ސިވިލް ސާވިސް މުވައްޒަފުންނަށް ގަޑިނުޖެހޭ ގޮތަށް 30 މިނެޓުގެ "ބަފާ ޓައިމް" އެއް ދީފި
މި އުސޫލުގެ ދަށުން ލަސްވާ ވަގުތު އެ ދުވަހުގެ މަސައްކަތު ގަޑީގެ ތެރޭގައި ފުރިހަމަކުރަން ޖެހޭއިރު، 30 މިނެޓަށްވުރެ އިތުރުވާނަމަ ބަލާނީ ގަޑިޖެހުނީ ކަމަށް. މީގެ މައިގަނޑު މަގުސަދަކީ މުވައްޒަފުންނަށް ދިމާވާ ޚާއްސަ ހާލަތްތަކުގައި މަސައްކަތު ގަޑި އެޖަސްޓް ކުރުމުގެ ލުއި ފުރުސަތެއް ފަހިކޮށްދިނުން.
ވެލާނާގެ: ސިވިލް ސާވިސްގެ ގިނަ އޮފީސްތަކެއް ހުންނަ އިމާރާތެއް
ސިވިލް ސާވިސްގެ މުވައްޒަފުންނަށް ދިމާވާ ކުއްލި ނުވަތަ ޚާއްސަ ހާލަތްތަކާ ގުޅިގެން، ރަސްމީ ގަޑިއަށް އޮފީހަށް ހާޒިރުނުވެވޭ ހާލަތްތަކުގައި ގަޑިނުޖެހޭ ގޮތަށް 30 މިނެޓުގެ "ބަފާ ޓައިމް" އެއް ލިބޭ ގޮތަށް ސިވިލް ސާވިސް ގަވާއިދަށް އިސްލާހު ގެނެސްފި އެވެ.
ސިވިލް ސާވިސް ކޮމިޝަނުން ގެނައި މި އިސްލާހުގައި ބަޔާންކޮށްފައިވާ ގޮތުގައި، "ބަފާ ޓައިމް" އަކީ މުވައްޒަފުންނަށް ދިމާވާ ކުއްލި ދަތިތަކުގެ ސަބަބުން ގަޑިއަށް ހާޒިރުނުވެވޭ ހާލަތްތަކުގައި ލުއި ދިނުމަށް ކަނޑައެޅި ވަގުތެކެވެ. މި އައު އުސޫލުގެ ދަށުން ކޮންމެ މުވައްޒަފަކަށްވެސް ރަސްމީ މަސައްކަތު ގަޑި ފެށޭ ވަގުތުން ފެށިގެން 30 މިނެޓުގެ މުއްދަތެއް ބަފާ ޓައިމްގެ ގޮތުގައި ލިބޭނެ އެވެ.
މި އުސޫލުގެ ދަށުން ބަފާ ޓައިމް ބޭނުންކުރާ މުވައްޒަފުން، އެ ވަގުތުގެ ތެރޭގައި އޮފީހަށް ހާޒިރުވާނަމަ، އެކަން ދިމާވި ސަބަބު ބަޔާންކޮށް އެ އިދާރާއެއްގެ އެޗްއާރު ސެކްޝަނަށް އަންގަން ޖެހޭނެ އެވެ. ނަމަވެސް، ރަސްމީ ގަޑި ފެށޭތާ 30 މިނެޓަށްވުރެ ލަހުން އޮފީހަށް ހާޒިރުވާ މުވައްޒަފުން ބަލާނީ ގަޑިޖެހިގެން ހާޒިރުވި މުވައްޒަފުންގެ ގޮތުގަ އެވެ.
މީގެ އިތުރުން، ބަފާ ޓައިމްގެ ތެރޭގައި ހާޒިރުވާ މުވައްޒަފުން، ލަސްވި ވަގުތު އެ ދުވަހުގެ މަސައްކަތު ގަޑީގެ ތެރޭގައި ފުރިހަމަ ކުރަން ޖެހޭނެ ކަމަށްވެސް އުސޫލުގައިވެ އެވެ. މިސާލަކަށް، އޮފީސް ގަޑިއަކީ ހެނދުނު 8:00 ކަމަށްވެފައި، މުވައްޒަފު ހާޒިރުވީ 8:20 ގައި ނަމަ، އެ މުވައްޒަފަކު އެ ދުވަހު މަސައްކަތް ނިންމާފައި ދެވޭނީ މެންދުރުފަހު 2:20 ގަ އެވެ.
ސިވިލް ސާވިސް ކޮމިޝަނުން ބުނީ، މި އިސްލާހު ގެނައުމުގެ މައިގަނޑު މަގުސަދަކީ މުވައްޒަފުންނަށް ދިމާވާ ދަތި ހާލަތްތަކުގައި ލުޔެއް ދިނުން ކަމަށެވެ. އެހެންނަމަވެސް، ބަފާ ޓައިމްގެ ގޮތުގައި ކަނޑައެޅިފައިވާ 30 މިނެޓަށްވުރެ އިތުރުވާ އެއްވެސް ވަގުތަކީ އެޖަސްޓް ކުރެވޭނެ ވަގުތެއް ނޫން ކަމަށްވެސް އެ ކޮމިޝަނުން ވަނީ ހާމަކޮށްފަ އެވެ.
