ޔަހޫދީ ޓެރަރިސްޓު ވަޒަންވެރިން ހިންގާ ޖަރީމާތަކަށް ޖަވާބުދާރީވާން އދ. އިން ގޮވާލައިފި
6 ނޮވެމްބަރު 2026 | ހުކުރު 04:30ހުޅަނގު އައްސޭރީގައި ޒައިތޫނި ބިންނަ މޫސުމާ ދިމާކޮށް ޔަހޫދީން ދެމުންދާ ހަމަލާތައް ރެކޯޑު މިންވަރަކަށް އިތުރުވެފައިވާތީ އެ ކަން އދ. އިން ކުށްވެރިކޮށްފި. މި އަހަރުގެ ސެޕްޓެމްބަރުން ފެށިގެން 377 އަށްވުރެ ގިނަ ހަމަލާދީ ފަލަސްތީނުގެ އެތައް ބަޔަކު ޒަޚަމުކޮށްލާފައިވާއިރު، މި އަމަލުތައް ހިންގާ ފަރާތްތައް އިންސާފުގެ ކުރިމައްޗަށް ގެނައުމަށް އދ. އިން ވަނީ ގޮވާލާފައި
އިސްތިއުމާރު ކޮށްފައިވާ ހުޅަނގު އައްސޭރީގައި ޔަހޫދީ އިސްރާއީުގެ ސިފައިން ޓެރެރިސްޓު ވަޒަންވެރިންނަށް ހިމާޔަތްދެނީ | އަނަދޮލު އޭޖެންސީ
ޔަހޫދީ އިސްރާއީލުން ޣައިރުޤާނޫނީ ގޮތުގައި އިސްތިއުމާރު ކޮށްފައިވާ ހުޅަނގު އައްސޭރީގެ އަރީޙާގެ ކައިރީގައި ހުރި ފަލަސްތީނުގެ ރައްޔިތުންގެ ގެދޮރުތަކަށް ޔަހޫދީ ޓެރަރިސްޓު ވަޒަންވެރިން ގަދަކަމުން ވެރިވެގަނެ، ގިނަ އަަދަދެއްގެ ފަލަސްތީނު ރައްޔިތުންނެއް މަގުމަތިކޮށްލި މައްސަލަ އދ. އިން ބުރާސްފަތި ދުވަހު އެންމެ ހަރުކަށި އިބާރާތުން ކުށްވެރިކޮށްފި އެވެ.
ނޫސްވެރިންނާ ބައްދަލުކުރައްވައި ވާހަކަފުޅު ދައްކަވަމުން އދ. ގެ ސެކްރެޓަރީ ޖެނެރަލްގެ ތަރުޖަމާނު ސްޓިފާން ދުޜާރީކް ވިދާޅުވީ، ޔަހޫދީ ޓެރަރިސްޓު ވަޒަންވެރިން ވަނީ އަސްލު ވަޒަން ބޭނުންކޮށްގެން ހަމަލާދީ، ފަލަސްތީނުގެ ރައްޔިތުންގެ ގައިގައި ތަޅައި އަނިޔާކޮށް، ބައެއް މީހުން ޒަޚަމުކޮށްލާފައި ކަމަށެވެ. މިއާއެކު، އިސްރާއީލުގެ އަސްކަރިއްޔާއިން އެ ސަރަހައްދަކީ ބަންދުކުރެވިފައިވާ އަސްކަރީ ސަރަހައްދެއްގެ ގޮތުގައި ކަނޑައަޅައި، "ގެއްލުން ލިބުނު ފަރާތްތަކުގެ ގާތަށް އަޅުގަނޑުމެންގެ އިންސާނީ އެހީތެރިކަން ފޯރުކޮށްދޭ ބައިވެރިން ޒިޔާރަތްކުރުމަށް ވަނީ ހުރަސްއަޅާފައި" ކަމަށް ދުޜާރީކް ބަޔާންކުރެއްވި އެވެ.
"ޔަހޫދީ ޓެރަރިސްޓު ވަޒަންވެރިން ހިންގާ އަނިޔާވެރި މި ފަދަ ހުރިހާ އަމަލުތަކެއް އަޅުގަނޑުމެން އަނެއްކާ ވެސް އެންމެ ހަރުކަށި އިބާރާތުން ކުށްވެރިކުރަން،" ދުޜާރީކް ވިދާޅުވި އެވެ.
ޒައިތޫނި މޫސުމުގައި ހިންގާ އުދުވާން ރެކޯޑު މިންވަރަކަށް
ފަލަސްޠީނުގެ ރައްޔިތުން ޒައިތޫނި ބިންނަ މޫސުމާ ދިމާކޮށް، ސެޕްޓެންބަރު މަހުން ފެށިގެން އިސްތިއުމާރީ ބާރުތަކުންނާއި ޔަހޫދީ ޓެރަރިސްޓު ވަޒަންވެރިންގެ ފަރާތުން ފަލަސްޠީނު ރައްޔިތުންނަށް އަނިޔާކުރުމާއި މުދަލަށް ގެއްލުންދިނުމުގެ 377 ހަމަލާއެއް ރެކޯޑުކުރެވިފައިވާ ކަމަށް އޭނާ ބަޔާންކުރެއްވި އެވެ. މިއީ، އދ. ގެ އިންސާނީ އެހީތައް ވިލަރެސްކުރާ އިދާރާއިން (އޯސީއެޗްއޭ) 2006 ވަނަ އަހަރު މި ފަދަ ރެކޯޑުތައް ބަލަހައްޓަން ފެށި ފަހުން މިހާތަނަށް އެންމެ ގިނަ އަދަދަކަށް ހަމަލާތައް ރެކޯޑުކުރެވުނު މުއްދަތެވެ.
މި ހަމަލާތަކުގައި ފަލަސްޠީނުގެ އެކަކު އިސްތިއުމާރީ ހަމަލާއެއްގައި ޝަހީދުވެފައިވާއިރު، 200 އަށް ވުރެ ގިނަ މީހުން ވަނީ ޒަޚަމުކޮށްލާފަ އެވެ. އަދި، 3،850 އަށްވުރެ ގިނަ ޒައިތޫނި ގަހާއި ގަސް އިންދާ ގޮފިތަކަށް ވަނީ ގެއްލުންދީ ސުންނާފަތިކޮށްފަ އެވެ.
ހުޅަނގު އައްސޭރީގެ އެކި ކަންކޮޅުތަކުގައި ދިރިއުޅޭ ފަލަސްތީނުގެ 80،000 އާއި 100،000 އާ ދެމެދުގެ އަދަދެއްގެ ޢާއިލާތަކުން ދިރިއުޅުމުގެ އާމްދަނީ ހޯދުމަށް ބަރޯސާވަނީ ޒައިތޫނި ބިނުމުގެ މައްޗަށް ކަން ދުޜާރީކް ފާހަގަކުރެއްވި އެވެ. "ދިރިއުޅުމުގެ އާމްދަނީ ހޯދުމުގެ މަސައްކަތަށް ރައްކާތެރިކަމާއެކު ވާސިލުވެވޭނެ މަގު ފަހިކޮށްދޭންޖެހޭ. އަދި، މި ހަމަލާތަކަށް ޒިންމާވާ ފަރާތްތައް އިންސާފުގެ ކުރިމައްޗަށް ގެނެސް ޖަވާބުދާރީ ކުރުވަންޖެހޭ،" އޭނާ ވިދާޅުވި އެވެ.
މަސްދަރު: އަނަދޮލު އޭޖެންސީ
