ރަޝިޔާގެ ތެޔޮ އެތެރެކުރުން މަދުކުރުމަށް އެމެރިކާގެ އެއްވެސް ޕްރެޝަރެއް ނެތް: އިންޑިޔާ
27 އޮކްޓޯބަރު 2026 | އަންގާރަ 08:55ރަޝިޔާގެ ތެލަށް ދޭ ޑިސްކައުންޓުތަކާ ގުޅިގެން އިންޑިޔާއިން އެތެރެކުރާ މިންވަރު ކުރިން އިތުރުވި ނަމަވެސް، މިހާރު ގަލްފުގެ ތެޔޮ އަގުހެޔޮކޮށް ލިބޭތީ މެދުއިރުމަތިން ތެޔޮ ގަންނަ މިންވަރު ވަނީ އަނެއްކާ ވެސް އިތުރުވެފައi. އިންޑިޔާގެ ތެލާ ބެހޭ ވަޒީރު ވިދާޅުވި ގޮތުގައި ތެޔޮ ގަތުމުގައި ބަލަނީ އެ ޤައުމެއްގެ އަމިއްލަ މަސްލަހަތަށާއި ލިބޭ އަގަށް. އެހެންކަމުން، އެތެރޭގެ ޑިމާންޑު ފުއްދުމަށް ޓަކައި އިންޑިޔާގެ ތެޔޮ ސާފުކުރުމުގެ ގާބިލުކަން މިހާރު އަންނަނީ ފުޅާކުރަމުން
އިންޑިޔާގެ ތެލާ ބެހޭ ވަޒީރު ހަރްދީޕް ސިންގ ޕޫރީ ރޮއިޓަރސްއަށް ބަސްދީގަތުމެއް ދެއްވަނީ | ރޮއިޓަރސް
ރަޝިޔާއިން އެތެރެކުރާ ސާފުނުކުރާ ތެލުގެ މިންވަރު މަދުކުރުމަށް އެމެރިކާގެ ފަރާތުން އިންޑިޔާއަށް އެއްވެސް ޕްރެޝަރަކާ ކުރިމަތިލާން ޖެހިފައިނުވާ ކަމަށް، އެ ޤައުމުގެ ތެލާ ބެހޭ ވަޒީރު ހަރްދީޕް ސިންގް ޕޫރީ ވިދާޅުވެއްޖެ އެވެ. މި ކަން އޭނާ ހާމަކުރެއްވީ ސިނާއީ ހަރަކާތެއްގެ ތެރެއިން އަންގާރަ ދުވަހު ވާހަކަފުޅު ދައްކަވަމުންނެވެ.
ރަޝިޔާގެ ތެޔޮ އެތެރެކުރާ މިންވަރު މަދުކުރުމަށް އެއްވެސް ފިއްތުމެއް އޮތްތޯ ސުވާލު ދެންނެވުމުން، "އަޅުގަނޑަށް އެ ފަދަ އެއްވެސް ކަމެއް ދުވަހަކު ވެސް އިހުސާސެއް ނުކުރެވޭ،" ޕޫރީ ވިދާޅުވި އެވެ. މިއާއެކު، މެދުއިރުމަތީގެ ސަރަހައްދުން އިތުރު ކާގޯތައް ބޭރުކުރުމުގެ ގާބިލުކަން ލިބިފައިވާތީ، އެ ސަރަހައްދުން ތެޔޮ ފޯރުކޮށްދޭ މިންވަރު އިތުރުވަމުން އަންނަ ކަމަށް ވެސް އޭނާ ވިދާޅުވި އެވެ.
ޔޫކްރެއިން ހަނގުރާމައިގެ ކުރިން އިންޑިޔާއިން އެތެރެކުރާ ތެލުގެ ތެރެއިން ރަޝިޔާއިން ލިބެމުން ދިޔައީ އެންމެ %0.2 ކަމަށާއި، ނަމަވެސް ހަނގުރާމަ ފެށުނު ފަހުން ރަޝިޔާގެ ތެލަށް ދިން ޑިސްކައުންޓުތަކާ ގުޅިގެން އެތެރެކުރާ މިންވަރު ވަރަށް ބޮޑަށް މައްޗަށް ގޮސްފައިވާ ކަން ވަޒީރު ފާހަގަކުރެއްވި އެވެ.
ބޯޓުފަހަރުގެ ދަތުރުތައް ޓްރެކްކުރާ ކުންފުނިތަކުގެ ތަފާސްހިސާބުތައް ދައްކާ ގޮތުގައި، ސެޕްޓެންބަރު މަހު އިންޑިޔާއިން މެދުއިރުމަތީގެ ސާފުނުކުރާ ތެޔޮ އެތެރެކުރި މިންވަރު ވަނީ ވަރަށް ބޮޑަށް އިތުރުވެ، ހަނގުރާމައިގެ ކުރީގެ މިންވަރަށް އަނބުރާ ގޮސްފަ އެވެ. މިއީ، ޗައިނާގެ ފަރާތުން ކުރިމަތިވި ވަރުގަދަ ވާދަވެރިކަމާ ގުޅިގެން، އިންޑިޔާގެ ތެޔޮ ސާފުކުރާ ކުންފުނިތަކުން ރަޝިޔާގެ ތެޔޮ ގަންނަ މިންވަރު މަދުކުރި ދަނޑިވަޅެއްގަ އެވެ.
ރަޝިޔާގެ ތެޔޮ ގަތުން ގުޅިފައި ވަނީ އެހެން ގްރޭޑްތަކާ އަޅާބަލާއިރު ލިބޭ އަގާއި ޑިސްކައުންޓާ ކަމަށް ވަޒީރު ވިދާޅުވި އެވެ. ހަމަމިއާއެކު، ރަޝިޔާގެ ތެޔޮ އެތެރެކުރާ މިންވަރު ދަށްވެފައި ވަނީ، ތެޔޮ ސާފުކުރާ ފަރާތްތަކުން ޑިސްކައުންޓުގައި ވިއްކާ ގަލްފުގެ ތެޔޮ އިތުރަށް ގަންނަމުންދާތީ ކަމަށް ވެސް އޭނާ ވިދާޅުވި އެވެ.
"މީހުން ކޮންމެ އެއްޗެކޭ ބުނި ނަމަވެސް ނުވަތަ ކޮންމެ ކަމެއް ކުރި ނަމަވެސް، އެންމެ ފަހުން ކަންކަން ބިނާ ވަނީ އެ ބައެއްގެ އަމިއްލަ މަސްލަހަތުގެ މައްޗަށް،" ޕޫރީ ވިދާޅުވި އެވެ. މީގެ އިތުރުން، އެތެރޭގެ ޑިމާންޑާއި އެކްސްޕޯޓް ކުރުމަށް ވެފައިވާ ވައުދުތައް ފުއްދުމަށް ބާރުއެޅުމުގެ ގޮތުން، އިންޑިޔާއިން ތެޔޮ ސާފުކުރުމުގެ ގާބިލުކަން ފުޅާކުރަމުން އަންނަ ކަމަށް ވެސް ވަޒީރު ވިދާޅުވި އެވެ.
މަސްދަރު: ރޮއިޓަރސް
