"ނާކާމިޔާބީގެ ޒިންމާ އުފުލަންޖެހޭނީ ފޮކްސް ނޫހުން": ޓްރަމްޕްގެ ބަހުގެ ހަމަލާތައް މީޑިއާއަށް!
4 ނޮވެމްބަރު 2026 | ބުދަ 09:23އެމެރިކާގެ މިޑްޓަރމް އިންތިޚާބުގައި ރިޕަބްލިކަން ޕާޓީއަށް ކުރިމަތިވި ނާކާމިޔާބީގެ ޒިންމާ ފޮކްސް ނޫހުން އުފުލަންޖެހޭނެ ކަމަށް ވިދާޅުވެ، ޑޮނަލްޑް ޓްރަމްޕް އެ ނޫހަށް ވަރަށް ބޮޑަށް ފާޑުވިދާޅުވެއްޖެ. ޓްރަމްޕް ތުހުމަތުކުރެއްވި ގޮތުގައި ފޮކްސް ނޫހުން ޑިމޮކްރެޓުންނަށް ފުރުސަތު ދިނުމަކީ ކޮންޒަވެޓިވް ކެންޑިޑޭޓުންގެ އަގުވެއްޓި، އިންތިޚާބުގެ ނަތީޖާއަށް ނޭދެވޭ އަސަރުކުރި ސަބަބެއް
އެމެރިކާގެ ރައީސް ޑޮނަލްޑް ޓްރަމްޕްގެ ފޮޓޯއަކާއި ފޮކްސް ނޫހުގެ ލޯގޯ ހިމަނައިގެން ތައްޔާރު ކޮށްފައިވާ އިލުސްޓްރޭޝަންއެއް | އިލުސްޓްރޭޝަން ތައްޔާރުކޮށްފައި ވަނީ އެކްސިއޮސްގެ ސޭރާ ގްރިއްލޯ | ގެޓީ އިމޭޖަސް
އެމެރިކާގެ މިޑްޓަރމް އިންތިޚާބުގައި ވެރިކަންކުރާ ރިޕަބްލިކަން ޕާޓީއަށް ކުރިމަތިވި ނާކާމިޔާބީތަކުގެ ފުރިހަމަ ޒިންމާ އެ ޤައުމުގެ މަޝްހޫރު ޚަބަރު ފަތުރާ ވަސީލަތް ފޮކްސް ނޫހުން އުފުލަންޖެހޭނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ބުދަ ދުވަހު ތުހުމަތުކުރައްވައިފި އެވެ. ޓްރަމްޕް ވިދާޅުވީ، އެ ޗެނަލުން އިދިކޮޅު ޑިމޮކްރެޓިކް ޕާޓީގެ މެންބަރުންނަށް 'އެއާޓައިމް' ދީގެން ކޮންޒަވެޓިވް ކެންޑިޑޭޓުންގެ މަސައްކަތްތަކަށް ހުރަސްއަޅައި އެ ފަރާތްތަކުގެ އަގު ވައްޓާލާފައިވާ ކަމަށެވެ.
އަމިއްލަ ސޯޝަލް މީޑިއާ ޕްލެޓްފޯމް، 'ޓްރުތު ސޯޝަލް' ގައި ހިއްސާކުރެއްވި ބަޔާނެއްގައި ޓްރަމްޕް ވިދާޅުވީ، "މި ނާކާމިޔާބީތަކުގެ ޒިންމާ ފޮކްސް ނޫހުން އުފުލަންޖެހޭނެ. އެއީ، އިދިކޮޅު ޑިމޮކްރެޓުންނަށާއި، އަދި އެއަށްވުރެ ވެސް ގޯސް ފަރާތްތަކަށް މެދުކެނޑުމެއްނެތި، ދެމިހުންނަ ގޮތެއްގައި ޕްލެޓްފޯމް ދެމުން ގެންދިއުމުގެ ސަބަބުން،" ކަމަށެވެ.
މި ގޮތުން، ނިއުޔޯކް ސިޓީގެ ކުރީގެ މޭޔަރު ބިލް ޑި ބްލާޒިއޯއަށް ވަކިން ޚާއްސަކޮށް އިޝާރާތްކުރައްވަމުން ޓްރަމްޕް ވަނީ، މަގާމުން ވަކިވެވަޑައިގެންނެވިއިރު އަގުވެއްޓިފައިވާ ބޭފުޅަކަށް ޤައުމު ހިންގުމާ ގުޅޭގޮތުން އިރުޝާދާއި ލަފާދިނުމުގެ ފުރުސަތު ފޮކްސް ނޫޙުން ދޭންވީ ސަބަބަކާ މެދު ސުވާލު އުފައްދަވާފަ އެވެ.
އިންތިޚާބީ މުޅި ދައުރުގެ ތެރޭގައި ވެސް، ޓްރަމްޕްގެ ސިޔާސީ ވިސްނުންތަކާ ފުށުއަރާ ގޮތަށް ނިންމާފައިވާ އެޑިޓޯރިއަލް ނިންމުންތަކަށާއި، ފޮކްސް ނޫހުގެ ކޮމެންޓޭޓަރުންނަށް އޭނާ ވަނީ ތަކުރާރުކޮށް ވަރަށް ބޮޑަށް ފާޑުވިދާޅުވެފަ އެވެ.
ޓްރަމްޕްގެ މި ފާޑުކިޔުންތައް އަމާޒުވެފައި މި ވަނީ، އެމެރިކާގެ ސެނެޓުގެ ކޮންޓުރޯލު ޑިމޮކްރެޓުން ކާމިޔާބުކުރާނެ ކަމަށް އެ ޤައުމުގެ މީޑިއާތަކުން ލަފާކޮށްފައިވަނިކޮށެވެ. ހަމަމިއާއެކު، ހައުސް އޮފް ރެޕްރެޒެންޓެޓިވްސްގެ އަޣުލަބިއްޔަތު ހޯދުމުގެ މަގުމަތީގައި ވެސް ޑިމޮކްރެޓުން ވާކަމަށް ފެންނަމުންދާއިރު، މިއީ ކުރިއަށް އޮތް ތަނުގައި ޓްރަމްޕްގެ ޤާނޫނުހަދާ އެޖެންޑާ ކުރިއަށްގެންދިއުމަށް ކުރިމަތިވާނެ ވަރަށް ބޮޑު ހުރަހެކެވެ.
މަސްދަރު: އަނަދޮލު އޭޖެންސީ
