ދެއްލީގައި ބޭއްވި މުޒާހަރާތަކުގައި 'ކުރަފި' ޕާޓީގެ ބާނީއާއި އެތައް ސަތޭކަ ބަޔަކު ފުލުހުންގެ ބެލުމުގެ ދަށަށް
10 އޮކްޓޯބަރު 2026 | ހޮނިހިރު 10:48އިންޑިޔާގެ އިލެކްޝަން ކޮމިޝަނުގެ ވެރިޔާ ގްޔަނޭޝް ކުމާރުގެ އިސްތިއުފާއަށް ގޮވާލައި ކުރިއަށްގެންދާ މި މުޒާހަރާތަކަކީ، ވޯޓުލާ މީހުންގެ ލިސްޓުން 130 މިލިޔަން ނަން އުނިކޮށް ބީޖޭޕީއަށް ނުހައްގު ފައިދާ ހޯދައިދޭކަމަށް ބުނެ ކުރާ މުޒާހަރާތަކެއް. މި ހަރަކާތްތައް ހުއްޓުވުމަށް ސަލާމަތީ ބާރުތަކުން ދެއްލީގެ ބޮޑު ސަރަހައްދެއް ބަންދުކޮށްފައިވާއިރު، މިއީ ބޮޑުވަޒީރު މޯދީގެ ސަރުކާރަށް ކުރިމަތިވެފައިވާ ބޮޑު ގޮންޖެހުމެއް
އިންޑިޔާގެ އިންތިޚާބީ ކޮމިޝަނުގެ ވެރިޔާގެ އިސްތިއުފާއަށް ގޮވައިލާ ކޮކްރޯޗް ޖަންތާ ޕާޓީން އިންތިޒާމުކޮށްގެން ބޭއްވި ޒުވާނުންގެ މުޒާހަރާގެ ބައިވެރިންތަކެއް ބަހަކުން ފޭބި ވަގުތު އެ މީހުން ހައްޔަރުކުރަން ފުލުހުން މަސައްކަތް ކުރަނީ | ރޮއިޓަރސް
ހޮނިހިރު ދުވަހު އިންޑިޔާގެ ވެރިރަށް ނިއު ދެއްލީގައި ކުރިއަށްދިޔަ މުޒާހަރާތަކެއްގައި، 'ކޮކްރޯޗް' ހަރަކާތް ނުވަތަ ކުރަފި ޕާޓީގެ ބާނީއާއެކު މުޒާހަރާގެ އެތައް ސަތޭކަ ބައިވެރިން ފުލުހުންގެ ބެލުމުގެ ދަށަށް ގެންގޮސްފި އެވެ. މި މުޒާހަރާއަކީ އިންޑިޔާގެ އިލެކްޝަން ކޮމިޝަނުގެ ވެރިޔާގެ އިސްތިއުފާއަށް ގޮވާލައި ކުރިއަށްގެންދަން އުޅުނު މުޒާހަރާއެކެވެ. މުޒާހަރާ ހުއްޓުވުމަށް ސަލާމަތީ ބާރުތަކުން ވަނީ ވެރިރަށުގެ ބައެއް ސަރަހައްދުތައް ބަންދުކޮށްފަ އެވެ.
ކޮކްރޯޗް ހަރަކާތުން އިންތިޒާމުކުރި މި އެއްވުން ހުއްޓުވުމަށް ކަމާބެހޭ ފަރާތްތަކުން ފިޔަވަޅުތައް އެޅިއިރު، އެތައް ހާސް ފުލުހުންނާއި ޕެރަމިލިޓަރީ ސިފައިން ވަނީ މުޅި ސިޓީގައި ރުކުރުވާލާފަ އެވެ. އަދި، ވިޔަފާރީގެ މައި ސަރަހައްދުތަކުގައި މޮބައިލް އިންޓަނެޓްގެ ޚިދުމަތް ކަނޑާލައި، ޑަޒަނަށްވުރެ ގިނަ މެޓްރޯ ސްޓޭޝަންތަކާއި މާރުކޭޓުތައް ވަނީ ބަންދުކޮށްފަ އެވެ.
މި މުޒާހަރާ އަމާޒުކޮށްފައިވަނީ އިލެކްޝަންސް ކޮނިޝަނުގެ ވެރިޔާ ގްޔަނޭޝް ކުމާރަށެވެ. އެއީ، ވޯޓުލާ މީހުންގެ ލިސްޓަށް ގެނައި ކަމަށް ތުހުމަތުކުރާ ބަދަލުތަކަކާ ގުޅިގެންނެވެ. ފާޑުކިޔާ ފަރާތްތަކުން ބުނާ ގޮތުގައި މި ބަދަލުތަކުގެ ސަބަބުން ބޮޑުވަޒީރު ނަރެންދުރަ މޯދީގެ ވެރިކަންކުރާ ބާރަތިޔާ ޖަނަތާ ޕާޓީއަށް (ބީޖޭޕީ) ނުހައްގު މަންފާތަކެއް ލިބިގެންދެ އެވެ.
ކޮކްރޯޗް ހަރަކާތުން ރާވާފައި އޮތީ ދެއްލީގެ މެދުތެރޭގައި މުޒާހަރާ ކުރުމަށް ކަނޑައަޅާފައިވާ ސަރަހައްދެއް ކަމަށްވާ ޖަންތަރު މަންތަރަށް އެތައް ހާސް ބަޔަކު އެއްވުމަށެވެ. ނަމަވެސް، މުޒާހަރާ ފެށުމުގެ ކުރިން ސަލާމަތީ ބާރުތަކުން ވަނީ އެ ސަރަހައްދު ބަންދުކޮށްފަ އެވެ. ނަމަވެސް، ސިޓީގެ އެހެން ސަރަހައްދުތަކުގައި ކުދި މުޒާހަރާތަކެއް ފެށުނު ކަމަށް ރިޕޯޓުތައް ބުނެ އެވެ. އޭގެ ތެރޭގައި މަގުބޫލު ކްރާފްޓް މާކެޓަކާއި، މިނިވަންކަމުގެ ހަރަކާތުގެ ލީޑަރު މަހާތުމާ ގާންދީގެ ހަނދާނީ ބިނާ ހިމެނެ އެވެ. މި ސަރަހައްދުތަކުގައި މުޒާހަރާގެ ބައިވެރިން ވަނީ ކުމާރުގެ އިސްތިއުފާއަށް ގޮވާލައި އަޑުއުފުލާފަ އެވެ.
"އިންގިލާބު ދެމިއޮންނާނެ،" ދެއްލީގެ މެދުތެރޭގައި ބައެއް ޒުވާނުން ގޮވަމުންދިޔަ ކަމަށް މަންޒަރު ފެނުނު ނޫސްވެރިއަކު ބުންޏެވެ. ފުލުހުން އެ މީހުންގެ ފަހަތުން ދުވެ، އެތައް ބަޔަކު ގަދަކަމުން ބަސްތަކަށް އަރުވައިގެން ގެންދިޔަ މަންޒަރު ފެނުނުއިރު، އިތުރު މީހުން އެ ސަރަހައްދަށް ޖަމާވަމުންދިޔަ އެވެ. "މިއީ ރައްޔިތުންގެ ހައްގުތަކަށް އަރައިގަތުން، އަދި ޤައުމުން ދެން މި ކަމަކަށް ކެތް ނުކުރާނެ،" ފުލުހުންގެ ބެލުމުގެ ދަށަށް ގެންދިޔަ ވަގުތު މުޒާހަރާގެ ބައިވެރިއެއް ކަމަށްވާ ޔޯގޭންދުރަ ސޯލަންކީ ބުންޏެވެ.
ކޮކްރޯޗް ޖަނަތާ ޕާޓީގެ ބާނީ އަބީޖީތު ދިޕްކޭއާއި އިސް ލީޑަރުން ކަމަށްވާ ސައުރަވް ދާސް އަދި އަޝުތޯޝް ރަންކާ މުމްބާއީން ފުރައިގެން ދެއްލީއަށް ފޭބި ވަގުތު ފުލުހުން އެ މީހުން ހައްޔަރުކޮށްފައިވާ ކަމަށް އެ ގުރޫޕުން ނެރުނު ބަޔާނެއްގައި ބުނެފައިވެ އެވެ.
މުޒާހަރާ ހުއްޓުވުމަށް ދެއްލީ ބަންދުކުރުން
ޓީވީ ފުޓޭޖްތަކުން ފެންނަ ގޮތުގައި މަތިންދާބޯޓު ތެރެއިން ފުލުހުން އޭނާއާ ކައިރިވުމުން ދިޕްކޭ ވަނީ ފުލުހުންނާ ކުރިމަތިލާފަ އެވެ. "އަޅުގަނޑު މި އައީ ހައްޔަރުވާން، އަޅުގަނޑު ހައްޔަރުކުރޭ... އަޅުގަނޑު ކަލޭމެންދެކެ ބިރެއް ނުގަނޭ،" އޭނާ ބުންޏެވެ.
"ނޫން، މިއީ ހައްޔަރުކުރުމެއް ނޫން،" އެއް ފުލުހަކު ޖަވާބުގައި ބުންޏެވެ. "ކޯޕަރޭޓް ކުރައްވާ."
އެ ހަރަކާތުގެ ލީޑަރުން ހައްޔަރުކުރުމަކީ "ޚުދުމުހުތާރު ހައްޔަރުކުރުން" ކަމަށް ސިފަކޮށް އެ ކަން ކުށްވެރިކޮށް، އެ މީހުން ވަގުތުން ދޫކޮށްލުމަށް އެ ހަރަކާތުން ވަނީ ގޮވާލާފަ އެވެ. އަދި، ކޮންމެ ހާލަތެއް މެދުވެރިވި ނަމަވެސް މުޒާހަރާ ކުރިއަށްދާނެ ކަމަށް ވެސް އެ ހަރަކާތުން ބުންޏެވެ. ގާނޫނުހަދާ މަޖިލީހުގެއިދިކޮޅު ބައެއް މެމްބަރުންނާއި، ހުޅަނގު ބެންގާލްގެ ކުރީގެ ޗީފް މިނިސްޓަރު މަމަތާ ބެނާޖީއާއި ދެއްލީގެ ކުރީގެ ޗީފް މިނިސްޓަރު އަރްވިންދު ކެޖްރިވާލް ވެސް ފުލުހުންގެ ބެލުމުގެ ދަށަށް ގެންދިޔަ ކަމަށް ޓީވީ ޗެނަލްތަކުން ރިޕޯޓުކޮށްފައިވެ އެވެ.
މުޒާހަރާތައް ކަވަރުކުރަމުން ދަނިކޮށް ދެ ޑިޖިޓަލް ނޫހެއްގެ ހަތަރު ނޫސްވެރިއަކު ކުޑަ ވަގުތުކޮޅަކަށް ފުލުހުންގެ ބެލުމުގެ ދަށަށް ގެންދިޔަ ކަމަށް އެ ނޫސްތަކުގެ މަންދޫބުން ވެސް ބުންޏެވެ. މީގެ އިތުރުން ރޮއިޓަރސްގެ ނޫސްވެރިއަކު ވެސް ކުޑަ ވަގުތުކޮޅަކަށް ހިފެހެއްޓުމަށްފަހު ވަނީ ދޫކޮށްލާފަ އެވެ.
ސުޕްރީމް ކޯޓު ބޭރުގައި މުޒާހަރާކުރަމުންދިޔަ ބައެއް ގާނޫނީ ވަކީލުން ވެސް ފުލުހުން ގެންދިޔަ ކަމަށާއި، ފަހުން އެ މީހުން ދޫކޮށްލާފައިވާ ކަމަށް ކޯޓުގެ ބާ އެސޯސިއޭޝަންގެ ރައީސް ވިދާޅުވި އެވެ. މީހުން ފުލުހުންގެ ބެލުމުގެ ދަށަށް ގެންދިއުމާ ގުޅޭގޮތުން ފުލުހުން ވަގުތުން ވަކި އެއްޗެއް ބުނެފައެއް ނުވެ އެވެ.
ގާތްގަނޑަކަށް 20 މިލިޔަން މީހުންގެ އާބާދީއެއް އޮންނަ މި ބޮޑު ވެރިރަށުގެ ބޮޑެތި މަގުތަކާއި ސިޓީއަށް ވަންނަ ދޮރޯށިތަކުގައި ސަލާމަތީ ބާރުތަކުން ވަނީ ޗެކްޕޮއިންޓްތައް ގާއިމުކޮށްފަ އެވެ. ފުލުހުން ބަސްތަކަށް އަރައި މުޒާހަރާގެ ބައިވެރިން ހޯދުމުގެ މަސައްކަތް ކުރިއިރު، އުޅަނދުތައް ވެސް ދިޔައީ ބަލައި ފާސްކުރަމުންނެވެ. ބެރިކޭޑުތަކާއި ކޮންކްރީޓް ބްލޮކްތައް ބޭނުންކޮށްގެން ޓްރެފިކް ހުއްޓުވާފައިވާއިރު، މުހިންމު މަގުތަކުގައި ކަރުނަގޭސް ޖަހާ ބަޑި ހަރުކޮށްފައިވާ އެންޓި-ރަޔަޓް ވެހިކަލްތައް ވަނީ ރުކުރުވާލާފަ އެވެ.
މޯދީއަށް ކުރިމަތިވި އާ ގޮންޖެހުމެއް
މި މުޒާހަރާތަކަކީ މޯދީއަށް މިހާތަނަށް ކުރިމަތިވި އެންމެ ބޮޑު އެއް އިމްތިހާނުގެ ގޮތުގައި މަސްރަހުގެ ދާރިސުން ސިފަކުރައްވަ އެވެ. މިއީ ފަހުން ބޭއްވި ސްޓޭޓް އިންތިޚާބުތަކުގެ ކުރިން އިންތިޚާބާބެހޭ އިދާރާތަކުން ވޯޓުލާ މީހުންގެ ލިސްޓަށް ގަވާއިދާ ޚިލާފަށް ބަދަލުތަކެއް ގެނެސްފައިވާ ކަމަށް ކުރެވޭ ތުހުމަތުތަކަކާ ގުޅިގެން ފެށުނު މުޒާހަރާތަކެކެވެ. ވޯޓުލާ މީހުންގެ ލިސްޓުން ގާތްގަނޑަކަށް 130 މިލިޔަން ނަން އުނިކުރުމަށް ގެނައި ބަދަލުތަކާމެދު އިންތިޚާބާބެހޭ ދެ ކޮމިޝަނަރަކު ސުވާލު އުފައްދައި، ކުމާރާ ޚިޔާލުތަފާތުވެފައިވާ ކަމަށް އިންޑިޔަން އެކްސްޕްރެސް ނޫހުން މިދިޔަ ހަފުތާގައި ރިޕޯޓުކުރުމާ ގުޅިގެން މުޒާހަރާތަކުގެ ފޯރި ވަނީ ގަދަވެފަ އެވެ.
ކުމާރު މި ކަމާ ގުޅޭގޮތުން އެއްޗެއް ވިދާޅުވެފައި ނުވި ނަމަވެސް، އިލެކްޝަން ކޮމިޝަނާއި ބީޖޭޕީން ގޯސްކޮށް ކަމެއް ކޮށްފައިވާ ކަމަށް ކުރެވޭ ތުހުމަތުތައް އޭނާ ވަނީ ދޮގުކުރައްވާފަ އެވެ. ބީޖޭޕީން ބުނީ އިންތިޚާބުތަކުގައި އެ ޕާޓީއަށް ލިބޭ ކާމިޔާބީން ރަމްޒުކޮށްދެނީ މޯދީގެ މަގުބޫލުކަމާއި އިންޑިޔާގެ އިގުތިސާދު ކުރިއަރަމުން އަންނަ މިންވަރު ކަމަށެވެ. އަދި، އިދިކޮޅު ޕާޓީތަކުން ދޮގު މައުލޫމާތު ފަތުރަމުންދަނީ އިންތިޚާބުތަކުން ކާމިޔާބު ނުލިބުމުގެ ސަބަބުން ކަމަށް ވެސް އެ ޕާޓީން ތުހުމަތުކުރި އެވެ.
ނަމަވެސް، ގާތްގަނޑަކަށް ކޮންމެ ދުވަހަކު ކުރިއަށްދާ މި މުޒާހަރާތަކަކީ މޯދީއަށް ކުރިމަތިވެފައިވާ އާ ގޮންޖެހުމެކެވެ. މިއީ އިމްތިހާނު ކަރުދާސްތަކެއް ލީކުވި މައްސަލައާ ގުޅިގެން ކުރި މުޒާހަރާތަކާ ހެދި އެ ޤައުމުގެ ތައުލީމާބެހޭ ވަޒީރު އިސްތިއުފާ ދެއްވިތާ މަދު މަސްތަކެއް ފަހުން ކުރިމަތިވި ކަމެކެވެ. މި ހަމަނުޖެހުންތައް އުފެދިފައި މިވަނީ 2027 ވަނަ އަހަރުގެ ކުރީކޮޅު ފެށުމަށް ހަމަޖެހިފައިވާ މުހިންމު ސްޓޭޓް އިންތިޚާބުތަކެއްގެ ވެސް ކުރިންނެވެ.
ހޮނިހިރު ދުވަހު އެޅި ފިޔަވަޅުތަކުން ދައްކުވައިދެނީ މޯދީގެ ސަރުކާރުން "ރަސްމީކޮށް އަމިއްލަ ރައްޔިތުންނާ ދެކޮޅަށް ހަނގުރާމަ އިއުލާނުކޮށްފައިވާކަން" ކަމަށް މައި އިދިކޮޅު ކޮންގްރެސް ޕާޓީގެ އިސް ލީޑަރެއް ކަމަށްވާ ކޭސީ ވޭނުގޯޕާލް ތުހުމަތުކުރެއްވި އެވެ. ބީޖޭޕީގެ ތަރުޖަމާނު ސަމްބިތު ޕަތުރާ ވިދާޅުވީ، ގާނޫނާ ޚިލާފަށް އުޅޭ ބައެއްގެ މައްޗަށް ޑިމޮކްރަސީ ކުރިހޯދާފައިވާ ކަމަށެވެ.
ލިސްޓުން ނަން އުނިކުރުމުގެ އަސަރު ސްޓޭޓް އިންތިޚާބުތަކަށް ކޮށްފައިވާ ކަމަށް އިދިކޮޅުން ތުހުމަތުކުރޭ
އިދިކޮޅު ޕާޓީތަކުން ބުނީ، ވޯޓުލާ މީހުންގެ ލިސްޓުން ނަންތައް އުނިކުރުމުގެ ސަބަބުން ދާދިފަހުން ބީޖޭޕީން ކާމިޔާބުކުރި ބައެއް ސްޓޭޓް އިންތިޚާބުތަކުގެ ނަތީޖާއަށް އަސަރުކޮށްފައިވާ ކަމަށެވެ. އަދި، މި ކަމުގެ ސަބަބުން ދުނިޔޭގެ އެންމެ ބޮޑު ޑިމޮކްރަސީގެ އިންތިޚާބުތަކަށް ވަނީ ހިޔަނި އެޅިފަ އެވެ.
އިލެކްޝަން ކޮމިޝަންގެ ތަފާސްހިސާބުތައް ދައްކާ ގޮތުން، ވެރިފިކޭޝަން މަރުހަލާގައި ވޯޓުލާ މީހުންގެ ލިސްޓުން ގާތްގަނޑަކަށް 130 މިލިޔަން ނަން ވަނީ އުނިކޮށްފަ އެވެ. މީގެ ތެރޭގައި ދިރިއުޅޭ ތަން ބަދަލުކޮށްފައިވާ 63 މިލިޔަން މީހުންނާއި، ހޯދިފައި ނުވާ 30 މިލިޔަން މީހުންގެ އިތުރުން މަރުވެފައިވާ 28 މިލިޔަން މީހުން ހިމެނެ އެވެ.
އިންތިޚާބީ ކޮމިޝަނުން ބުނީ ނަންތައް އުނިކޮށްފައި ވަނީ ޑްރާފްޓް މުރާޖާކުރުމުގެ މަރުހަލާގައި ފާހަގަކުރެވުނު މައްސަލަތަކާ ގުޅިގެން ކަމަށެވެ. އަދި، ޝަރުތު ހަމަވާ އެއްވެސް މީހެއްގެ ނަން ގޯސްކޮށް އުނިކުރެވިފައިވާނަމަ، އަލުން ރަޖިސްޓްރީވުމުގެ ފުރުސަތު އޮންނާނެ ކަމަށް ވެސް ކޮމިޝަނުން ބުންޏެވެ.
މަސްދަރު: ރޮއިޓަރސް
