ދެކުނު އޭޝިޔާގެ ރައްޔިތުންނަށް އެމެރިކާ މީހުން މިހާ ބޮޑަށް ނަފުރަތު ކުރަނީ ކީއްވެ؟
29 ސެޕްޓެމްބަރު 2026 | އަންގާރަ 08:44އެމެރިކާގައި ދިރިއުޅޭ ދެކުނު އޭޝިޔާގެ ރައްޔިތުންނާ ދެކޮޅަށް ސޯޝަލް މީޑިއާގައި ފަތުރާ ނަފްރަތުގެ ބަސްމަގު %240 އިތުރުވެފައިވާކަން ދިރާސާއަކުން ހާމަވެއްޖެ. މިކަން މިހާ ބޮޑަށް އިތުރުވީ އެ ގައުމުގެ ސިޔާސީ މަސްރަހަށް އައި ބަދަލުތަކާއި، ވަޒީފާގެ ބާޒާރާ މެދު އުފެދިފައިވާ ކަންބޮޑުވުންތަކުގެ ސަބަބުން ކަމަށް ރިޕޯޓުގައި ފާހަގަކޮށްފައިވޭ. އޮންލައިންކޮށް ފަތުރާ މި ނަފްރަތުގެ ސަބަބުން އާންމު ދިރިއުޅުމުގައި އެ މީހުންނަށް ކުރިމަތިވާ ނުރައްކާތަކާއި ހަމަލާތައް ވެސް ވަނީ އިތުރުވެފައި
ސޯޝަލް މީޑިއާ ޕްލެޓްފޯމް 'އެކްސް' ގައި އެމެރިކާގައި ދިރިއުޅޭ ދެކުނު އޭޝިއާގެ ނަސްލުތަކަށް ނިސްބަތްވާ މީހުންނަށް އަމާޒުކޮށް ފަތުރާ ނަފުރަތުގެ މިންވަރު، 2024 ވަނަ އަހަރުގެ ޖެނުއަރީ މަހުން ފެށިގެން 2026 ވަނަ އަހަރުގެ ޖޫން މަހުގެ ނިޔަލަށް 240 އިންސައްތަ އިތުރުވެފައިވާކަން އާ ރިޕޯޓަކުން ވަނީ ހާމަވެފައި | އޭޕީ
އެމެރިކާގެ ރައީސް ޑޮނަލްޑް ޓްރަމްޕްގެ ސަރުކާރުން އިމިގްރޭޝަނާ ދެކޮޅަށް އަޅަމުންދާ ހަރުކަށި ފިޔަވަޅުތަކާއި ދައްކަވާ ވާހަކަފުޅުތަކުގެ އިތުރުން، އިގްތިސާދީ ކަންބޮޑުވުންތަކާއި އެ ގައުމުގެ އާންމު ދިރިއުޅުމުގައި ދެކުނު އޭޝިޔާގެ މުޖުތަމައު ފާހަގަކުރެވޭ މިންވަރު އިތުރުވުމާ ގުޅިގެން އިންޑިޔާ، ބަންގްލަދޭޝް އަދި ޕާކިސްތާނުގެ ރައްޔިތުންނާ ދެކޮޅަށް އޮންލައިންކޮށް ފަތުރާ ނަފްރަތުގެ ބަސްމަގު ވަރަށް ބޮޑަށް އިތުރުވެފައި ވާ ކަމަށް އާ ރިޕޯޓަކުން ހާމަވެއްޖެ އެވެ.
ސެންޓާ ފޯ ދި ސްޓަޑީ އޮފް އޯގަނައިޒްޑް ހޭޓްއިން (ސީއެސްއޯއެޗް) އާދީއްތަ ދުވަހު ނެރުނު ރިޕޯޓެއްގައި ބުނީ، އެމެރިކާގައި ދިރިއުޅޭ ދެކުނު އޭޝިޔާގެ ގައުމުތަކުގެ މީހުންނަށް އަމާޒުކޮށް ސޯޝަލް މީޑިއާ މަންސަ އެކްސްގައި މަހެއްގެ މައްޗަށް ހިންގާ ނަފްރަތުގެ އަމަލުތައް، 2024 ޖަނަވަރީއާއި 2026 ޖޫންއާ ދެމެދު %240 މައްޗަށް ގޮސްފައިވާ ކަމަށެވެ. މި މުއްދަތުގައި މި ފަދަ ޕޯސްޓުތަކުގެ އަދަދު މަހަކު 12،904 އިން 43،843 އަށް އިތުރުވެފައި ވާ ކަމަށް އެ ރިޕޯޓުގައި ފާހަގަކޮށްފައިވެ އެވެ.
ހަމައެކަނި 2025 ޖަނަވަރީއާއި 2026 ޖޫންއާ ދެމެދު ވެސް، އެމެރިކާގައި ދިރިއުޅޭ ދެކުނު އޭޝިޔާގެ ރައްޔިތުންނަށް އަމާޒުކޮށް ނަފްރަތު އުފައްދާ 542،000 އަށްވުރެ ގިނަ ޕޯސްޓު އެކްސްއިން ފާހަގަކުރެވިފައި ވާ ކަމަށް ދާރިސުން ވިދާޅުވި އެވެ. އަދި، އެ މުއްދަތުގައި އެންމެ ގިނައިން ނަފްރަތުގެ ޕޯސްޓުތައް ފެނުނު ހަ މަސްދުވަހުގެ ތެރެއިން ފަސް މަސްދުވަސް ހިމެނެނީ އެ މުއްދަތުގެ އެންމެ ފަހު ކޮޅުގައި ކަމަށް ވެސް ދާރިސުންގެ ރިޕޯޓުގައި ފާހަގަކޮށްފައިވެ އެވެ.
ނަފްރަތުގެ ބަސްމަގު ދެނެގަތުމަށް ރިޕޯޓުގެ ދާރިސުން ބޭނުންކޮށްފައި ވަނީ އެކުވެރި ދައުލަތްތަކުގެ (އދ) މިންގަނޑުތަކެވެ. މި ގޮތުން، އޮންލައިންކޮށް ދެކުނު އޭޝިޔާ މީހުންނާ ދެކޮޅަށް ތަކުރާރުކޮށް ބޭނުންކުރާ ނާތަހުޒީބު ލަފްޒުތަކާއި ފަތުރާ ވާހަކަތައް ދާރިސުން ބަލާފައި ވާއިރު، އދ. ގެ މިންގަނޑަށް ނުފެތޭ ފާޑުކިޔުންތައް ވަނީ މި ދިރާސާއިން ވަކިކޮށްފަ އެވެ.
އެކްސްގައި ދައުރުވާ ނަފްރަތުގެ ޕޯސްޓުތަކުގެ ގާތްގަނޑަކަށް ދެބައިކުޅައެއްބައި ޕޯސްޓުތަކަކީ ދެކުނު އޭޝިޔާ މީހުން އެމެރިކާއަށް ގަދަކަމުން ވެރިވެގަންނަ ކަމަށާއި، ވަޒީފާތައް ފޭރިގަންނަ ކަމަށް ނުވަތަ އެ ގައުމުގެ އާބާދީގެ ނިސްބަތަށް ނުރައްކާކުރާ ކަމަށް ތުހުމަތުކޮށް ކޮށްފައިވާ ޕޯސްޓުތައް ކަމަށް ދިރާސާއިން ދައްކަ އެވެ. ހަމަމިއާއެކު، ނަފްރަތު އުފެއްދުމަށް ބޭނުންކުރާ ދަށު ދަރަޖައިގެ ލަފްޒެއް ކަމަށްވާ 'ޕަޖީތު' އަދި އޭގެ އެކި ބަދަލުތައް، އެކްސްގެ ނަފްރަތުގެ ޕޯސްޓުތަކުގެ %30 ގައި އަދި އެހެނިހެން ހައްދުފަހަނައެޅި މަންސަތަކުގެ %45 ޕޯސްޓުގައި ހިމެނިފައިވެ އެވެ.
ދެކުނު އޭޝިޔާގެ މީހުންނަކީ ސާފުތާހިރުކަން ކުޑަ ނުވަތަ ހަޑިމުޑުދާރު ބައެއްގެ ގޮތުގައި ސިފަކޮށް އެކްސްގައި ކުރާ ޕޯސްޓުތައް %171 އަށް އިތުރުވެފައި ވާ ކަމަށާއި، މިއީ މި ހުރިހާ ވާހަކަތަކުގެ ތެރެއިން އެންމެ ބާރަށް ފެތުރެމުންދާ ވާހަކަ ކަމަށް ރިޕޯޓުގައި ބަޔާންކޮށްފައިވެ އެވެ.
އޮންލައިންކޮށް ފަތުރާ މި ނަފްރަތުގައި ދެކުނު އޭޝިޔާގެ އެކި ނަސްލުތަކާއި ދީނީ ފަރަގުތައް އެއްކޮށްލާފައިވާ ކަމަށް ރިޕޯޓުގައިވެ އެވެ. މި ގޮތުން، އިންޑިޔާ، ޕާކިސްތާން އަދި ބަންގްލަދޭޝްގެ ރައްޔިތުން އެއް ބައެއްގެ ގޮތުގައި ބަލަމުންދާއިރު، ހިންދޫންނާއި، މުސްލިމުންނާއި، ސިކުން އަދި ކްރިސްޓިއަނުންނަކީ ވެސް އެއް ފިކުރެއްގެ އެއް ބައެއްގެ ގޮތުގައި ވަނީ ބަލާފަ އެވެ.
ނަފްރަތު އިތުރުވުމުގެ ފަހަތުގައިވާ ސަބަބުތައް
އެމެރިކާގައި އިންޑިޔާ، ބަންގްލަދޭޝް އަދި ޕާކިސްތާނުގެ މީހުންނާ ދެކޮޅަށް ނަސްލީ ތަފާތުކުރުންތައް ގެންގުޅުމަކީ ދިގު ތާރީޚެއް އޮތް ކަމެއް ނަމަވެސް، މިހާރު ފެންނަމުންދާ ކުއްލި އިތުރުވުމަކީ މާޒީގެ ބޯދާ ތައައްސުބުތަކާއި މިހާރުގެ ސިޔާސީ އަދި އިގްތިސާދީ ޕްރެޝަރުތައް އެކުވުމުގެ ނަތީޖާއެއް ކަމަށް ދާރިސުން ވިދާޅުވި އެވެ.
އެމެރިކާގެ ކުންފުނިތަކަށް ބޭރުގެ ހުނަރުވެރި މަސައްކަތްތެރިން ވަޒީފާއަށް ނެގުމުގެ ފުރުސަތު ދޭ އެޗް-1ބީ ވިސާ ޕްރޮގްރާމަކީ މި ނަފްރަތު އެންމެ ބޮޑަށް ހިލިގަތުމަށް ދިމާވި މައިގަނޑު މައްސަލަ ކަމަށް އެ ރިޕޯޓުގައި ފާހަގަކޮށްފައިވެ އެވެ. މި ވިސާ ލިބިފައިވާ މީހުންގެ %70 އަށްވުރެ ބޮޑު ބައެއް ހިއްސާކުރަނީ އިންޑިޔާގެ ރައްޔިތުން ކަމަށްވާއިރު، މި ޕްރޮގްރާމާ ގުޅޭގޮތުން އުފެދޭ ސިޔާސީ ކޯޅުންތަކާ ގުޅިގެން ނަފްރަތުގެ އަމަލުތައް ކުއްލިއަކަށް މައްޗަށް ގޮސްފައިވާ ކަމަށް ދާރިސުން ބުނެ އެވެ. މި ގޮތުން، 2025 ސެޕްޓެންބަރުގައި އަލަށް ހުށަހަޅާ ބައެއް އެޗް-1ބީ ޕެޓިޝަންތަކަށް 100،000 އެމެރިކާ ޑޮލަރު ދެއްކުމަށް ޓްރަމްޕް ޝަރުތުކުރެއްވި ހިސާބުން ވެސް އިންޑިޔާ ރައްޔިތުންނަށް ކުރާ ނަފުރަތު އިތުރުވެގެންދިޔަ ކަމަށް ރިޕޯޓުގެ ދާރިސުން ހާމަކުރެއްވި އެވެ.
"މި ފަދަ ފިޔަވަޅުތަކަކީ ވަރުގަދަ ރަމްޒީ ދައުރެއް އަދާކުރާ ކަންކަން. އޭގެ ސަބަބުން ދެކުނު އޭޝިޔާ މީހުންނާމެދު ޓްރަމްޕްގެ ސަޕޯޓަރުންގެ މެދުގައި އޮތް ދެކޮޅުވެރިކަން އިތުރަށް ވަރުގަދަކޮށްދޭ،" ރިޕޯޓުގައި ބަޔާންކޮށްފައިވެ އެވެ.
އެމެރިކާ ސަރުކާރުގެ ވެރިންގެ ބަސްމަގާ ގުޅޭގޮތުން ވެސް މި ފަދަ ކަންބޮޑުވުންތަކެއް އެ ރިޕޯޓުގައި ވަނީ ފާހަގަކޮށްފަ އެވެ. މި ގޮތުން، 2025 ޖުލައިގައި ބޭއްވި އޭއައި ސަމިޓެއްގައި، އެމެރިކާގެ ޓެކްނޮލޮޖީ ކުންފުނިތަކުން އިންޑިޔާއަށް ވަޒީފާތައް ބޭރުކުރާތީ ޓްރަމްޕް ފާޑުވިދާޅުވި ވާހަކަފުޅަށް ފަހު، ދެކުނު އޭޝިޔާ މީހުންނާ ދެކޮޅަށް އޮންލައިންކޮށް ބޭނުންކުރާ ނަފްރަތުގެ ބަސްމަގު ވަރަށް ބޮޑަށް އިތުރުވެގެން ދިޔަ ކަމަށް ދާރިސުން ފާހަގަކުރެއްވި އެވެ.
ފަހުގެ މިސާލެއްގެ ގޮތުން، އެމެރިކާގެ ޑިޕާޓްމަންޓް އޮފް ހޯމްލޭންޑް ސެކިއުރިޓީން 2026 ސެޕްޓެމްބަރުގައި ޝާއިއުކޮށް، ފަހުން ޑިލީޓްކޮށްލި ޕޯސްޓެއް ރިޕޯޓުގައި ފާހަގަކޮށްފައިވެ އެވެ. "ޓްރާންސްފޯމާސް: އޭޖް އޮފް ޑިޕޯޓޭޝަންސް" ގެ ނަމުގައި ކޮށްފައިވާ އެ ޕޯސްޓުގައި "މިސްޓަރ ސިންގ" ގެ ގޮތުގައި ދައްކާފައި ވަނީ ސިކް ދީނުގެ ފިރިހެނެކެވެ. އަދި، އޭގައި "އަހަރުމެންގެ މަގުތަކުން ފައިބާ،" މި މޭރުމުން ލިޔެފައިވެ އެވެ. އަދި، އޭގެ ދުވަސްކޮޅެއް ފަހުން، ޓެކްސަސްގެ ރިޕަބްލިކަން ޕާޓީގެ މެންބަރެއް ކަމަށްވާ ބޯ ފްރެންޗް، ޔުނިވާސިޓީ އޮފް ޓެކްސަސްގެ ފުޓްބޯޅަ މެޗެއްގައި ދެކުނު އޭޝިޔާގެ މީހުން ތިބުމާ މެދު ޝަކުވާކުރުމުން، ޑިޕާޓްމަންޓް އޮފް އެޑިއުކޭޝަނުން ވަނީ "މޭކް ކޮލެޖް ފުޓްބޯލް ގްރެއިޓް އެގެއިން" ގެ ނަމުގައި ޕޯސްޓެއް ކޮށްފަ އެވެ. މި ފަދަ ވާހަކަތަކުގެ ސަބަބުން، ދެކުނު އޭޝިޔާގެ މީހުންނަކީ ބޭރު މީހުން ކަމަށާއި ނުވަތަ ދުވަހަކު ވެސް ހަގީގީ ގޮތެއްގައި ބަލައިގަނެވޭނެ ބައެއް ނޫން ކަމަށް ދެކޭ ވިސްނުން ވަރުގަދަކޮށްދޭ ކަމަށް އެ ރިޕޯޓުގައި ވަކާލާތުކޮށްފައިވެ އެވެ.
’މޮޑެލް މައިނޯރިޓީ‘ އިން ވަޒީފާ ފޭރިގަންނަ ބަޔަކަށް
ދެކުނު އޭޝިޔާގެ ބައެއް މީހުން ހޯދަމުންދާ ކާމިޔާބީތައް އެ މީހުންނާ ދެކޮޅަށް ހަތިޔާރަކަށް ހަދަމުންދާއިރު، މިއީ އިގްތިސާދީ ގޮތުން އޮތް ނުރުހުންތެރިކަމާ ގުޅިފައިވާ ކަމެއް ކަމަށް ދާރިސުން ލިޔުއްވާފައިވެ އެވެ. މީގެ ކުރިން ނަމޫނާ މަދު އަދަދެއްގެ ބަޔެއްގެ ގޮތުގައި ސިފަކުރި އިންޑިޔާ ދަރިކޮޅުގެ އެމެރިކާ ރައްޔިތުންނަކީ މިހާރު "ފުރުސަތުގެ ބޭނުން ހިފާ މަކަރުވެރިންގެ" ގޮތުގައި ދައްކަމުންދާ ކަމަށާއި، ވަޒީފާތަކާއި އިގްތިސާދާމެދު އުފެދިފައިވާ ރުޅިވެރިކަމުގެ ޝިކާރައަކަށް ޖުމްލަކޮށް ދެކުނު އޭޝިޔާ މީހުން ހަދަމުންދާ ކަމަށް އެ ރިޕޯޓުގައި ބަޔާންކޮށްފައިވެ އެވެ.
މި ބަދަލު އައިސްފައި މި ވަނީ އެމެރިކާގެ ސިޔާސީ މައިދާނުގައި ދެކުނު އޭޝިޔާގެ ދަރިކޮޅު މީހުން ފާހަގަކުރެވޭ މިންވަރު ވަރަށް ބޮޑަށް އިތުރުވެފައިވާ ދަނޑިވަޅެއްގަ އެވެ. މި ގޮތުން، ކުރީގެ ނައިބު ރައީސާ ކަމަލާ ހެރިސްއާއި، ނިއު ޔޯކްގެ މޭޔަރު ޒަހްރާން މަމްދާނީގެ އިތުރުން، ނައިބު ރައީސް ޖޭޑީ ވެންސްގެ އަނބިކަނބަލުން އުޝާ ވެންސް އަދި ސިޔާސީ ޝަޚްސިއްޔަތު ވިވެކް ރާމަސްވާމީ ފަދަ ބޭފުޅުން ހިމެނެ އެވެ. ސިޔާސީ ޕާޓީތަކުގެ ތަފާތެއް ނެތި މި ހުރިހާ ފަރާތްތަކަކަށް ވެސް ނަސްލީ ގޮތުން އަމާޒުކުރެވޭ ހަމަލާތައް އެ ރިޕޯޓުގައި ވަނީ ހިމަނާފަ އެވެ. މި ގޮތުން، މަމްދާނީގެ ޕްރައިމަރީ އަދި މޭޔަރުކަމުގެ ކާމިޔާބީއާ ގުޅިގެން ދެކުނު އޭޝިޔާ މީހުންނާއި މުސްލިމުންނާ ދެކޮޅަށް އަމާޒުކުރި ނަފްރަތުގެ ބަސްމަގު ވަރަށް ބޮޑަށް އިތުރުވިކަން ރިޕޯޓުގައި ފާހަގަކޮށްފައިވެ އެވެ.
މި ދެ ބަދަލަކީ ވެސް ގައުމުގެ އަޣުލަބިއްޔަތު އޮތް މީހުންގެ މެދުގައި "ދަރަޖަ ގެއްލިދާނެ ކަމަށް އޮތް ބިރުވެރިކަމާ" ގުޅިފައިވާ ކަންކަން ކަމަށް ދާރިސުން ވިދާޅުވި އެވެ. އަދި، ހުޅަނގުގެ ގައުމުތަކުގައި ދޮން ނަސްލުގެ މީހުންގެ ބަދަލުގައި އެހެން ނަސްލުތަކުގެ މީހުން ވެރިކުރުވުމަށް ރޭވިގެން ހިންގާ ހަރަކާތެއް އޮންނަ ކަމަށް ބުނާ ބޯދާ ނަޒަރިއްޔާއެއް ކަމަށްވާ "ގްރެއިޓް ރިޕްލޭސްމަންޓް ތިއަރީ" އަށް މި ކަމުގެ ސަބަބުން ބާރު ލިބެމުންދާ ކަމަށް ވެސް ދާރިސުން ފާހަގަކުރެއްވި އެވެ.
ސޯޝަލް މީޑިއާއާއި އޭއައިގެ ދައުރު
ސޯޝަލް މީޑިއާގެ ސަބަބުން މި ފަދަ ވާހަކަތައް ވަކިވަކި ފަރުދުންނަށް އަމާޒުކޮށްގެން ހިންގާ ފުރައްސާރައަށް ބަދަލުވެފައި ވާ ކަމަށް ރިޕޯޓުގައިވެ އެވެ. ވަޒީފާތައް ފޭރިގަންނަ ކަމަށް ނުވަތަ ވިސާގެ މަކަރު ހަދާ ކަމަށް ތުހުމަތުކޮށް، ދެކުނު އޭޝިޔާގެ މީހުން 'ޑޮކްސް' ކުރުމުގެ އަމަލުތައް އެކްސް އެކައުންޓުތަކުން ހިންގަމުންދާ ކަމަށް ދިރާސާވެރިންގެ ހޯދުންތަކުން ހާމަވެ އެވެ. ޑޮކްސް ކުރުމަކީ މީހަކު ދިރިއުޅޭ އެޑްރެސް ފަދަ ޒާތީ މައުލޫމާތު އިންޓަނެޓުގައި ހާމަކުރުމުގެ އަމަލެވެ. މިއާއެކު، ސޯޝަލް މީޑިއާ އިންފްލުއެންސަރުން ދެކުުނު އޭޝިޔާއަށް ނިސްބަތްވާ މީހުން ދިރިއުޅޭ ގެތަކަށާއި ވަޒީފާ އަދާކުރާ ތަންތަނަށް ގޮސް ކުރިމަތިލައި، އެ މަންޒަރުތައް ވީޑިއޯކޮށް އޮންލައިންކޮށް އާންމުކުރަމުންދާ ކަމަށް ވެސް ރިޕޯޓުގައި ބަޔާންކޮށްފައިވެ އެވެ.
މި ގޮތުން، ކަނާތުފިޔައިގެ އިންފްލުއެންސަރެއް ކަމަށްވާ ސާރާ ގޮންޒާލޭޒް، ބައި މިލިޔަނަށް ވުރެ ގިނަ ފޮލޯވަރުންނަށް އާންމުކުރި ވީޑިއޯއެއްގައި، އެޗް-1ބީ ޕްރޮގްރާމްގެ ނާޖާއިޒު ފައިދާ ނަގާ ކަމަށް ތުހުމަތުކޮށް ދެކުނު އޭޝިޔާގެ މީހަކަށް ފުރައްސާރަކޮށްފައިވާ ކަމަށް ރިޕޯޓުގައި ފާހަގަކޮށްފައިވެ އެވެ.
ހަމަމިއާއެކު، ޖެނެރެޓިވް އޭއައިގެ ސަބަބުން މި ފަދަ ނަފްރަތުގެ ކޮންޓެންޓު އުފެއްދުން މާ ބޮޑަށް ފަސޭހަވެފައި ވާ ކަމަށް ވެސް ދާރިސުން ވިދާޅުވި އެވެ. އަދި، ދެކުނު އޭޝިޔާގެ މީހުންނަކީ "ހަޑިމުޑުދާރު، ޖިންސީ ގޯނާކުރާ، ސަގާފީ ގޮތުން ފަސްވެފައިވާ، އަދި އާބާދީގެ ނިސްބަތަށް އޮތް ނުރައްކަލެއްގެ" ގޮތުގައި މި ވަސީލަތްތައް މެދުވެރިކޮށް ދައްކުވައިދެމުންދާ ކަމަށް ވެސް ބުނެފައިވެ އެވެ.
މި ރިޕޯޓުގައި މައިގަނޑު ގޮތެއްގައި އޮންލައިންކޮށް ހިނގާ ކަންކަން ބަލާފައި ވީ ނަމަވެސް، އޮންލައިން ނަފްރަތަކީ "އާންމު ދިރިއުޅުމުގައި ފެންނަ އަނިޔާވެރިކަމާ ވަކިން ހިނގާ ކަމެއް ނޫން" ކަމަށް ދާރިސުން ލިޔުއްވާފައިވެ އެވެ. މި ގޮތުން، ޔޫޓާގެ ވިޔަފާރި މޯލެއްގައި މަސައްކަތްކުރާ އިންޑިޔާގެ މުސްލިމް މުވައްޒަފަކަށް، ޖުލައި މަހު ތަކުރާރުކޮށް ވަޅިން ހަމަލާދިން ހާދިސާ ރިޕޯޓުގައި ފާހަގަކޮށްފައިވެ އެވެ. އެ މައްސަލައަކީ ނަފްރަތުގެ ކުށެއް ނުވަތަ 'ހޭޓް ކްރައިމްއެއްގެ' ގޮތުގައި ފެޑެރަލް ޕްރޮސެކިއުޓަރުން ވަނީ ދައުވާ އުފުލާފަ އެވެ. އަދި، ސެޕްޓެންބަރު މަހު ވަޔޯމިންގގެ ޓްރަކް ސްޓޮޕެއްގައި، ސިކް ދީނުގެ ޓްރަކް ޑްރައިވަރެއްގެ ގަޔަށް 17 ފަހަރު ވަޅި ޖަހައި ޒަޚަމްކޮށްލި ހާދިސާ ވެސް ރިޕޯޓުގައި ހިމަނާފައިވެ އެވެ.
އޮންލައިން އަދި އޮފްލައިން ނަފްރަތަކީ އެކަތި އަނެކައްޗަށް ބާރުދޭ ކަންތައްތަކެއް ކަމަށް ދާރިސުންގެ ރިޕޯޓުގައި ލިޔުއްވާފައިވެ އެވެ. އަދި، ފަތުރާ ވާހަކަތަކާއި، ދަށު ދަރަޖައިގެ ތަސައްވުރުތަކާއި، ބަދުނާމުކުރުމުގެ އެކި ބާވަތްތައް ޑިޖިޓަލް މަންސަތަކާއި، ސިޔާސީ ބަހުސްތަކާއި، މީޑިއާ އަދި ކޮންމެ ދުވަހެއްގެ އާންމު ދިރިއުޅުމުގެ ތެރޭގައި ދައުރުވަމުންދާ ކަމަށް އެ ރިޕޯޓުގައި ބަޔާންކޮށްފައިވެ އެވެ.
މަސްދަރު: އަލް ޖަޒީރާ
