ހުޅަނގު އައްސޭރީގެ އަލް-ޚަލީލުން 3،000 މީހުން މަގުމަތިކޮށްލައި، 14 މިސްކިތަކަށް ގެއްލުންދީފި
30 އޮކްޓޯބަރު 2026 | ހުކުރު 06:44އިސްރާއީލުން ހުޅަނގު އައްސޭރީގައި ހިންގާ އަސްކަރީ އޮޕަރޭޝަންތަކާއި މަގުތައް ބަންދުކުރުމުގެ ސަބަބުން ފަލަސްތީނު ރައްޔިތުންގެ އަސާސީ ޚިދުމަތްތަކަށް ބޮޑެތި ހުރަސްތަކެއް އެޅިފައިވާތީ، އެ މީހުންގެ ރައްކާތެރިކަން ކަށަވަރުކޮށްދިނުމަށް އދ. އިން ގޮވާލައިފި. މީގެ އިތުރުން، ހުޅަނގު އައްސޭރީގެ މިސްކިތްތަކަށް ދެމުންދާ ހަމަލާތައް ކުށްވެރިކޮށް، އަޅުކަންކުރާ ތަންތަނުގެ ހުރުމަތް ހިފެހެއްޓުމަށް ވެސް އދ. އިން ވަނީ ބާރުއަޅާފައި
އިސްރާއީލުގެ ސިފައިން އިސްތިއުމާރު ކޮށްފައިވާ ހުޅަނގު އައްސޭރީގެ އަލް-ޚަލީލަށް ވަދެވޭ ދޮރެއް ބަންދުކޮށް، އެ ސަރަހައްދުގައި ދިރިއުޅޭ ފަލަސްތީނުގެ ރައްޔިތުންގެ ހަރަކާތްތަކަށް ހުރަސްއަޅައި، އެ ސަރަހައްދުގެ ދަތުރުފަތުރުތައް ހުއްޓުވަނީ | އަނަދޮލު އޭޖެންސީ
އިސްރާއީލުން އިސްތިއުމާރު ކޮށްފައިވާ ހުޅަނގު އައްސޭރީގެ އަލް-ޚަލީލް ސިޓީގެ ދެ އަވަށަކުން ގެދޮރު ގެއްލިފައިވާ ފަލަސްތީނުގެ 3،000 ރައްޔިތުން އަދިވެސް ތިބީ ރައްކާތެރި ބޯހިޔާވަހިކަމެއް ނެތި ހާލުގައި ޖެހިފައި ކަމަށް އެކުވެރި ދައުލަތްތަކުން (އދ) ބުރާސްފަތި ދުވަހު ބުނެފި އެވެ.
ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން، އިންސާނީ އެހީ ފޯރުކޮށްދޭ ބައިވެރިންނާ ހަވާލާދެއްވައި އދ. ގެ ތަރުޖަމާނު ޝިރީން ޔާސީން ވިދާޅުވީ، "[ހުޅަނގު އައްސޭރީގެ] މުނިސިޕަލްޓީން އެންމެ ފަހުން ފޯރުކޮށްދީފައިވާ ހިސާބުތަކަށް ބަލާއިރު، އަލް-ޚަލީލް ސިޓީގެ ދެ އަވަށަކުން ގާތްގަނޑަކަށް 3،000 ފަލަސްތީނު މީހުން އަދިވެސް ތިބީ ގެދޮރު ގެއްލި، ނިކަމެތިވެފައި.". މިއާއެކު، އެ ސަރަހައްދުގައި ޔަހޫދީ އިސްރާއީލުގެ އަސްކަރިއްޔާއިން ދަނީ ވަރުގަދަ ހުރަސްތަކެއް ކުރިމަތިކުރުވަމުން ކަން ފާހަގަކުރައްވައި، "އިސްރާއީލު ސިފައިން އަދިވެސް ދަނީ އެ އަވަށްތަކުގައި ހަރަކާތްތެރިވަމުން؛ އަދި، އެ ސަރަހައްދުތަކަށް ވަދެވެން ހުރި މަގުތައް ބަންދުކޮށް، މުޅި ގަވަރުނަރޭޓުގައި ދަތުރުފަތުރުކުރުމަށް ވަނީ ހަރުކަށި ހުރަސްތަކެއް އަޅާފައި،" އޭނާ ވިދާޅުވި އެވެ.
"އިސްރާއީލުގެ އޮޕަރޭޝަންތަކުގެ ސަބަބުން، ދިރިއުޅުމަށް ކުރާ މަސައްކަތްތަކަށާއި، ތަޢުލީމު ހާސިލުކުރުމަށާއި، ސިއްހީ ފަރުވާ ފަދަ ޚިދުމަތްތައް ހޯދުމަށް ފަލަސްތީނުގެ ރައްޔިތުންނަށް ވަނީ ހުރަސްއެޅިފައި،" އިސްރާއީލުން ހިންގަމުންދާ މި ޖަރީމާތަކުގެ ސަބަބުން އާންމު ދިރިއުޅުމުގެ އަސާސީ ނިޒާމުތައް ފުނޑުފުނޑުވަމުންދާ ކަން ހާމަކުރައްވަމުން ޔާސީން ވިދާޅުވި އެވެ. ހަމަމިއާއެކު، އާންމު ރައްޔިތުންނަށް ދިފާޢީ ރައްކާތެރިކަން ކަށަވަރުކޮށްދިނުމުގެ މުހިންމުކަމަށް އަލިއަޅުއްވާލައްވައި، "ހުޅަނގު އައްސޭރީގެ ހުރިހާ ސަރަހައްދެއްގައި ދިރިއުޅޭ ފަލަސްތީނު މީހުންނަށް ރައްކާތެރިކަން ފޯރުކޮށްދިނުމަށް އަޅުގަނޑުމެން އަނެއްކާ ވެސް ގޮވާލަން،" ކަމަށް ޔާސީން ބަޔާންކުރެއްވި އެވެ.
މި އަހަރުގެ ތެރޭގައި އިސްރާއީލުގެ ޔަހޫދީ ޓެރެރިސްޓު ވަޒަންވެރިން ހުޅަނގު އައްސޭރީގެ 14 މިސްކިތަކަށް ގެއްލުންދީ، ހަލާކުކޮށްފައިވާ ކަމަށް އދ. ގެ އިންސާނީ އެހީތައް ވިލަރެސްކުރާ އިދާރާއިން (އޯސީއެޗްއޭ) ދާދި ފަހުން ނެރުނު ރިޕޯޓަކާ ގުޅޭގޮތުން ސުވާލުކުރުމުން، އަޅުކަންކުރާ ތަންތަނަށް ދެވޭ އެ ފަދަ ހަމަލާތަކަކީ "ޝައްކެއް ވެސް ނެތް ގޮތުގައި ބަލައިގަނެވޭނެ ކަންކަމެއް ނޫން" ކަމަށް ޔާސީން ވިދާޅުވި އެވެ.
"އަޅުކަންކުރާ ތަންތަނަކީ ރައްކާތެރި ތަންތަނަށް ވާންޖެހޭނެ. އަދި، ހަމައެކަނި އެ ސަރަހައްދުގައި އެކަންޏެއް ނޫން، ހުރިހާ ތަނެއްގައި ވެސް ދީނީ މިނިވަންކަން ކަށަވަރުކުރެވެން ޖެހޭނެ،" އޭނާ ވިދާޅުވި އެވެ. އަދި، ދީނީ މުޤައްދަސް ބިނާތަކުގެ ހުރުމަތް ރައްކާތެރިކުރުމަށް އދ. ގެ ތަރުޖަމާނު ވަނީ ބާރުއަޅުއްވާފަ އެވެ.
މަސްދަރު: އަނަދޮލު އޭޖެންސީ
