އިންޑިޔާގެ މުޒާހަރާތަކާ ދެކޮޅަށް "ހާލަތާ ނުބައްދަލު ބާރު" ގެ ބޭނުންކުރުން ހުއްޓާލަން އދ. އިން ގޮވާލައިފި
21 އޮކްޓޯބަރު 2026 | ބުދަ 09:33އިންޑިޔާގެ ވޯޓުލާ މީހުންގެ ލިސްޓުން ގިނަ ބަޔަކު އުނިކުރުމާ ގުޅިގެން ކުރިއަށްދާ މުޒާހަރާތަކުގައި ބައިވެރިވާ ދަރިވަރުންނާއި އިދިކޮޅު ފަރާތްތަކާ ދެކޮޅަށް ހާލަތާ ނުބައްދަލު ބާރު ބޭނުންކުރުން ހުއްޓާލުމަށް އދ. ގެ މާހިރުން ގޮވާލައްވައިފި. މުޒާހަރާގެ ބައިވެރިންނަށް ޖިންސީ އަނިޔާއާއި އިހާނެތިކޮށް ހިތާފައިވާ ކަމުގެ ރިޕޯޓުތަކާ މެދު ކަންބޮޑުވުން ފާޅުކޮށް، މި މައްސަލަތައް މިނިވަންކަމާއެކު ތަހުގީގުކުރުމަށް ވެސް އދ. އިން ވަނީ އިންޑިޔާ ސަރުކާރަށް ބާރުއަޅާފައި
އިންޑިޔާގެ ވެރިރަށް ނިއު ދެއްލީގައި ސަރުކާރާ ދެކޮޅަށް ކުރަމުންދާ މުޒާހަރާތަކުގެ ބައިވެރިއަކު ގަދަބާރުން ހައްޔަރު ކުރުމުން ފުލުހުންނާއި ސަލާމަތީ ބާރުގެ އޮފިސަރުން މަސައްކަތް ކުރަނީ | އަނަދޮލު އޭޖެންސީ
އިންޑިޔާގައި އިދިކޮޅު ފަރާތްތަކާއި ދަރިވަރުން ކުރަމުންދާ މުޒާހަރާތައް ހުއްޓުވުމަށް ހިންގި އޮޕަރޭޝަނާ ގުޅިގެން, "ހާލަތާ ނުބައްދަލު ބާރު" ގެ ބޭނުންކުރުން ހުއްޓާލުމަށް އިންޑިޔާގެ ސަރުކާރަށް ގޮވާލާފައިވާ ކަމަށް އދ. ގެ މާހިރުން ވިދާޅުވެއްޖެ އެވެ. މުޒާހަރާގެ ބައިވެރިންނަށް ޒަޚަމުތައް ލިބި, ބައެއް މީހުންނަށް އިހާނެތިކޮށް ހިތާފައިވާ ކަމަށް ރިޕޯޓުކޮށްފައިވާތީ, އިންޑިޔާގެ ކަމާބެހޭ އިދާރާތަކުން އަމަލުކުރި ގޮތް ވަކިފަރާތަކަށް ނުޖެހި ތަހުގީގުކުރުމަށް އަންގާރަ ދުވަހު ނެރުއްވި ބަޔާނެއްގައި އދ. ގެ މުސްތަޤިއްލު މާހިރުންގެ ޓީމަކުން ވަނީ ބާރުއަޅުއްވާފަ އެވެ.
"މުޒާހަރާގެ ބައިވެރިންނަށް ޒަޚަމުތައް ލިބިފައިވާއިރު, ބައެއް މީހުންނަށް އިހާނެތިކޮށް ހިތާފައިވާ ކަމަށް ވަނީ ރިޕޯޓުކޮށްފައި. މުޒާހަރާތަކާއި އެއާ ގުޅިގެން ހައްޔަރުކުރި ކުރުންތަކުގައި ޖިންސީ އަނިޔާއާއި ޖެންޑަރަށް ބިނާކޮށް ހިންގާފައިވާ އެހެނިހެން ގޯނާތަކުގެ ރިޕޯޓުތަކާ މެދު މާހިރުން ވަނީ ޚާއްސަ ކަންބޮޑުވުން ފާޅުކުރައްވާފައި،" އެ ބަޔާނުގައި ބުނެފައިވެ އެވެ. އިންސާނީ ހައްގުތަކާ ގުޅޭ ޚާއްސަ ކާރިސާތައް މޮނިޓަރުކޮށް ލިޔެކިޔުމުން ބެލެހެއްޓުމަށް އދ. ގެ މާހިރުން ކަނޑައަޅަނީ އދ. ގެ އިންސާނީ ހައްގުތަކާ ބެހޭ ކައުންސިލުން ކަމުގައިވީ ނަމަވެސް، އެ ބޭފުޅުންނަކީ އެ ޖަމުއިއްޔާއާ ވަކިން މަސައްކަތްކުރައްވާ މިނިވަން ބޭފުޅުންނެވެ.
ވޯޓުލާ މީހުންގެ ލިސްޓުން 130 މިލިޔަން މީހުންގެ ނަން އުނިކުރުމާ ގުޅިގެން, ޗީފް އިލެކްޝަން ކޮމިޝަނަރު ގްޔަނޭޝް ކުމާރު އިސްތިއުފާ ދެއްވުމަށް ގޮވާލައި އިންޑިޔާގެ 'ކޮކްރޯޗް ޖަންތާ ޕާޓީ' (ސީޖޭޕީ) ހަރަކާތާއި އިދިކޮޅު އެހެނިހެން ޕާޓީތަކާއި ދަރިވަރުންގެ ޖަޖުއިއްޔާތަކުން އިސްވެ ވަނީ މި މަހު މުޒާހަރާތައް ކުރިއަށް ގެންގޮސްފަ އެވެ.
ވޮޓުލާ މީހުންގެ ލިސްޓުން ނަންތައް އުނިކުރުމުގެ ނޭދެވޭ އަސަރު އެންމެ ބޮޑަށް ކޮށްފައި ވަނީ ފަގީރުންނާއި ގެދޮރުނެތް މީހުންގެ އިތުރުން, ބޮޑުވަޒީރު ނަރެންދުރަ މޯދީގެ ބާރްތިޔާ ޖަންތާ ޕާޓީއަށް(ބީޖޭޕީ) ވޯޓު ދިނުމުގެ ފުރުސަތު ކުޑަ މުސްލިމުން ހިމެނޭހެން ނަސްލީ ކުދި ޖަމާއަތްތަކަށް ކަމަށް މުޒާހަރާކުރާ ފަރާތްތަކުން ބުންޏެވެ.
މި ތުހުމަތުތައް ބީޖޭޕީންނާއި އިންޑިޔާގެ އިލެކްޝަން ކޮމިޝަނުން ދޮގުކުރެ އެވެ. އުނިކުރަމުން ދަނީ އެއް ނަމެއް ތަކުރާރުވެފައިވާ މީހުންނާއި, މަރުވެފައިވާ މީހުންނާއި, ދިރިއުޅޭ ތަން ބަދަލުވެފައިވާ މީހުންގެ އިތުރުން ވޯޓުލުމުގެ ޝަރުތު ހަމަނުވާ އެހެނިހެން މީހުންގެ ނަންތައް ކަމަށާއި, އޮޅުމަކުން ނަން އުނިކުރެވިފައިވާ ކޮންމެ މީހަކަށް ވެސް އިސްތިއުނާފު ކުރުމުގެ ފުރުސަތު އޮންނާނެ ކަމަށް އިލެކްޝަން ކޮމިޝަނުން ބުންޏެވެ.
ބާރުގެ ބޭނުންކޮށް މުޒާހަރާތައް ކޮންޓުރޯލުކުރުން
"މުޒާހަރާތަކަކީ ސުލްހަވެރި އެއްވުންތަކެއް ކަމުގައިވީ ނަމަވެސް، ހަތިޔާރެއް ނެތް ދަރިވަރުންނާ ދެކޮޅަށް ފުލުހުންނާއި ގާނޫނު ތަންފީޒުކުރާ އިދާރާތަކުން ބާރުގެ ބޭނުންކޮށްފައިވާ ކަމަށާއި, އަދި އެތައް ހާސް ބަޔަކު މުޒާހަރާތަކާ ގުޅުމަށް ވަނީ ހުރަސްއަޅާފައި," ކަމަށް އދ. ގެ މާހިރުން ވިދާޅުވި އެވެ.
"ހާލަތާ ނުބައްދަލު ބާރުގެ ބޭނުންކުރުން ވަގުތުން ހުއްޓާލުމަށާއި, އެއްވުންތައް މަނާކުރުމަށް އަޅާފައިވާ ހުރިހާ ފިޔަވަޅުތަކެއް އުވާލުމަށާއި, އަދި ބަޔޯމެޓްރިކްސް ހިމެނޭހެން ޑިޖިޓަލް މޮނިޓަރިން ނަހަމަ ގޮތުގައި ބޭނުންކުރުމާއި އިންޓަނެޓްގެ ޚިދުމަތް މެދުކަނޑާލުން ހުއްޓާލުމަށް ކަމާބެހޭ ފަރާތްތަކަށް އަޅުގަނޑުމެން ގޮވާލަން," އެ ބޭފުޅުން ވިދާޅުވި އެވެ.
އެންމެ ފަހުން ކުރިއަށްދިޔަ މުޒާހަރާތަކާ ގުޅިގެން ގިނަ އަދަދެއްގެ ބަޔަކު ހައްޔަރުކުރަމުންދާތީ މި މަހުގެ ކުރީކޮޅު އދ. ގެ އިންސާނީ ހައްގުތަކާ ބެހޭ އޮފީހުން ކަންބޮޑުވުން ފާޅުކުރުމުން ވެސް, އެ ފަދަ ފާޑުކިޔުންތަކަކީ ޤައުމުގެ ދާޚިލީ ކަންކަމުގެ ތެރެއަށް ވަނުން ކަމަށް ސިފަކޮށް އިންޑިޔާއިން ވަނީ އެ ވާހަކަތައް ތަކުރާރުކޮށް ދޮގުކޮށްފަ އެވެ.
މަސްދަރު: އަލް ޖަޒީރާ
