ޔަހޫދީ އިސްރާއީލުން ޣައްޒާގައި ނަސްލުހޭދު ހިންގަމުންދާ ކަމަށް އދ. ގެ ކޮމިޝަނަކުން އަނެއްކާ ވެސް ކަނޑައަޅައިފި
27 އޮކްޓޯބަރު 2026 | އަންގާރަ 03:32ޣައްޒާގައި އިސްރާއީލުން ހިންގާ ލާއިންސާނީ ޖަރީމާތަކުގައި 75،000 އަށްވުރެ ގިނަ މީހުން ޝަހީދުކޮށްލާފައިވާ ކަމަށް އދ. ގެ ކޮމިޝަނަކުން ހާމަކޮށްފި. ހުޅަނގު އައްސޭރީގައި ވެސް ނަސްލު ނައްތާލުމުގެ އަމަލުތައް ހިންގަމުންދާކަން ފާހަގަކޮށް، އިސްރާއީލަށް ދޭ އަސްކަރީ އަދި މާލީ އެހީތެރިކަން ހުއްޓާލުމަށާއި ބައިނަލްއަގުވާމީ ޖިނާއީ ކޯޓަށް އެއްބާރުލުން ދިނުމަށް އެ ކޮމިޝަނުން ވަނީ ގައުމުތަކަށް ގޮވާލާފައi
ޔަހޫދީ އިސްރާއީލުގެ ސިފައިން ވައިގެ ހަމަލާތަކެއް ދީފައިވާ އިމާރާތެއް ވެެއްޓުމުގެ ސަބަބުން ޝަހީދުވި މީހުންގެ ހަށިތައް ހޯދުމުގެ މަސައްކަތް ކުރަނީ | ރޮއިޓަރސް
ޤަތުލުއާންމު ހުއްޓާލުމުގެ އެއްބަސްވުމެއް ގާއިމުކޮށްފައި އޮތް ނަމަވެސް، އިސްރާއީލުގެ ކަމާބެހޭ އިދާރާތަކާއި އަސްކަރިއްޔާއިން އިސްތިއުމާރު ކޮށްފައިވާ ފަލަސްތީނުގެ ބިންތަކުގައި ހަނގުރާމައިގެ ކުށްތަކާއި އިންސާނިއްޔަތާ ޚިލާފު ޖަރީމާތައް ހިންގަމުންދާ ކަމަށާއި، ޣައްޒާގައި ނަސްލުހޭދުގެ އަމަލުތައް މެދުކެނޑުމެއްނެތި ކުރިއަށް ގެންދާ ކަމަށް އދ. ގެ ކޮމިޝަނަކުން ހޯމަ ދުވަހު ކަނޑައަޅައިފި އެވެ.
2023 އޮކްޓޫބަރު 7 ގެ ފަހުން އަތްގަދަ ކޮށްފައިވާ ޣައްޒާގެ ބިންތަކުގައި އިސްރާއީލުން 75،000 އަށްވުރެ ގިނަ ފަލަސްތީނު ރައްޔިތުން ޝަހީދު ކޮށްލާފައިވާ ކަމަށް، އދ. ގެ އާންމު މަޖިލީހުގައި ތަޤުރީރު ކުރައްވަމުން އެ ކޮމިޝަނުގެ މުގައްރިރު ސްރީނިވާސަން މުރަލީދަރު ވިދާޅުވި އެވެ. މީގެ ތެރޭގައި 21،500 ކުޑަކުދިންނާއި 11،000 އަންހެނުން ހިމެނޭ ކަން އޭނާ ފާހަގަކުރެއްވި އެވެ.
ޤަތުލުއާންމު ހުއްޓާލިކަމަށް ބުނި ފަހުން ވެސް ޣައްޒާއަށް ދެމުންދާ ހަމަލާތައް
ޣައްޒާގެ 'ޔެލޯ ލައިން' ކައިރިއަށް ދާ ނުވަތަ އެ ސަރަހައްދު ހުރަސްކުރާ އާންމު ރައްޔިތުންނާއި ކުޑަކުދިންނަށް އަމާޒުކޮށް ޔަހޫދީ އިސްރާއީލު ސިފައިން ހަމަލާދީ، ޝަހީދުކޮށް، ޒަޚަމުކުރަމުންދާ ކަމަށް، ކޮމިޝަނުގެ އެންމެ ފަހުގެ ރިޕޯޓުގައި ބަޔާންކޮށްފައިވެ އެވެ. މި ގޮތުން، 2025 އޮކްޓޫބަރު 10 ގައި އަމަލުކުރަން ފެށި ޤަތުލުއާންމު ހުއްޓާލުމުގެ އެއްބަސްވުމާ ޚިލާފަށް ޔަހޫދީ އިސްރާއީލުގެ އިސްތިއުމާރީ ސިފައިން ޣައްޒާއަށް ކޮންމެ ދުވަހަކު ދެމުންދާ ހަމަލާތަކުގައި 1،551 ފަލަސްތީނު މީހުން ޝަހީދުކޮށްލައި، 5،573 މީހުން ޒަޚަމުކޮށްލާފައިވާ ކަމަށް ޣައްޒާގެ ސިއްހަތާ ބެހޭ ވުޒާރާއިން ބުނެ އެވެ.
ހުޅަނގު އައްސޭރީގެ މަސްރަހާއި އިންސާނިއްޔަތާ ޚިލާފު ޖަރީމާތައް
އިސްތިއުމާރު ކޮށްފައިވާ ހުޅަނގު އައްސޭރީގެ މަސްރަހު ވެސް ވަރަށް ބޮޑަށް ގޯސްވެފައިވާ ކަމަށާއި، އިސްރާއީލުގެ އަސްކަރީ ހަރަކާތްތަކާއި ބިންފޭރޭ ޓެރެރިސްޓު ވަޒަންވެރިން ހިންގާ އަނިޔާވެރި އަމަލުތަކާއި ލާއިންސާނީ ޖަރީމާތަކަކީ ފަލަސްތީނު ރައްޔިތުންނާ ދެކޮޅަށް ރޭވިގެން ހިންގާ ހަމަލާތަކެއްގެ ބައެއް ކަމަށް ކޮމިޝަނުން ސިފަކުރެ އެވެ. އެ އަމަލުތަކުގެ މައިގަނޑު މަގުސަދަކީ ޔަހޫދީ ޓެރެރިސްޓު ވަޒަންވެރިންގެ އާބާދީތައް ފުޅާކުރުމާއި، ފަލަސްތީނުގެ ބިންތައް ފޭރިގަނެ އިސްރާއީލުގެ ދަށަށް ގެންދިއުމާއި، އަދި ރައްޔިތުން ގެދޮރުން ނެރެ ވަކިކުރުން ކަމަށް ރިޕޯޓުގައި ބަޔާންކޮށްފައިވެ އެވެ.
ހުޅަނގު އައްސޭރީގައި ނަސްލު ނައްތާލުމާއި، އަނިޔާކުރުމާއި، ރޭޕްކުރުން ހިމެނޭހެން ޖިންސީ ގޯނާގެ އެކި ބާވަތްތައް ފަދަ އިންސާނިއްޔަތާ ޚިލާފު ޖަރީމާތައް އިސްރާއީލުން ހިންގާފައިވާ ކަމަށް ކޮމިޝަނުން ބުންޏެވެ. ހަމަމިއާއެކު، ފަލަސްތީނުގެ ކުޑަކުދިންނަށް އެ ކުދިންގެ އުމުރަށް ބަލައި އަނިޔާވެރިކަން އަމާޒުކުރަމުންދާ ކަމަށާއި، ފަލަސްތީނު ރައްޔިތުން ގެދޮރުން ބޭރުކޮށް، ދަށުކޮށް، އަދި މުޖުތަމައުގެ ހަމަޖެހުން ނަގާލުމަށް ހިންގާ އަނިޔާވެރިކަން ހަތިޔާރެއްގެ ގޮތުގައި ބޭނުންކުރަމުންދާ ކަން ވެސް ތަހުގީގަށް ވަނީ ފާހަގަކުރެވިފަ އެވެ.
މީގެ އިތުރުން، 2023 އޮކްޓޫބަރު 7 ގެ ފަހުން ހުޅަނގު އައްސޭރީގައި ފަލަސްތީނުގެ ސަލާމަތީ ބާރުތަކުން ވެސް ފަލަސްތީނު ރައްޔިތުންނާ ދެކޮޅަށް ނުބައްދަލު އަދި ކޮންމެހެން ބޭނުންކުރަން ނުޖެހޭ ބާރުގެ ބޭނުން ހިފުން އިތުރުވެފައިވާ ކަމަށް ރިޕޯޓުގައި ބަޔާންކޮށްފައިވެ އެވެ. އަދި، ހިނގަމުންދާ މަރުގެ ހާދިސާތަކާ ގުޅިގެން މިނިވަން އަދި އިންސާފުވެރި ތަހުގީގުތައް ހިންގުމަށާއި، އަނިޔާ ލިބުނު ފަރާތްތަކަށާއި އެމީހުންގެ އާއިލާތަކަށް އިންސާފާއި ބަދަލު ހޯދައިދިނުމުގައި ޕަލަސްޓީނިއަން އޮތޯރިޓީ ނުކުޅެދިފައިވާ ކަމަށް ވެސް ރިޕޯޓުގައި ފާހަގަކޮށްފައިވެ އެވެ.
ބައިނަލްއަގުވާމީ ފިޔަވަޅުތަކަށާއި އައިސީސީއަށް އެއްބާރުލުން ދިނުމަށް ގޮވާލުން
ފަލަސްތީނުގެ ބިންތަކަށް ވެރިވެގަނެގެން ތިބި ތިބުން ނިމުމަކަށް ގެނައުމަށާއި، ޣައިރުގާނޫނީ އާބާދީތައް ހުސްކުރުމަށާއި، އަދި ފަލަސްތީނު ރައްޔިތުން އަމިއްލަ އިޚުތިޔާރުގައި ކަންކަން ނިންމުމުގެ ހައްގަށް ހުރަސްއަޅާ އެންމެހައި ކަންކަން ނައްތާލުމަށް މުރަލީދަރު ވަނީ އިސްރާއީލަށް ގޮވާލައްވާފަ އެވެ. މިއާއެކު، އިސްރާއީލުގެ ވެރިވެގަތުމާއި އާބާދީތައް ދެމެހެއްޓުމަށް މަގުފަހިވާ ގޮތަށް ސިޔާސީ، އަސްކަރީ، އިގުތިސާދީ ނުވަތަ މާލީ އެހީތެރިކަން ފޯރުކޮށްދިނުން ހުއްޓާލުމަށް އދ. ގެ މެންބަރު ޤައުމުތަކަށް އޭނާ ގޮވާލެއްވި އެވެ.
ދައުލަތްތަކުން ނަސްލުނައްތާލުން ހުއްޓުވުމަށާއި އެ ފަދަ ކުށްތަކަށް އަދަބު ދިނުމަށް ލިބިފައިވާ ހުރިހާ ވަސީލަތެއް ބޭނުންކުރަންޖެހޭ ކަމަށާއި، ވަކިން ޚާއްސަކޮށް އެމެރިކާއިން ބައިނަލްއަގުވާމީ ޖިނާއީ ކޯޓަށާއި އެ ކޯޓުގެ އޮފިޝަލުންނަށް ދަތިކުރުމުގެ ފިޔަވަޅުތައް އަޅާފައިވާ ދަނޑިވަޅެއްގައި، އެ ކޯޓަށް އެއްބާރުލުން ދިނުމަށް ވެސް މުރަލީދަރު ވިދާޅުވި އެވެ. ނިއު ޔޯކަށް ދަތުރުކުރުމަށް ޓަކައި ވިސާ ހޯދުމަށް ގިނަ މަސައްކަތްތަކެއް ކުރެއްވި ނަމަވެސް، ވިސާ ލިބޭ ގޮތް ނުވުމުން އޭނާ އދ. ގެ އާންމު މަޖިލީހުގައި ތަގުރީރު ކުރެއްވީ ވީޑިއޯ ކޮންފަރެންސް މެދުވެރިކޮށެވެ.
މަސްދަރު: އަނަދޮލު އޭޖެންސީ
