ފްލޮރިޑާގެ އާންމުން ދިރިއުޅޭ ސަރަހައްދަކަށް މަތިންދާބޯޓެއް ވެއްޓި ނުވަ މީހުން މަރުވެއްޖެ
2 ނޮވެމްބަރު 2026 | ހޯމަ 05:24ޓެކްސަސް އިން ބަހާމާސްއަށް ދަތުރުކުރި މި ބޯޓު ވެއްޓުނު ހާދިސާ އެމެރިކާގެ ކަމާބެހޭ އިދާރާތަކުން މިހާރު ދަނީ ތަހުގީގު ކުރަމުން. މި ހާދިސާއާ ގުޅިގެން ޕާމް ބީޗްގެ ބައެއް މަގުތައް ބަންދުކޮށްފައިވާއިރު، ބޯޓު ވެއްޓެން މެދުވެރިވި ސަބަބު އަދި ދެނެގަނެވިފައެއް ނުވޭ. މި ބޯޓު ވެއްޓިފައި ވަނީ އެމެރިކާގެ ރައީސް ޑޮނަލްޑް ޓްރަމްޕްގެ މާރް-އަ-ލާގޯ އެސްޓޭޓާ ވަރަށް ކައިރި ސަރަހައްދަކަށް
އެމެރިކާގެ ފްލޮރިޑާގައި އާންމުން ދިރިއުޅޭ ސަރަހައްދަކަށް ލިއަރޖެޓު މަރުކާގެ ފަސިންޖަރުން އުފުލާ ކުޑަ މަތިންދާބޯޓެއް ވެއްޓި ގޮވާ ކަމަށް ބުނާ މަންޒަރުތައް | އެކްސް
އެމެރިކާގެ ފްލޮރިޑާ ސްޓޭޓްގެ ކްރެސްޓްހޭވަން ކައިރީގައި އޮންނަ އާންމުން ދިރިއުޅޭ އަވަށަކަށް އާދީއްތަ ދުވަހު ޕްރައިވެޓް މަތިންދާބޯޓެއް ވެއްޓި، އޭގައި ދަތުރުކުރި ނުވަ މީހުން މަރުވެއްޖެ އެވެ.
ޓެކްސަސްގެ އޮސްޓިން-ބަރގްސްޓްރޮމް އިންޓަނޭޝަނަލް އެއާޕޯޓުން ނައްޓާލައިގެން ބަހާމާސްގެ އުތުރު އެލޫތެރާ އެއާޕޯޓަށް ދަތުރުކުރަމުން ދިޔަ 'ލިއަރޖެޓް 60' މަރުކާގެ މި ބޯޓު ވެއްޓުނީ އެ ސަރަހައްދުގެ ގަޑިން މެންދުރު 12:50 ހާއިރު ކަމަށް ފެޑެރަލް އޭވިއޭޝަން އެޑްމިނިސްޓްރޭޝަނުން (އެފްއޭއޭ) ބުންޏެވެ.
މި ހާދިސާގައި ބޯޓުން ދަތުރުކުރި އެންމެން މަރުވެފައިވާ ކަން ކަށަވަރުކޮށްދެއްވަމުން، "ފްލޮރިޑާގެ ޕާމް ބީޗް ކައުންޓީގައި މިއަދު ހިނގި މަތިންދާބޯޓު ވެއްޓުމުގެ ހާދިސާއަކީ ބިރުވެރި ހިތާމަވެރި ހާދިސާއެއް،" ކަމަށް އެމެރިކާގެ ދަތުރުފަތުރާ ބެހޭ ވަޒީރު ޝޯން ޑަފީ ވިދާޅުވި އެވެ. މި ބޯޓު ވެއްޓުނު ސަރަހައްދު އޮންނަނީ އެމެރިކާގެ ރައީސް ޑޮނަލްޑް ޓްރަމްޕްގެ މާރް-އަ-ލާގޯ އެސްޓޭޓާ ވަރަށް ކައިރީގަ އެވެ.
މަތިންދާބޯޓު ވެއްޓުނު "އެ ސަރަހައްދަށް އާންމުން ނުދިއުމަށް" އިލްތިމާސްކުރަމުން، މި ހާދިސާއާ ގުޅިގެން ކުރިއަށްގެންދާ އޮޕަރޭޝަން ވަރަށް ބޮޑަށް ދިގުދެމިގެންދާނެ ކަމަށް ޕާމް ބީޗް ކައުންޓީ ފަޔަރ ރެސްކިއު އިން ނެރުނު ބަޔާނެއްގައި ބުންޏެވެ. މިއާއެކު، ހާދިސާ ހިނގި ސަރަހައްދުގެ ސަލާމަތީ ކަންކަން ކަށަވަރުކޮށް، ކުއްލި ހާލަތްތަކުގައި ހަރަކާތްތެރިވާ ފަރާތްތަކަށް މަގުފަހިކޮށްދިނުމުގެ ގޮތުން، ކްރެސްޓްހޭވަން ބުލެވާޑާއި 10 ވަނަ އެވެނިއު ނޯތާ ދެމެދު އޮންނަ މިލިޓަރީ ޓްރެއިލްގެ އުތުރަށާއި ދެކުނަށް ދަތުރުކުރާ ހުރިހާ ލޭނެއް ވަކި ގޮތެއް އަންގަންދެން ބަންދުކޮށްފައިވާ ކަމަށް ޕާމް ބީޗް ފުލުހުންގެ އޮފީހުން ބުންޏެވެ.
އެމެރިކާގެ އެކި ކަންކޮޅުތަކުގައި ހިނގާ މަދަނީ ދަތުރުފަތުރުގެ އެކްސިޑެންޓްތަކާއި ނުރައްކާތެރި ބޮޑެތި ހާދިސާތައް ތަހުގީގުކުރުމުގެ މަސްއޫލިއްޔަތު އުފުލާ މިނިވަން ފެޑެރަލް އިދާރާއެއް ކަމަށްވާ ނޭޝަނަލް ޓްރާންސްޕޯޓޭޝަން ސޭފްޓީ ބޯޑުން (އެންޓީއެސްބީ) އެފްއޭއޭއާ ގުޅިގެން މި ހާދިސާގެ ތަހުގީގު އިސްވެ ކުރިއަށްގެންދާނެ އެވެ. މި ބޯޓު ވެއްޓެން މެދުވެރިވި އަސްލު ސަބަބު ކަމާބެހޭ އެއްވެސް އިދާރާއަކުން އަދި މިހާތަނަށް ކަށަވަރުކޮށްދީފައެއް ނުވެ އެވެ.
މަސްދަރު: އަނަދޮލު އޭޖެންސީ
