންމެ ފަހުގެ މުއާމަލާތަކީ، ވޮޝިންގޓަނާއި ތެހެރާނާ ދެމެދު އޮތް ނުތަނަވަސްކަން ކޮންޓުރޯލުކޮށް، އަލުން ހަނގުރާމައެއް ފެށުނަނުދިނުމަށް ސަރަހައްދީ ފެންވަރުގައި ކުރިއަށްދާ ޚާރިޖީ މަސައްކަތްތަކުގެ ތެރެއިން އެޅުނު މުހިންމު ފިޔަވަޅެކެވެ.
މަޝްވަރާތައް ހުއްޓުމަކަށް އައުމާއި ހަނގުރާމައިގެ ފަސްމަންޒަރު
މަޝްވަރާތައް އަލުން ފެށުމުގެ ޝަރުތެއްގެ ގޮތުން ވޮޝިންގޓަނުން އެދެމުން ދަނީ އީރާނުގެ ނިއުކްލިއަރ ޕުރޮގުރާމަށް ބޮޑެތި ދޫދިނުންތަކެއް ދިނުމަށެވެ. މިއާ ޚިލާފަށް ތެހެރާނުން ޝަރުތުކުރަނީ އެމެރިކާއިން އަޅާފައިވާ ދަތިކުރުމުގެ ފިޔަވަޅުތައް އުވާލުމަށާއި، ފްރީޒްކޮށްފައިވާ އީރާނުގެ ފައިސާ ދޫކޮށްލުމަށާއި، އަދި އެ ޤައުމަށް ތެޔޮ އެކްސްޕޯޓް ކުރުމުގެ ހުއްދަ ދިނުމަށެވެ.
ޔަހޫދީ އިސްރާއީލާ ގުޅިގެން އެމެރިކާގެ ރައީސް ޑޮނަލްޓް ޓްރަމްޕް އީރާނާ ދެކޮޅަށް ޣައިރުޤާނޫނީ ހަނގުރާމައެއް ފަށްޓަވާފައި ވަނީ ފެބުރުވަރީ 28 ގަ އެވެ. އެ ދުވަހު ފެށި އުދުވާނީ ހަމަލާތަކަށްފަހު އެޕްރީލު މަހު ހަނގުރާމަ ހުއްޓާލުމުގެ އެއްބަސްވުމަކަށް އާދެވުނު ނަމަވެސް، ފުޅާ ދާއިރާއެއްގައި ސުލްހަ ގާއިމުކުރުމަށް ކުރެވުނު މަސައްކަތްތައް ހުއްޓުމަކަށް އައުމާ ގުޅިގެން، ޖުލައި މަހު ވޮޝިންގޓަނާއި ތެހެރާނާ ދެމެދު އަސްކަރީ ކުރިމަތިލުންތައް ވަނީ އަލުން ފެށިފަ އެވެ. ޔަހޫދީ އިސްރާއީލުން މިހާރު ވެސް ދަނީ އީރާނާ ދެކޮޅަށް އަލުން ހަނގުރާމަ ފެށުމަށް ވޮޝިންގޓަނަށް ބާރު އަޅަމުންނެވެ.
މަސްދަރު: އަނަދޮލު އޭޖެންސީ
