ތޫފާން އޮރްނޮބްގެ ހިތާމައަށް ފަހު، އިތުރު ނުރައްކަލަކާއެކު އާންދްރާ ޕްރަދޭޝް ތޫފާން 'މުރާސު' އަށް ތައްޔާރުވަނީ
2 ނޮވެމްބަރު 2026 | ހޯމަ 06:39ބާރުގަދަ ތޫފާން 'މުރަސު' އާންދްރާ ޕްރަދޭޝްގެ އައްސޭރިފަށަށް އަރާނެ ކަމަށް ބެލެވޭތީ، ބިންތިރި ސަރަހައްދުތަކުން މީހުން ބަދަލުކުރުމުގެ މަސައްކަތް އެ ސްޓޭޓުގެ ސަރުކާރުން ފަށައިފި. ގަޑިއަކު 110 ކިލޯމީޓަރުގެ ބާރުމިނުގައި ވައިޖެހޭނެ ކަމަށް ލަފާކުރެވޭ މި ތޫފާނުގެ ސަބަބުން ކަރަންޓުގެ ޚިދުމަތަށް ބޮޑެތި ބުރޫތަކެއް އަރާނެ ކަމަށް ބެލެވޭތީ، ކަމާބެހޭ އިދާރާތަކުން މިހާރު ވަނީ ތައްޔާރީ ހާލަތަކަށް އައިސްފައި
އިންޑިއާގެ އާންދަރާ ޕްރަދޭޝް ސަރަހައްދަށް އެރި ބާރުގަދަ ތޫފާން އޮރްނޮބްގެ ސަބަބުން ގެއްލުންވި ގެއެއް މަރާމާތުކުރުމަށް އެ ގޭގެ އަހުލުވެރިން މަސައްކަތް ކުރަނީ | ރޮއިޓަރސް
އިންޑިއާގެ ދެކުނުގެ ސްޓޭޓެއް ކަމަށްވާ އާންދްރާ ޕްރަދޭޝްގެ އައްސޭރިފަށުގެ ސަރަހައްދުތަކާ ދިމާއަށް ބާރުގަދަ ތޫފާން 'މުރާސު' ދަތުރުކުރަމުންދާތީ، އެ ސްޓޭޓުން ރައްކާތެރިކަމުގެ ފިޔަވަޅުތައް އަޅަން ފަށައިފި އެވެ. މި ތޫފާން އެއްގަމަށް އަރާނެ ކަމަށް ލަފާކުރެވެނީ ހޯމަ ދުވަހުގެ މެންދަމުގެ ވަގުތެއްގަ އެވެ.
މި އައު ތޫފާން އިންޑިއާގެ އައްސޭރިފަށާ ދިމާއަށް މިސްރާބު ޖަހާފައި މި ވަނީ، އެ ޤައުމުގެ ދެކުނު އައްސޭރިފަށަށް އެރި ތޫފާން 'އޮރްނޮބް' ގެ ސަބަބުން ފަސް މީހުން މަރުވިތާ މަދު ދުވަސްކޮޅެއްގެ ތެރޭގަ އެވެ. އިންޑިއާގެ މޫސުމާ ބެހޭ އިދާރާއިން (އައިއެމްޑީ) ހޯމަ ދުވަހު ނެރުނު ރިޕޯޓުގައި ބުނީ، ބާރުގަދަ ތޫފާން މުރާސު ދަތުރުކުރާނެ ކަމަށް ބެލެވެނީ ހުޅަނގު އުތުރަށް ކަމަށެވެ. މިއާއެކު، ހޯމަ ދުވަހުގެ މެންދަމާއި އަންގާރަ ދުވަހުގެ ފަތިހުގެ ވަގުތުތަކާ ދެމެދު، އޮންގޯލު ސަރަހައްދުގެ ކައިރިން ނެލްލޫރާއި ނަރްސާޕޫރާ ދެމެދުގެ އައްސޭރިފަށަށް މި ތޫފާން އަރާނީ ގަޑިއަކު 100 އާއި 110 ކިލޯމީޓަރާ ދެމެދުގެ ބާރު ވަޔާއެކުގައި ކަމަށް ވެސް އެ އިދާރާއިން އިންޒާރުކުރި އެވެ.
ހާލަތު ގޯސްވެދާނެ ކަމަށް ބަލައި، ތޫފާނަށް ފުރިހަމައަށް ތައްޔާރުވެ ތިބުމަށް އާންދްރާ ޕްރަދޭޝްގެ ޗީފް މިނިސްޓަރު ޗަންދްރަބާބޫ ނައިޑޫ ވަނީ ކަމާބެހޭ އޮފިޝަލުންނަށް އިރުޝާދު ދެއްވާފަ އެވެ. ލަފާކުރެވޭ ހިސާބުތަކަށް ބަލާއިރު، ތޫފާނުގެ ސަބަބުން 6،000 އާއި 8،000 އާ ދެމެދުގެ އަދަދަކަށް ކަރަންޓު ދަނޑިތަކަށް ގެއްލުންވެދާނެ ކަމަށާއި، މިއީ ކަރަންޓުގެ ޚިދުމަތް ފޯރުކޮށްދިނުމަށް އޮތް "ބޮޑު ނުރައްކަލެއް" ކަމަށް ނައިޑޫ ވިދާޅުވި އެވެ.
ހަމަމިއާއެކު، އެ ސަރަހައްދުގެ ޑެޕިއުޓީ ޗީފް މިނިސްޓަރު ޕަވަން ކަލްޔާން ވިދާޅުވީ، މި ތޫފާނުގެ ސަބަބުން ސްޓޭޓުގެ ނެލްލޫރު، ޕްރަކާޝަމް، ބާޕަތުލާ އަދި ކްރިޝްނާ ޑިސްޓްރިކްޓަށް ބޮޑެތި އަސަރުތަކެއް ކުރާނެ ކަމަށެވެ. މީގެ އިތުރުން، ތޫފާނުގެ ނުރައްކާ އޮތް ބިން ތިރި ސަރަހައްދުތަކުގައި ދިރިއުޅޭ ރައްޔިތުން ރައްކާތެރި ހިސާބުތަކަށް ބަދަލުކުރުމަށް ކަމާބެހޭ އިދާރާތަކުން މިހާރު ވަނީ އަމުރުކޮށްފަ އެވެ.
މަސްދަރު: އަނަދޮލު އޭޖެންސީ
