މުވައްޒަފުންގެ މަަސައްކަތުގެ ފެންވަރު މަތިކުރުމުގެ ގޮތްތައް ހޯދުމަށް ދިރާސާކުރަން ޖެހޭ: ސީއެސްސީގެ ރައީސް

ސިވިލް ސާވިސްގެ މުވައްޒަފުންގެ މަަސައްކަތުގެ ފެންވަރު މަތިކުރުމުގެ ގޮތްތައް ހޯދުމަށް ދިރާސާކުރަން ޖެހޭ ކަމަށް ސިވިލް ސާވިސް ކޮމިޝަން (ސީއެސްސީ)ގެ ރައީސް މުހައްމަދު މުޖުތާޒު ވިދާޅުވެއްޖެ އެވެ.

ހޮނިހިރު ދުވަހު ސޯޝަލް ސެންޓަރުގައި ވަނީ 300ށް ވުރެ ބައިވެރިންނާއެކު ސީއެސްސީގެ މިއަހަރުގެ ކޮންފަރެންސް ފަށާފަ އެވެ. މި ކޮންފަރެންސް ފައްޓަވައި ދެއްވީ އެޑިޔުކޭޝަން މިނިސްޓަރު ޑރ. އިސްމާއިލް ޝަފީއު އެވެ.

މިރަސްމިއްޔާތުގައި ވާހަކަ ދައްކަވަމުން ސީއެސްސީގެ ރައީސް މުޖުތާޒު ވިދާޅުވީ، މޯލްޑިވްސް 2.0 ތަސައްވުރާއެކު އެ ސަރވިސްގެ ޚިދުމަތްތަކަށް ބޮޑެތި ބަދަލުތަކެއް އަންނަމުންދާ ކަމަށާއި، މި ބަދަލުތަކަށް އެންމެންވެސް ހޭލުންތެރިވާން ޖެހޭ ކަމަށެވެ. އަދި މި ކޮންފަރެންސްގައި ރައްޔިތުންނަށް ފޯރުކޮށްދެއްވަމުންދާ ޚިދުމަތްތައް ހަރުދަނާ ކުރުމަށާއި، ޓެކްނޮލޮޖީގެ އެހީގައި ގެނެވޭނެ ބަދަލުތަކާއި މިހާރު ދިމާވަމުންދާ މައްސަލަތަކާއި ގުޅެގޮތުން މަޝްވަރާ ކުރާނެ ކަމަށް އޭނާ ވިދާޅުވި އެވެ. 

ސީއެސްސީގައި 35،000 އަށް ވުރެ ގިނަ މުވައްޒަފުން ހަރަކާތްތެރިވާކަން ފާހަގަކުރައްވައި މުޖުތާޒު ވިދާޅުވީ، މުވައްޒަފުން ގިނަ ނަމަވެސް ރާއްޖެ އުފެދިފައިވާ ގޮތުން ޚިދުމަތްތައް ދިނުމަށް ގޮންޖެހުންތައް ކުރިމަތިވާ ކަމަށެވެ. ނަމަވެސް ޒަމާނީ ޓެކްނޮލޮޖީގެ އެހީގައި ފުރިހަމަ ޚިދުމަތެއް ފޯރުކޮށްދިނުމަށް މަސައްކަތް ކުރާ ކަމަށް އޭނާ ވިދާޅުވި އެވެ. 

މުޖުތާޒު ވިދާޅުވީ، ސީއެސްސީގެ ޚިދުމަތްތައް ތަރައްގީ ކުރުމަށް މި ނިޒާމު ހަރުދަނާ ކުރަން ޖެހޭ ކަމަށާއި، ކަމާ ގުޅުންހުރި ދިރާސާތައް ހުށަހަޅާނެ ކަމަށެވެ.

އެ އިލްމީ ދިރާސާތަކުގެ ތެރޭގައި ހިންގުން ހަރުދަނާ ކުރުމާއި، އިދާރާތަކުގެ މަސައްކަތުގެ ފެންވަރު ރަނގަޅު ކުރުމާއި ޒަމާނީ ޓެކްނޮލޮޖީ ބޭނުންކުރުމާއި މަސައްކަތުގެ ރައްކާތެރި މާހައުލެއް ގާއިމުކުރުން ފަދަ ކަރުދާސްތައް ހުށަހަޅާ މަޝްވަރާ ކުރާނެ ކަމަށް އޭނާ ވިދާޅުވި އެވެ. އަދި ވިދާޅުވީ މި ދިރާސާތަކުން ލިބޭ މައުލޫމާތު އެންމެ ފުރިހަމަ ގޮތުގައި ބޭނުންކޮށް، ރާއްޖޭގެ މާހައުލަށާއި ހާލަތަށް އެންމެ އެކަށޭނަ ގޮތްތައް ދެނެގަނެވޭނެ ކަމަށެވެ. 

މީގެ އިތުރުން މުޖުތާޒު ވިދާޅުވީ، ސީއެސްސީގެ ޚިދުމަތްތައް ލިބިގަންނަ ރައްޔިތުންގެ އުއްމީދާ އެއްވަރަށް މަސައްކަތް ނުކުރެވޭކަން ގަބޫލުކުރާ ކަމަށާއި، ރައްޔިތުންގެ ފަރާތުން އެންމެ ބޮޑަށް ލިބެމުންދާ ޝަކުވާއަކީ އޮފީސްތަކުން ދެވޭ ޚިދުމަތްތައް ލަސްވުމާއި ފޯނަށް ޖަވާބު ނުދިނުމާއި މުވައްޒަފުންގެ ފަރުވާ ކުޑަވުމުގެ މައްސަލަ ކަމަށެވެ.

މުޖުތާޒު ވިދާޅުވީ މި މައްސަލަތަކަށް ވެސް ހައްލު ހޯދުމަށްޓަކައި މުވައްޒަފުންގެ ފެންވަރު ބެލުމުގެ ނިޒާމު ހަރުދަނާކޮށް މަސައްކަތްތަކެއް ކޮށްފައިވާ ކަމަށާއި، މަަސައްކަތުގެ ފެންވަރު މަތިކުރެވޭނެ ގޮތްތައް ހޯދުމަށްޓަކައި ވެސް ދިރާސާކުރަން ޖެހޭ ކަމަށެވެ. އަދި ވިދާޅުވީ  މިކުރެވޭ ދިރާސާތަކުގެ އަލީގައި މައްސަލަތަކަށް ހައްލެއް ލިބޭނެ ކަމަށް އުންމީދު ކުރާ ކަމަށެވެ. 

މިއަހަރުގެ ސިވިލް ސާވިސް ކޮންފަރެންސަކީ މިހާތަނަށް ބާއްވާ ފަސްވަނަ ކޮންފަރެންސެވެ. މިއީ ސިވިލް ސާވިސްގެ މަސައްކަތާއި ޚިދުމަތްތައް އިތުރަށް ހަރުދަނާކުރުމަށް، ކޮންމެ ދެ އަހަރަކުން އެއް އަހަރު ބާއްވާ ކޮންފަރެންސްއެކެވެ. 

މި އަހަރުގެ ކޮންފަރެންސްގައި 8 ދާއިރާއަކުން 18 ދިރާސީ ކަރުދާސްވަނީ ހުށައަޅައިފަ އެވެ.

މިކޮންފަރެންސް ހުޅުވުމުގެ ރަސްމިއްޔާތުގައި 2026 އިން 2030 ގެ ނިޔަލަށް ސިވިލް ސާވިސްގެ އެކްޝަން ޕްލޭން އިފްތިތާހްކޮށްފައިވެ އެވެ. އަދި ކޮންފަރެންސްގެ އެބްސްޓްރެކްޓް ފޮތް ވެސް ވަނީ ނެރެފަ އެވެ.