ގޮތެއް ނެތިގެން ބޭސްފަރުވާ އަށް ރާއްޖެއިން ބޭރަށްދާ އާއިލާތަކަށް ރާއްޖެއަށް އައުމަށް ވެސް ސަލާން ޖަހަންޖެހިފައި!

ރައީސް ޑރ. މުހައްމަދު މުއިއްޒުގެ ސަރުކާރުގައި އެންމެ ބޮޑަށް ރައްޔިތުންގެ ފާޑު ކިޔުމާއި، އިތުބާރު ގެއްލިފައިވާ އެއް ދާއިރާއަކީ ނުވަތަ ނިޒާމަކީ ސިއްހީ ނިޒާމެވެ. ރާއްޖޭގައި ސިއްހީ ނިޒާމު ތަރައްގީވަމުން އަންނަ ކަމަށް މިސަރުކާރުން ބުނި ނަމަވެސް އަދިވެސް އެތައް ދިވެހިންނެއް ބޭސްފަރުވާ ހޯދުމުގައި ބޮޑެތި ތަކުލީފުތަކާއި ހާލުގައި ޖެހުމުގެ ހިތި ތަޖުރިބާތަކާ ކުރިމަތިލާން ޖެހޭކަމީ ފެންނަން އޮތް ހަގީގަތެވެ. 

ރާއްޖެއިން ޑޮކްޓަރަށް ދެއްކި ނަމަވެސް ބަލި ދެނެގަތުމުގައި ދިމާވާ ގޮންޖެހުންތަކާއި، ސިއްހީ ފަރުވާގެ ފެންވަރާމެދު އޮތް ކަންބޮޑުވުންތަކުގެ ސަބަބުން ގިނަ ދިވެހީން އަދިވެސް ބަރޯސާވާން ޖެހެނީ ރާއްޖެއިން ބޭރުގެ ހޮސްޕިޓަލްތަކަށެވެ. ޚާއްސަކޮށް އިންޑިއާގެ ކޮޗިން އާއި ޓްރެވިންޑްރަމް ފަދަ ސިޓީތަކަށް ދިވެހީން ކުރާ ދަތުރުތަކަކީ އަމިއްލަ ފަސޭހައަކަށްވުރެ ބޮޑަށް، ފުރާނަ ސަލާމަތްކުރުމަށްޓަކައި މަޖުބޫރުވެގެން ކުރާ ދަތުރުތަކެކެވެ. ނަމަވެސް މި ދަތުރުތަކުގައި ވެސް މާލީ ގޮތުންނާއި އިދާރީ ގޮތުން ދިމާވާ ދަތިތަކުގެ ސަބަބުން އެތައް އާއިލާއެއް މަގުމަތިވެ ހާލުގައި ޖެހޭ މަންޒަރު ފެނުމަކީ ހިތާމަހުރި ކަމެއްނުންތޯ އެވެ. 

އާސަންދައިގެ އެހީގައި ރާއްޖެއިން ބޭރަށް ފޮނުވާ ބަލިމީހުންނާއި، އަމިއްލަ ޚަރަދުގައި ދާ އާއިލާތަކަށް އެންމެ ބޮޑު ގޮންޖެހުމަކާ ކުރިމަތިލާން ޖެހެނީ ދަތުރުފަތުރުގެ ނިޒާމާއި ފްލައިޓް ޝެޑިއުލްތަކުގެ ސަބަބުންނޭ ވެސް މިއަދު ބުނެވެން އޮބަ އޮތެވެ. ހޮސްޕިޓަލްތަކުން ޓެސްޓުތަކުގެ ނަތީޖާއާއި ޑޮކްޓަރުންގެ ލަފާ ލިބުން ލަސްވާއިރު، ފްލައިޓްތަކުގެ ތާވަލުތައް ކުއްލި ގޮތަކަށް ބަދަލުވުމަކީ އާއިލާތައް ވަރަށް ބޮޑު ބިކަހާލެއްގައި ޖައްސާ ކަމެއްނުންތޯ އެވެ. އެއްފަހަރާ ފުރަން ބޭނުންވާ ބޮޑެތި އާއިލާތައް އެކި ދުވަސްވަރަށް ބަހާލައިގެން ޓިކެޓް ހަމަޖެހުމާއި، ޓިކެޓް ހޯދުމަށް ސިޔާސީ ފަރާތްތަކާއި އެކި ވެރިންގެ ގާތުގައި ސަލާންޖަހަން ޖެހުމަކީ ރައްޔިތުންގެ ކަރާމާތް ގެއްލިގެންދާ ވެސް ކަމެކެވެ.

ނަމަވެސް މިފަހަރު މިއޮތީ އެފަދަ ކަމެއް ހިނގާފަ އެވެ. އިންޑިއާގެ ކޮޗިންއަށް ބޭސްފަރުވާއަށް ދިޔަ ދިވެހި އާއިލާއެއް ފުރުމުގެ އިންތިޒާމުތައް ހަމަޖެހުމުގައި ދިމާވި މައްސަލަތަކަކާ ގުޅިގެން ބޮޑު ތަކުލީފަކާ ވަނީ ކުރިމަތިލާން ޖެހިފަ އެވެ. އެކަމާ ގުޅިގެން އެ އާއިލާގެ މެންބަރަކު ވަނީ އެމީހުން ތަހައްމަލު ކުރަމުންދާ ދަތި ހާލަތު ރާއްޖެއެމްވީއާ ވަރަށް އަސަރާއެކު ހިއްސާކޮށްފަ އެވެ.

މި އާއިލާއިން ބޭސްފަރުވާއަށް ކޮޗިންއަށް ދިޔައީ މި މަހުގެ 4 ވަނަ ދުވަހު އެވެ. އަދި އާސަންދަ އެހީ ހަމަޖެހިގެން އެ އާއިލާއަށް ނިސްބަތްވާ ދެމަފިރިންނާއި އެމީހުންގެ ދަރިފުޅު ކޮޗިންއަށް ގޮސްފައިވަނީ މި މަހުގެ 7 ވަނަ ދުވަހު އެވެ. އެ އާއިލާގައި ބޮޑު 6 މީހުންނާއި 3 ކުޑަ ކުދިން ހިމެނެ އެވެ.

އެ އާއިލާއިން މައުލޫމާތު ދިން ގޮތުގައި، ޑޮކްޓަރަށް ދައްކައި ނިމުމާއި، އޮޕަރޭޝަން ކޮށްފައި ތިބި މީހުންނާއި ޓެސްޓުތަކުގެ ރިޕޯޓުތައް ލިބެން އޮތީ ބުރާސްފަތި ދުވަހުގެ މެންދުރުފަހު 2:30 ގެފަހުންނެވެ. އާސަންދައިގެ އެހީގައި ދިޔަ މީހުންނަށް ވެސް މާލެ އައުމަށް ޓިކެޓް ހަމަޖައްސާފައި އޮތީ ބުރާސްފަތި ދުވަހުގެ ރޭގެ ފްލައިޓުން ކަމަށްވާތީ، އާއިލާގެ އެހެން މީހުން ވެސް ވަނީ އެ ރޭ 12:00 ގައި ފުރާ ގޮތަށް އިތުރު ފައިސާ ދައްކައިގެން ޓިކެޓް ލަސްކުރި އެވެ. 

ނަމަވެސް ކުއްލި ގޮތަކަށް އާސަންދައިގެ އެހީގައި ދިޔަ ދެމަފިރިންނާއި ކުއްޖާ ބުރާސްފަތި ދުވަހުގެ ހެނދުނު 10:00 ގައި ފުރަން ޖެހޭ ކަމަށް އީމެއިލް މެދުވެރިކޮށް އެންގި އެވެ. ޑޮކްޓަރަށް ދައްކައި ނުނިމެނީސް ފުރަން އެންގުމުން އެ އާއިލާ ވަނީ ބޮޑު ކަންބޮޑުވުމެއްގެ ތެރެއަށް ވެއްޓިފަ އެވެ. އަދި އެންމެ ފުރަތަމަ މޯލްޑިވިއަންއިން އެންގީ އެންމެ އަވަހަށް ވެސް ޓިކެޓެއް ލިބެން އޮތީ އަންނަ މަހުގެ 1 ވަނަ ދުވަހު ކަމަށް އެ އާއިލާއިން ބުނެފައިވެ އެވެ. 

އިތުރަށް އެތަނުގައި މަޑުކުރަން ޖެހިއްޖެނަމަ އަތުން ބޮޑު ހަރަދެއް ހިނގައި ހާލުގައި ޖެހޭނެތީ، އެކި ފަރާތްތަކަށް ގުޅައި ޝަކުވާ ކުރުމުން، މިހާރު މި މަހުގެ 18 ވަނަ ދުވަހު އެއްބަޔަކު އަދި 23 ވަނަ ދުވަހު އަނެއް ބަޔަކު ފުރާ ގޮތަށް ވަނީ ހަމަޖައްސައިދީފަ އެވެ. އާއިލާއިން ބޭނުންވަނީ އެންމެން އެކުގައި އެއް ފްލައިޓެއްގައި ފުރަން ކަމަށް ވިޔަސް، އިތުރު ގޮތެއް ނެތްނަމަ އެގޮތަށް ވެސް ފުރަން ތައްޔާރަށް ތިބި ކަމަށް އެ އާއިލާއިން ބުނެ އެވެ.

މިއީ ހަމައެކަނި އެއް އާއިލާއަށް ދިމާވި މައްސަލައެއް ނޫން ކަމަށާއި މިފަދަ ހާލުގައި ޖެހިފައިވާ ގިނަ އާއިލާތަކެއް އެބަތިބި ކަމަށް ވެސް އެ ފަރާތުން ފާހަގަކުރި އެވެ.

މިފަދަ ކަންކަމުގެ ސަބަބުން މިއަދު ގައުމީ އެއާލައިން މޯލްޑިވިއަން އަށް ވެސް އިތުބާރެއް ނެތެވެ. ބަލިމީހުން ރާއްޖެއިން ބޭރަށް ގޮސް ހާލުގައި ޖެހި، ސަލާންޖަހަން ޖެހޭ ހާލަތްތައް މަދުކުރުމަށްޓަކައި ދައުލަތުގެ ކަމާބެހޭ މުއައްސަސާތަކާއި އެއާލައިންތަކުން މިއަށްވުރެ ޒިންމާދާރު އިންތިޒާމުތަކެއް ހަމަޖައްސަންޖެހެ އެވެ. ކޮންމެ ދިވެހި ރައްޔިތަކަށް ވެސް އިންސާނީ ކަރާމާތް ނުގެއްލޭ ފަދަ ގޮތަކަށް ފަރުވާ ހޯދުމުގެ ފުރުސަތު ފަހިވެފައި އޮތުމަކީ ދުޅަހެޔޮ މުޖުތަމައެއް ބިނާކުރުމަށް ކޮންމެހެން މުހިންމު ކަމެއްނުންތޯ އެވެ.