އެތެރޭގެ އުދުހުންތަކުގެ ޓިކެޓުގެ އަގު ހެޔޮ ކުރެވޭކަށް ނެތް، އެކަށީގެންވާ މިންވަރުން ފަސިންޖަރުން ނުލިބޭ: އަމީން
ރާއްޖޭގެ އެތެރޭގެ އުދުހުންތަކަށް ބޭނުންވާ ވަރަށް ފަސިންޖަރުން ނެތުމާއި، ބައެއް އެއަރޕޯޓްތަކަށް އޮތް ޑިމާންޑް ކުޑަވުމަކީ ޓިކެޓުގެ އަގު ހެޔޮކުރުމަށް އޮތް ބޮޑު ގޮންޖެހުމެއް ކަމަށް މިނިސްޓަރު މުހައްމަދު އަމީން ފާހަގަ ކުރެއްވި. ދުނިޔޭގެ ބާޒާރުގައި ތެލުގެ އަގު އުފުލުމާ ގުޅިގެން އެއަރލައިންތަކުގެ ޚަރަދު ބޮޑުވި ނަމަވެސް، ދިވެހިންނަށް ވިއްކާ ޓިކެޓުގެ އަގު މިހާތަނަށް ހިފަހައްޓާފައިވަނީ ޚަރަދުތައް އެހެން ގޮތްގޮތުން މެނޭޖްކޮށްގެން ކަމަށް މިނިސްޓަރު ފާހަގަކުރެއްވި. މީގެ އިތުރުން މަތިންދާ ބޯޓުތައް ބެލެހެއްޓުމުގެ ޚަރަދު ބޮޑުވުމަކީވެސް މި ދާއިރާ އެފިޝަންޓްކޮށް ހިންގުމަށް ކުރިމަތިވާ ހުރަހެއް ކަމަށް އެމަނިކުފާނު ވިދާޅުވި.
ޓޫރިޒަމް އެންޑް ސިވިލްއޭވިއޭޝަން މިނިސްޓަރު މުހައްމަދު އަމީން | ރައީސް އޮފީސް
ރާއްޖޭގެ އެތެރޭގެ އުދުހުންތަކުގެ އަގު ކުޑަކުރުމަށް ބޮޑެތި ގޮންޖެހުންތައް އެބަހުރި ކަމަށާއި، މިހާރުވެސް ޓިކެޓުގެ އަގު ހުރީ ހިނގާ ޚަރަދަށްވުރެ ބޮޑުކޮށް ކަމަށް ޓޫރިޒަމް އެންޑް ސިވިލް އޭވިއޭޝަން މިނިސްޓަރ މުހައްމަދު އަމީން ވިދާޅުވެއްޖެ އެވެ.
އަންގާރަ ދުވަހުގެ ރައްޔިތުންގެ މަޖިލީހުގެ ޖަލްސާ ގައި މެމްބަރުންގެ ސުވާލުތަކަށް ޖަވާބު ދެއްވަމުން އަމީން ވިދާޅުވީ، ރާއްޖޭގައި އެކަށީގެންވާ އޮޕަރޭޝަނެއް ހިންގުމަށް ބޭނުންވާ ވަރަށް ފަސިންޖަރުން ނެތް ކަމަށެވެ.
މިިނިސްޓަރ އަމީން އިތުރަށް ވިދާޅުވީ، ރާއްޖޭގެ ބައެއް ޑޮމެސްޓިކް އެއަރޕޯޓްތަކަކީ ވަރަށް ދަށް ޑިމާންޑެއް އޮންނަ ތަންތަން ކަމުގަ އެވެ.
އަމީން ވިދާޅުވީ، ރާއްޖޭގައި ގެންގުޅެނީ އެންމެ ފެންވަރު ރަނގަޅު މަތިންދާ ބޯޓު ކަމަށާއި ބޯޓުތައް ބެލެހެއްޓުމަކީ ވަރަށް ޚަރަދު ބޮޑު ކަމެއް ކަމުގަ އެވެ.
އިތުރަށް މިނިސްޓަރ ވިދާޅުވީ މިއީ ވަރަށް ޗެލެންޖިންގ މަސައްކަތެއް ކަމަށާއި މެދުއިރުމަތީގެ ހަނގުރާމަ އާ ގުޅިގެން ތެލުގެ އަގު މައްޗަށް ދިއުމުން ދުނިޔޭގެ އެއަރލައިންތަކުގެ ޓިކެޓްގެ އަގުތައް 30 ނުވަތަ 40 އިންސައްތަ މައްޗަށް ދިޔަ ކަމަށާއި، އެހެން ނަމަވެސް ޚަރަދުތައް އެހެން ގޮތްގޮތައް މެނޭޖް ކޮށްގެން ދިވެހިންނަށް ޓިކެޓްގެ އަގުބޮޑު ނުކޮށް މިއަދާ ހިސާބަށްވެސް ހިފަހައްޓަމުން އައިސްފައިވާ ކަމަށެވެ.
މިނިސްޓަރ މިހެން ވިދާޅުވި ނަމަވެސް އެތެރޭގެ އުދުހުންތަކުގައި ދަތުރުކުރާ ޓޫރިސްޓުންނަށް ޓިކެޓް ވިއްކާ އަގު މޯލްޑިވިއަން އިން މިދިޔަ އޭޕްރިލްމަހު ވަނީ ބޮޑުކޮށްފަ އެވެ.
މިނިސްޓަރ ތަކުރާރުކޮށް ވިދާޅުވީ، އެތެރޭގެ އުދުހުންތައް އެފިޝަންޓް ކޮށް ގެންދިއުމަށް ބޭނުންވާ މިންވަރަށް ފަސިންޖަރުން ރާއްޖޭގައި ލިބެން ނެތް ކަމުގަ އެވެ.
"އެއީ ހަގީގަތަކީ، ޓިކެޓުގެ އަގު ދަށްކުރުމަކީ، ވަރަށް ޗެލެންޖިންގ މަސައްކަތަކަށް އެއްވެސް ފަރާތަކަށް ވާނި،" މިނިސްޓަރ އަމީން ވިދާޅުވި އެވެ.
