ވަގުތީ އެސްޖީ ހަމަޖެއްސި ގޮތާ މެދު ހިތްހަމަނުޖެހި، ފިއްލަދޫ ކައުންސިލްގެ ހުރިހާ މުވައްޒަފުން އެއްފަހަރާ ސަލާމް ބުނެފި
2 ނޮވެމްބަރު 2026 | ހޯމަ 14:52ހއ. ފިއްލަދޫ ކައުންސިލްގެ ވަގުތީ އެސްޖީގެ މަގާމަށް ސިވިލް ސަރވިސް ކޮމިޝަނުން މުވައްޒަފަކު ހަމަޖެއްސި ގޮތާ މެދު ހިތްހަމަނުޖެހުން ފާޅުކޮށް، އެ އިދާރާގެ ހުރިހާ މުވައްޒަފުން އެއްފަހަރާ ސަލާމް ބުނުމުން ކައުންސިލްގެ ޚިދުމަތްތަކަށް ބުރޫއަރައިފި. މުވައްޒަފުން ތުހުމަތުކުރާ ގޮތުގައި މި ނިންމުމަކީ ސިޔާސީ ނުފޫޒު އޮތް ނިންމުމެއް ކަމުން، އެސްޖީ ބަދަލުކުރަންދެން މަސައްކަތަށް ނުނިކުތުމަށް ވަނީ ނިންމާފައި
ހއ. ފިއްލަދޫ ކައުންސިލްގެ އިދާރީ މުވައްޒަފުން | ހއ. ފިއްލަދޫ ކައުންސިލް
ހއ. ފިއްލަދޫ ކައުންސިލްގެ ވަގުތީ ސެކްރެޓަރީ ޖެނެރަލް (އެސްޖީ) ގެ މަގާމަށް ސިވިލް ސަރވިސް ކޮމިޝަން (ސީއެސްސީ) އިން ބޭފުޅަކު ހަމަޖެއްސި ގޮތާ މެދު ހިތްހަމަނުޖެހުން ފާޅުކޮށް، އެ އިދާރާގެ ހުރިހާ އިދާރީ މުވައްޒަފުން އެއްފަހަރާ އޮފީހަށް ސަލާމް ބުނެފި އެވެ.
މި މައްސަލާގައި ހިތްހަމަނުޖެހުން އުފެދުނީ ކައުންސިލްގެ އާންމު އުސޫލުން އެސްޖީއެއްގެ ނަން ނިންމުމުގެ ބަދަލުގައި، ސީދާ ސީއެސްސީން ވަކި މުވައްޒަފަކަށް މަގާމު ހަވާލުކުރަން އެންގުމާ ގުޅިގެންނެވެ. މުވައްޒަފުން ތުހުމަތުކުރާ ގޮތުގައި މިއީ ސިޔާސީ ނުފޫޒުން ނިންމާފައިވާ ނިންމުމެކެވެ. މީގެ އިތުރުން ވަގުތީ ގޮތުން އެ މަގާމާ ހަވާލުވި ފަރާތަކީ ކުރިން އެސިސްޓެންޓް ޑިރެކްޓަރުގެ މަގާމު ފުރާފައިވާ ބޭފުޅެއް ނަމަވެސް، އެއީ މުވައްޒަފުންނާ ގުޅިގެން މަސައްކަތް ކުރައްވާ ބޭފުޅެއް ނޫން ކަމަށް ވެސް މުވައްޒަފުން ވަނީ ބުނެފަ އެވެ.
މި މައްސަލައިގައި ކައުންސިލްގެ ރައީސާ މަޝްވަރާކޮށް، ނިންމުން ބަދަލުކޮށްދިނުމަށް އެދުނު ނަމަވެސް، ސީއެސްސީގެ އެންގުމާ އެއްގޮތަށް ކުރިއަށްދާން ރައީސް ބޭނުންފުޅުވުމުން ހިތްހަމަނުޖެހުން ވަނީ އިތުރަށް ބޮޑުވެފަ އެވެ. އެގޮތުން އާދީއްތަ ދުވަހުގެރޭ ބޭއްވި ސްޓާފް ނައިޓްގައި ވެސް މުވައްޒަފުން ބައިވެރިވެފައި ނުވާއިރު، ހދ. ނޭކުރަންދޫ ކައުންސިލުން ފިއްލަދޫ ކައުންސިލަށް ކުރި ތަޖުރިބާ ދަތުރަށް މަރުހަބާ ކިޔުމަށް ވެސް އެއްވެސް މުވައްޒަފަކު ގޮސްފައެއް ނުވެ އެވެ.
ފިއްލަދޫ ކައުންސިލްގެ ރައީސް މުހައްމަދު ހާމިދު ހާމަކުރެއްވި ގޮތުގައި ހޯމަ ދުވަހު އޮފީސް ހުޅުވިއިރު އިދާރީ މުވައްޒަފުންނާއި، ޑްރައިވަރުން އަދި ސަޕޯޓް ސްޓާފުން ވެސް ވަނީ ސަލާމް ބުނެފަ އެވެ. އޮފީހަށް ނުކުތީ ވަގުތީ އެސްޖީއާއި ތިން ކައުންސިލަރުންގެ އިތުރުން އަންހެނުންގެ ތަރައްގީއަށް މަސައްކަތްކުރާ ކޮމިޓީގެ ރައީސާ އެކަނި ކަމަށާއި، މުވައްޒަފުން ސަލާމް ބުނުމުގެ ސަބަބުން ކައުންސިލްގެ އާންމު ޚިދުމަތްތަކަށް ބުރޫއަރާފައިވާ ކަމަށް އޭނާ ވިދާޅުވި އެވެ. ހާމިދު އިތުރަށް ވިދާޅުވީ ވަގުތީ އެސްޖީއަކަށް ހަމަޖެއްސީ އޮފީހުގައި ތިބި މުވައްޒަފުންގެ ތެރެއިން ރޭންކުގެ ގޮތުން އެންމެ މަތީ ފަރާތް ކަމަށެވެ.
ނަމަވެސް މުވައްޒަފުން ބުނަމުންދަނީ މިހާރު ހަމަޖެއްސި އެސްޖީ ބަދަލުކޮށް، ސިވިލް ސަރވިސް ކޮމިޝަނުން ރަސްމީކޮށް ވަކި ގޮތެއް އަންގަންދެން އަލުން ވަޒީފާއަށް ނުނިކުންނާނެ ކަމަށެވެ.
