ހުރްމުޒް ކަނޑުއޮޅީގައި ހަމަލާއެއް އަމާޒުވި އިންޑިއާގެ އުޅަނދަކުން ޒަޚަމުވި ފަޅުވެރިއަކު ސަލާމަތްކޮށްފި

އިސްތިރާޖީ ގޮތުން މުހިންމު ހުރްމުޒް ކަނޑުއޮޅިން އަމާޒުވި ހަމަލާއެއްގައި ޒަޚަމުވި އިންޑިއާގެ އުޅަނދެއްގެ ފަޅުވެރިއަކު ސިއްހީ ފަރުވާއަށް ވައިގެ މަގުން ސަލާމަތްކޮށްގެން ގެންގޮސްދީފައިވާ ކަމަށް ޢުމާނުން ހުކުރު ދުވަހު އިޢުލާނުކޮށްފި އެވެ.

ޢުމާނުގެ އަސްކަރިއްޔާގެ މޯރަލް ގައިޑަންސް ޑިރެކްޓަރޭޓުން ބުނީ، މި ސަރަހައްދުގައި ހަމަލާ އަމާޒުވި އިންޑިއާގެ އުޅަނދުން މި ފަޅުވެރިޔާ ނެރެ ސަލާމަތްކޮށްފައި ވަނީ ކަމާގުޅުންހުރި އިދާރާތަކާ ގުޅިގެން، ޢުމާނުގެ އަސްކަރިއްޔާގެ ވައިގެ ސިފައިން ހިންގި އޮޕަރޭޝަނެއްގައި ކަމަށެވެ. އެ އިދާރާއިން ޝާއިއުކުރި ބަޔާނެއްގައި ބަޔާންކޮށްފައިވާ ގޮތުގައި، ޒަޚަމުވި ފަޅުވެރިޔާއަށް ޚާއްސަ ފަރުވާ ދިނުމަށް ޓަކައި އުތުރުގެ މުސަންދަމް މުޙާފަޡާގެ ޚަޞަބު ހަސްފަތާލުން ވެރިރަށް މަސްޤަޠުގައި ހުންނަ ޚައުލާ ހަސްފަތާލަށް ވައިގެ މަގުން ވަނީ ގެންގޮސްފަ އެވެ.

Advertisement

މީގެ އިތުރުން، މުސަންދަމްގެ އައްސޭރިފަށުން 1.6 ނޯޓިކަލް މޭލު ބޭރުން ހަމަލާއެއް އަމާޒުވެ އަލިފާން ރޯވި އާގުބޯޓަކުން 25 ފަޅުވެރިން ސަލާމަތްކޮށްފައިވާ ކަމަށް ޢުމާނުގެ ކަނޑުގެ ސިފައިން ވަނީ ބުނެފަ އެވެ.

ހަމަމިއާއެކު، ބުރާސްފަތި ދުވަހުގެ ރޭގެ ވަގުތެއްގައި ޚަޞަބުގެ އިރުއުތުރުން 25 ނޯޓިކަލް މޭލު ބޭރުން ގޮވާތަކެތީގެ ދެ ހަމަލާއެއް އަމާޒުވެ، ހުރްމުޒް ކަނޑުއޮޅީގައި ތެޔޮ ޓޭންކަރެއްގައި އަލިފާން ރޯވި ކަމަށް އިނގިރޭސިވިލާތުގެ މެރިޓައިމް ޓްރޭޑް އޮޕަރޭޝަންސްއިން (ޔޫކޭއެމްޓީއޯ) ހުކުރު ދުވަހު ރިޕޯޓުކުރި އެވެ.

މި ހާދިސާތައް ފެންމަތިވެފައި މި ވަނީ ގަލްފު ކަނޑާއި ހުރްމުޒް ކަނޑުއޮޅި އަދި އެ ސަރަހައްދުގެ ކަނޑުގެ ދަތުރުފަތުރުގެ މަގުތަކުގައި ދަތުރުކުރާ ވިޔަފާރި އުޅަނދުފަހަރަށް އޮތް ސަލާމަތީ ނުރައްކާތައް އިތުރުވެ، ފާއިތުވި މަސްތަކުގައި އެތައް ހަމަލާތަކަކާއި ކަނޑުމަތީގެ ނުރައްކާތެރި ހާދިސާތަކެއް ރިޕޯޓުކުރެވެމުންދާ ދަނޑިވަޅެއްގަ އެވެ.

މިއާއެކު، މި ހަމަލާތައް އަމާޒުވެފައި ވަނީ ދުނިޔޭގެ ހަކަތައިގެ މައި ސަޕްލައިތަކާއި ބައިނަލްއަގުވާމީ ވިޔަފާރިއަށް ކޮންމެހެން ބޭނުންތެރި ހުރްމުޒް ކަނޑުއޮޅިން ދަތުރުފަތުރު ކުރުމާ ގުޅޭގޮތުން އީރާނާއި އެމެރިކާއާ ދެމެދު އޮތް ނުތަނަވަސްކަން މެދުކެނޑުމެއްނެތި ދެމިއޮތް ވަގުތެއްގަ އެވެ. މި ކުރިމަތިލުންތައް އެންމެ ފުރަތަމަ ފެށުނީ ފެބުރުވަރީ 28 ގައި އެމެރިކާއާއި އިސްރާއީލުން އީރާނާ ދެކޮޅަށް ޣައިރުގާނޫނީ ހަނގުރާމައެއް ފެށުމާ އެކުގަ އެވެ. އެއަށްފަހު އެޕްރީލު މަހު ވަގުތީ ގޮތުން ހަނގުރާމަ މެދުކަނޑައިލުމަށް އެއްބަސްވި ނަމަވެސް، މަޝްވަރާތައް ހުއްޓުމަކަށް އައުމާ ގުޅިގެން ވޮޝިންގޓަނާއި ތެހެރާނާ ދެމެދު އޮތް ހަމަނުޖެހުންތައް ޖުލައި މަހު އަލުން ވަނީ ފެށިފަ އެވެ.