2023 އޮކްޓޫބަރަށްފަހު ހުޅަނގު އައްސޭރީގެ ރައްޔިތުންނަށް 62,916 ހަމަލާދީފައިވޭ: ރިޕޯޓު
5 އޮކްޓޯބަރު 2026 | ހޯމަ 05:11އިސްރާއީލުން ހުޅަނގު އައްސޭރީގައި ހިންގާ ލާއިންސާނީ އަމަލުތަކުގައި 66 މީހުން ޝަހީދުކޮށް، ގިނަ އަދަދެއްގެ އިމާރާތްތަކާއި ދަނޑުބިންތައް ހަލާކުކޮށްލާފައިވާ ކަމަށް ފަލަސްތީނުގެ ކޮމިޝަނަކުން ހާމަކޮށްފި. މީގެ އިތުރުން، ފާއިތުވި ތިން ދަހަރުގެ ތެރޭގައި އެންމެ ގިނަ އަދަދަކަށް ބިން ފޭރިގަނެ، ޣައިރުގާނޫނީ އާބާދީތައް ފުޅާކުރުމުގެ މަޝްރޫއުތައް އިސްރާއީލުން ވަނީ ވަރުގަދަކޮށްފައި
އިސްރާއީލުގެ ޓެރެރިސްޓު ވަޒަންވެރިންގެ ޖަރީމާތަކުގައި ހުޅުޖަހައި އަންދާލާފައިވާ ފަލަސްތީނުގެ ރައްޔިތުންގެ ކާރުތަކެއް | އަނަދޮލު އޭޖެންސީ
2023 ވަނަ އަހަރުގެ އޮކްޓޯބަރު މަހުގެ 7 ވަނަ ދުވަހު ހަމާސްއިން އިސްރާއީލަށް ދިން ޖިހާދުގެ ހަމަލާއަށް ފަހު، އިސްތިއުމާރު ކޮށްފައިވާ ހުޅަނގު އައްސޭރިއާއި އިރުމަތީ ގުދުސްގައި ފަލަސްތީންގެ ރައްޔިތުންނާއި އެ މީހުންގެ ބިންތަކާއި މުދަލަށް އަމާޒުކޮށް އިސްރާއީލްގެ އަސްކަރިއްޔާއާއި ޓެރެރިސްޓު ވަޒަންވެރިން 62,916 ހަމަލާއެއް ދީފައިވާ ކަމަށް ފަލަސްތީންގެ ކޮމިޝަނަކުން އާދީއްތަ ދުވަހު ހާމަކޮށްފި އެވެ.
އިސްރާއީލްގެ ސިފައިން 48,174 ހަމަލާ ދީފައިވާއިރު، އިސްރާއީލްގެ ޓެރެރިސްޓު ވަޒަންވެރިން އިތުރު 14,742 ހަމަލާ ދީފައިވާ ކަމަށް، 'ދި ކޮލޮނައިޒޭޝަން އެންޑް ވޯލް ރެސިސްޓެންސް ކޮމިޝަން' އިން ބުންޏެވެ. އެންމެ ގިނަ ހަމަލާ ރެކޯޑުކުރެވިފައި ވަނީ 10,840 ހަމަލާއާއެކު އަލް-ޚަލީލްގަ އެވެ. ދެން އެންމެ ގިނައިން ހަމަލާ ދީފައި ވަނީ 10,594 ހަމަލާއާއެކު ރާމަﷲ އާއި އަލް-ބީރާއަށެވެ. އަދި، ނާބުލުސްއަށް 10,261 ހަމަލާ ދީފައިވެ އެވެ.
މި މުއްދަތުގެ ތެރޭގައި އިސްރާއީލްގެ ޓެރެރިސްޓު ވަޒަންވެރިން ދިން ހަމަލާތަކުގައި ފަލަސްތީންގެ 66 މީހުން ޝަހީދުކޮށްލާފައިވާ ކަމަށް ރިޕޯޓުގައި ބުނެފައިވެ އެވެ. ފަލަސްތީންގެ ބިންތަކާއި މުދަލަށް އަމާޒުކޮށް 1,182 ފަހަރު ހުޅުޖެހުމުގެ ހަމަލާތައް އަމާޒުކޮށްފައިވާ ކަމަށް ވެސް ކޮމިޝަނުން ރެކޯޑުކޮށްފައިވެ އެވެ. މިއާއެކު، 147,111 ގަސް މުލުން ލުހެލައި ނުވަތަ ގެއްލުންދީފައިވާއިރު، މީގެ ތެރޭގައި 100,000 އަށް ވުރެ ގިނަ ޒައިތޫނި ގަސް ހިމެނެ އެވެ.
އިސްރާއީލްގެ ވަޒަންވެރިން ވަނީ އާ 211 އައުޓްޕޯސްޓެއް ގާއިމުކުރުމަށް ވެސް މަސައްކަތްކޮށްފަ އެވެ. މި ކަމުގެ އަސަރު ފަލަސްތީންގެ 376 އަވަށަކާއި މުޖުތަމައަކަށް ފޯރާފައިވެ އެވެ. އިސްރާއީލްގެ ކަމާބެހޭ ފަރާތްތަކުން 1,814 އިމާރާތް ތަޅާލުމުގެ އޮޕަރޭޝަން ހިންގާފައިވާ ކަމަށް ވެސް ރިޕޯޓުގައި ބުނެފައިވެ އެވެ. މި އޮޕަރޭޝަންތަކުގެ އަސަރު 5,059 އިމާރާތަކަށް ކޮށްފައިވާއިރު، އޭގެ ތެރޭގައި މީހުން ދިރިއުޅޭ 1,894 ގެ ހިމެނޭ ކަމަށް ވެސް އެ ކޮމިޝަނުން ބުންޏެވެ.
އަސްކަރީ އަމުރުތަކާއި "ދައުލަތުގެ ބިން" ކަމަށް ކަނޑައަޅައިގެން ފަލަސްތީންގެ ގާތްގަނޑަކަށް 15,864 އޭކަރުގެ ބިން އަތުލައިގަނެފައިވާ ކަމަށް ވެސް ރިޕޯޓުގައި ހާމަކޮށްފައިވެ އެވެ. މިއީ ފާއިތުވި ތިން ދަހަރުގެ ތެރޭގައި އެންމެ ގިނަ އަދަދެއްގެ ބިންތަކެއް ފޭރިގަަނެފައިވާ މުއްދަތެވެ.
އިސްތިއުމާރު ކޮށްފައިވާ ހުޅަނގު އައްސޭރިއާއި އިރުމަތީ ގުދުސްގައި ދިހަހާހަށް ވުރެ ގިނަ ހައުސިންގ ޔުނިޓު ހިމެނޭ ގޮތަށް، އިސްރާއީލްގެ ޣައިރުގާނޫނީ އާބާދީތަކުގެ 415 ޕްލޭނެއް ކުރިއަށް ގެންގޮސްފައިވާ ކަމަށް ވެސް ރިޕޯޓުގައި ބުނެފައިވެ އެވެ. އިތުރު 15,760 ސެޓްލްމަންޓް ޔުނިޓަށް އިސްރާއީލްގެ ކަމާބެހޭ ފަރާތްތަކުން 97 ޓެންޑަރު ނެރެފައިވެ އެވެ. މީގެ ތެރޭގައި ގުދުސްގެ އިރުމަތީގައިވާ އީ1 ސަރަހައްދު ވެސް ހިމެނެ އެވެ. އެއީ، ހުޅަނގު އައްސޭރި ބައިބައިކޮށްލައި، ފަލަސްތީނުގެ ރައްޔިތުން އިތުރަށް ނިކަމެތިކޮށްލުމަށް ހިންގާ ޖަރީމާއެކެވެ.
މި ފިޔަވަޅުތަކާއެކު، "ޑިފެކްޓޯ އެނެކްސޭޝަން" ހިންގުމަށް ނުވަތަ ޣައިރުގާނޫނީކޮށް ބިންތައް ފޭރިގަތުމަށް އަމާޒުކޮށްގެން ގާނޫނުތައް ހެދުން އިތުރުކޮށްފައިވާ ކަން ވެސް ކޮމިޝަނުން ވަނީ ހާމަކޮށްފަ އެވެ. އަދި، ޣައިރުގާނޫނީ އާބާދީތައް ފުޅާކުރުން ހުއްޓުވުމަށާއި، މި ކަމުގައި ޒިންމާވާ ފަރާތްތައް ޖަވާބުދާރީކުރުވުމަށް ބައިނަލްއަގުވާމީ ފެންވަރުގައި ފިޔަވަޅު އެޅުމަށް އެ ކޮމިޝަނުން ވަނީ ގޮވާލާފަ އެވެ.
މަސްދަރު: އަނަދޮލު އޭޖެންސީ
