މޯލްޑިވިއަންގެ ލަގްޒަރީ ފްލީޓަށް 'ކިންގް އެއަރ 360' މަރުކާގެ ބޯޓެއް އިތުރުކޮށް ޚިދުމަތަށް ނެރެނީ

ގައުމީ އެއާލައިން، މޯލްޑިވިއަންގެ ފްލީޓަށް މުޅިން އަލަށް އިތުރުކުރި "ކިންގް އެއަރ 360" މަރުކާގެ މަތިންދާބޯޓު ލަގްޒަރީ ދަތުރުތަކަށް ބޭނުންކުރުމަށްޓަކައި ޚިދުމަތަށް ނެރެން ތައްޔާރުވެއްޖެ އެވެ.

މިއީ ގައުމީ އެއާލައިނުން މިފަދަ މަރުކާގެ ބޯޓެއް ބޭނުންކޮށްގެން ހައި-އެންޑް ނުވަތަ ލަގްޒަރީ ދަތުރުފަތުރުގެ ޚިދުމަތް ތައާރަފްކުރި ފުރަތަމަ ފަހަރެވެ.

މި ޚިދުމަތް މޯލްޑިވިއަނުން ކުރިއަށްގެންދިއުމަށް ހަމަޖެހިފައިވަނީ ނިލާ ކޮރެލްސްއާ ގުޅިގެންނެވެ. މި ބޯޓު ފްލީޓަށް އިތުރުކުރުމުގެ ގޮތުން ބޭއްވި ރަސްމިއްޔާތުގައި އައިލެންޑް އޭވިއޭޝަން ސާވިސަސްގެ ޑެޕިއުޓީ މެނޭޖިންގ ޑިރެކްޓަރު އަލީ ސަލީމް ވިދާޅުވީ، ރޭގަނޑު ރާއްޖެއަށް އަންނަ ފަތުރުވެރިންނަށް ސީޕްލޭންގެ ޚިދުމަތް ނުލިބޭ ވަގުތުތަކުގައި، ލަގްޒަރީ ފަތުރުވެރިކަމަށް ޚާއްސަ ޚިދުމަތްތަކެއް ފޯރުކޮށްދިނުމަކީ އަބަދުވެސް ބޮޑު ޑިމާންޑެއް އޮންނަ ކަމެއް ކަމަށެވެ. އަދި މި އައު ބޯޓާއެކު ރާއްޖޭގެ ލަގްޒަރީ ރިސޯޓުތަކަށް ކުރާ ދަތުރުތަކަށް ބޮޑު ލުޔެއްލިބި، ދާއިރާގެ ހިއްސާދާރުން ބޭނުންވާ ފެންވަރުގެ ޚިދުމަތް ދެވޭނެ ކަމަށް އޭނާ ފާހަގަކުރެއްވި އެވެ.

ޖުމްލަ 8 ފަސިންޖަރުންގެ ޖާގައާއެކު ވިޔަފާރި އަދި ލަގްޒަރީ ދަތުރުތަކަށް ޚާއްސަކޮށްގެން ފަރުމާކޮށްފައިވާ މި ބޯޓު މައިގަނޑު ގޮތެއްގައި ބޭނުންކުރުމަށް ހަމަޖެހިފައިވަނީ "ނިލާ ކޮރަލް އައިލެންޑް" އަށް ކުރާ އެއަރ ޓްރާންސްފަރ ދަތުރުތަކަށެވެ. މީގެ އިތުރުން، ރާއްޖޭގެ އެކި ސަރަހައްދުތަކަށް ކުރާ ޗާޓަރު ދަތުރުތަކަށް އާންމުންނަށާއި، ވިޔަފާރި ކުންފުނިތަކުގެ އިތުރުން ޖަމްއިއްޔާ ޖަމާއަތްތަކަށް ވެސް މި ބޯޓު ކުއްޔަށް ހިފުމުގެ ފުރުސަތު އޮންނާނެ ކަމަށް އެއާލައިނުން ހާމަކުރެ އެވެ.

ދެ އިންޖީނުލީ މި ޓާބޯޕްރޮޕް މަތިންދާބޯޓަކީ އޭގެ ހަލުވި ދުވެއްޔާއި، ހިތްފަސޭހަ އަދި ޖާގަ ތަނަވަސް ކެބިންގެ ސަބަބުން މަގުބޫލުކަން ހޯދާފައިވާ ބޯޓެކެވެ. މި ޚިދުމަތް ތައާރަފްވުމުން ދަތުރުވެރިން އެއާޕޯޓުގައި ޓްރާންސިޓް ކުރަންޖެހޭ ވަގުތު ބޮޑުތަނުން ކުޑަވެ، ބޭނުންވާ ވަގުތެއްގައި ސީދާ މަންޒިލަށް ދިއުމުގެ ފަސޭހަކަން ލިބިގެންދާނެ އެވެ.

މި އައު ބޯޓާއެކު މޯލްޑިވިއަންގެ ފްލީޓުގައި މިހާރު އޮޕަރޭޓްކުރާ ބޯޓުގެ ޖުމްލަ އަދަދު ވަނީ 25 އަށް އަރާފަ އެވެ. އެއާލައިންގެ ފްލީޓުގައި މިހާރު ހިމެނެނީ އެއާބަސްގެ 2 ބޯޓާއި އޭޓީއާރުގެ 5 ބޯޓާއި ޑޭޝް 8 ގެ 7 ބޯޓުގެ އިތުރުން ސީޕްލޭންގެ ގޮތުގައި ބޭނުންކުރާ 11 ޓްވިން އޮޓާ ބޯޓެވެ.