އިސްރާއީލުގެ ޖަލުތަކުގައި ޣައްޒާގެ އަސީރުންނަށް ކުރާ ލާއިންސާނީ އަނިޔާތަކާ ދެކޮޅަށް އަރަބި ލީގު ތެދުވެއްޖެ

ޔަހޫދީ އިސްރާއީލުގެ ރަމްލާ ޖަލުގައި ބަންދުކޮށްފައި ތިބި ޣައްޒާގެ ރައްޔިތުންނަށް ކުރަމުންދާ ލާއިންސާނީ އަނިޔާތަކާއި، ނިޒާމީ ގޮތެއްގައި ހިންގަމުންދާ އިހާނެތި އަމަލުތަކާ ގުޅޭގޮތުން ބައިނަލްއަގުވާމީ މިނިވަން ތަހުގީގެއް ހިންގުމަށް އަރަބި ލީގުން އާދީއްތަ ދުވަހު ގޮވާލައިފި އެވެ. މިއާއެކު، މި އަމަލުތަކަށް ޒިންމާވާންޖެހޭ އެންމެހައި ފަރާތްތައް ޖަވާބުދާރީ ކުރުވުމަށް ވެސް އެ އިއްތިހާދުން ވަނީ ބާރުއަޅާފަ އެވެ.

އަރަބި ލީގުން ނެރުނު ބަޔާނެއްގައި، އެ ޖަލުގެ 'ރަކެވެތު' ވިންގުގައި ބަންދުކޮށްފައި ތިބި އަސީރުންނަށް ތަކުރާރުކޮށް ދެމުންދާ ހަމަލާތައް އެންމެ ހަރުކަށި އިބާރާތުން ކުށްވެރިކޮށްފައިވެ އެވެ. އެ ހަމަލާތަކުގެ ސަބަބުން އަސީރުންނަށް ބޮޑެތި ޒަޚަމުތަކެއް ލިބި، ބައެއް އަސީރުންގެ ހަށިތައް ފިހިފައިވާ ކަން އެ ބަޔާނުގައި ފާހަގަކުރި އެވެ.

Advertisement

"އިންސާނިއްޔަތާ ޚިލާފު ޖަރީމާތައް" އަދި މުޢާހަދާތަކާ ޚިލާފުވުން

އަރަބި ލީގުން ސިފަކުރި ގޮތުގައި، ޔަހޫދީ އިސްރާއީލުން ހިންގާ މި އަމަލުތަކަކީ ޖެނީވާ މުޢާހަދާތަކާއި އަނިޔާކުރުމާ ދެކޮޅު މުޢާހަދާ ހިމެނޭހެން، ބައިނަލްއަގުވާމީ އިންސާނީ ގާނޫނުތަކާ ކަނޑައެޅިގެން ޚިލާފު ޖަރީމާތަކެކެވެ. ހަމަމިއާއެކު، މިއީ އިންސާފުގެ ކުރިމައްޗަށް ގެނެސް ޖަވާބުދާރީ ކުރުވަންޖެހޭ ފަދަ "އިންސާނިއްޔަތާ ޚިލާފު ޖަރީމާތައް" ކަމަށް އެ އިއްތިހާދުން ބުންޏެވެ.

މި އިހާނެތި އަމަލުތައް ވަގުތުން ހުއްޓާލުމަށް ޑިމާންޑުކޮށް، އަސީރުން ތިބި ހާލަތު ދެނެގަތުމަށާއި ބޭނުންވާ ސިއްހީ ފަރުވާ ފޯރުކޮށްދިނުމަށް ޓަކައި، ބައިނަލްއަގުވާމީ ރެޑް ކްރޮސް ކޮމިޓީ (އައިސީއާރްސީ) އަދި މިނިވަން މޮނިޓަރުންނަށް އެއްވެސް ހުރަހެއް ނެތި ޖަލަށް ވަނުމުގެ ފުރުސަތު ދިނުމަށް އަރަބި ލީގުން ވަނީ ޔަހޫދީ އިސްރާއީލަށް ގޮވާލާފަ އެވެ. އަދި، ބަލިމީހުންނާއި ޒަޚަމުކޮށްލާފައިވާ އަސީރުން ވަގުތުން މިނިވަންކުރުމަށާއި، އެއްވެސް ޝަރުޢީ އަސާސެއް ނެތި ހިންގާ ހައްޔަރުކުރުމުގެ ޖަރީމާތައް ހުއްޓާލުމަށް ވެސް ވަނީ ގޮވާލާފަ އެވެ.

ރަކެވެތު ވިންގުގެ އަނިޔާވެރި އަމަލުތަކުގެ ތަފުސީލު

އަރަބި ލީގުގެ މި ބަޔާން ނެރެފައި މި ވަނީ، ޔަހޫދީ ރަމްލާ ޖަލުގެ ރަކެވެތު ވިންގުގައި ތިބި ޣައްޒާގެ އަސީރުންނަށް ދެމުންދާ ތަކުރާރު ހަމަލާތަކުގެ ތަފުސީލު ހާމަކޮށް، ފަލަސްތީނުގެ ޕްރިޒަނަރސް މީޑިއާ އޮފީހުން އޮކްޓޫބަރު 27 ގައި ނެރުނު ރިޕޯޓަކާ ގުޅިގެންނެވެ.

އެ ރިޕޯޓުގައި ބަޔާންކޮށްފައިވާ ގޮތުގައި، މި ހަމަލާތައް މައިގަނޑު ގޮތެއްގައި ދެމުން ގޮސްފައި ވަނީ ކޮންމެ ހަފުތާއެއްގެ ވެސް ހުކުރު އަދި ހޮނިހިރު ދުވަސްތަކުގަ އެވެ. މި ގޮތުން، ލަކުޑިގަނޑުތަކުން ތަޅައި އަނިޔާކުރުމާއި، ޕެޕަރ ސްޕްރޭއާއި ކަރުނަގޭސް ޖެހުމާއި، ރަބަރު ވަޒަނާއި ބާރު އަޑުފައްގަނޑާއެކު ގޮވާ ސިއްސުވާލާ ބޮން ނުވަތަ 'ސްޓަން ގްރެނޭޑް' ބޭނުންކުރަމުންދާ ކަމަށް އެ އޮފީހުން ބުންޏެވެ. މީގެއިތުރުން، ޖަލު ބަލަހައްޓާ ގާޑުން ފުލުހުންގެ ކުއްތާތަކާއެކު ގޮޅިތަކަށް ވަދެ، ސަވައިލަންސް ކެމެރާ ނުހުންނަ ކޮޓަރިއަކަށް އަސީރުން ގެންގޮސް ވަރަށް އިހާނެތިކޮށް އަނިޔާކުރަމުންދާ ކަން ވެސް އެ ރިޕޯޓުގައި ފާހަގަކޮށްފައިވެ އެވެ.

އަނިޔާކުރުން މި ގޮތުގައި ކުރިއަށްދާނަމަ އަސީރުންގެ ފުރާނައަށް އިޢާދަނުކުރެވޭ ފަދަ ނުރައްކަލެއް އެބައޮތް ކަމަށާއި، ޚާއްސަކޮށް މިހާރު ވެސް ބަލިވެފައިވާ އަދި ޒަޚަމުކޮށްލާފައިވާ އަސީރުންގެ ފުރާނައަށް އޮތް ބިރު އިންތިހާއަށް ބޮޑު ކަމަށް ބުނެ އެ އޮފީހުން ވަނީ ސީރިއަސް އިންޒާރެއް ދީފަ އެވެ.

ފަލަސްތީނުގެ އަސީރުން ހިމާޔަތްކުރުމަށާއި، ބައިނަލްއަގުވާމީ ގާނޫނުތަކާ ޚިލާފުވެ އަދަބު ނުލިބި ސަލާމަތްވުމުގެ ސަގާފަތް ހުއްޓުވުމަށް ޓަކައި، ބައިނަލްއަގުވާމީ މުޖުތަމަޢާއި، އދ. ގެ އިންސާނީ ހައްގުތަކާ ބެހޭ ކައުންސިލާއި، އދ. ގެ އާންމު މަޖިލީހުން ވަގުތުން ފިޔަވަޅު އެޅުމަށް އަރަބި ލީގުން ވަނީ ބާރުއަޅާފަ އެވެ.

އަރަބި ލީގުގެ މި ބަޔާނާ ގުޅިގެން ޔަހޫދީ އިސްރާއީލުގެ ކަމާބެހޭ އިދާރާތަކުން އެއްވެސް ރައްދެއް ދީފައެއް ނުވެ އެވެ. ރަމްލާ ޖަލަކީ އިސްރާއީލުގެ މެދުތެރޭ ސަރަހައްދުގައި ހުންނަ، އަދި އިސްރާއީލް ޕްރިޒަން ސަރވިސްގެ ބެލުމުގެ ދަށުން ހިންގަމުން އަންނަ އަސީރުންނަށް ލާއިންސާނީ އަނިޔާދޭ ޖަލެކެވެ.