ރެޑް ބުލް "އެނާޖީ ޑްރިންކް" އެއްގެ ގޮތުގައި އިޝްތިހާރު ކުރެވިދާނެތޯ ބެލުމަށް ކުރިއަށްދިޔަ ގާނޫނީ ހަނގުރާމައިގެ ހުކުމް އިއްވައިފި

ރެޑް ބުލް އަކީ "އެނާޖީ ޑްރިންކް" އެއްގެ ގޮތުގައި އިޝްތިހާރު ކުރެވިދާނެތޯ ބެލުމަށް ކުރިއަށްދިޔަ ގާނޫނީ ހަނގުރާމައިގެ ނިންމުން އިއްވައިފި އެވެ.

އޮސްޓްރިއާގެ މަޝްހޫރު ބުއިން އުފައްދާ ކުންފުނި، ރެޑްބުލް އިން އުފައްދާ ކެފޭން ގިނަ ބުއިންތަކުގައި "އެނާޖީ ޑްރިންކް" މި ލޭބަލް ބޭނުންކުރެވިދާނެތޯ ބެލުމަށް ކޯޓަށް ހުށަހެޅި މައްސަލަ، އެ ބުއިންތަކުގެ މާކެޓް އެންމެ ހަލުވިކަމާއެކު ކުރިއަރަމުން އަންނަ އެއް ގައުމު ކަމުގައިވާ އިންޑިއާގައި އެ ކުންފުނިން ވަނީ ކާމިޔާބުކޮށްފަ އެވެ.

އެ ގޮތުން އިންޑިއާގެ ފުޑް ރެގިއުލޭޓަރީ އިދާރާއިން ބުއިންތަކުގައި "އެނާޖީ ޑްރިންކް" މި ލަފުޒު ބޭނުންކުރުން މަނާކޮށް ނެރުނު އަމުރު، ދިއްލީ ހައިކޯޓުން އަންގާރަ ދުވަހު ވަނީ ބާތިލުކޮށްފަ އެވެ.

ރެޑް ބުލް އިން އިންޑިއާގެ ފުޑް ސޭފްޓީ އެންޑް ސްޓޭންޑަރޑްސް އޮތޯރިޓީ (އެފް.އެސް.އެސް.އޭ.އައި) އާ ދެކޮޅަށް ދައުވާކުރީ، އެއްވެސް އިންޒާރެއް ދިނުމަކާ ނުލައި އެ ލޭބަލް ބޭނުންކުރުން މަނާކުރުމާ ގުޅިގެންނެވެ. އެ ކުންފުނިން ބުނި ގޮތުގައި މީގެ ސަބަބުން އިންޑިއާގައި އެ ކުންފުނިން ކޮށްފައިވާ އިންވެސްޓްމަންޓްތަކަށް ނޭދޭ އަސަރުތަކެއް ކުރާނެ އެވެ. އަދި 2002 ވަނަ އަހަރުން ފެށިގެން އެ ކުންފުނިން އެ ލޭބަލް ބޭނުންކުރަމުން އަންނަކަން ވެސް ރެޑްބުލް އިން ފާހަގަކުރި އެވެ.

އާދައިގެ ދެ ލަފުޒެއްގެ ގޮތުގައި ފެނުނު ނަމަވެސް، މި މައްސަލައިގައި ދުނިޔޭގެ އެންމެ ބޮޑެތި ބުއިން އުފައްދާ ކުންފުނިތަކާއި އިންޑިއާގެ ރެގިއުލޭޓަރާ ދެމެދު ބޮޑު ކުރިމަތިލުމެއް ހިނގި އެވެ. މީގެ އިތުރުން 1.6 ބިލިއަން ޑޮލަރުގެ މި މާކެޓުގައި ކެފޭން ގިނަ ބުއިންތައް މާކެޓްކުރާ ގޮތާ މެދު ވެސް ވަނީ ސުވާލުތަކެއް އުފެދިފަ އެވެ.

ކެފޭން ގިނަ ބުއިންތަކަކީ "އެނާޖީ ޑްރިންކްސް" ގެ ގޮތުގައި ސިފަކުރުން ހުއްޓާލުމަށް ރެގިއުލޭޓަރުން ޖޫން މަހު ނެރުނު އަމުރުގެ ސަބަބުން ރެޑް ބުލް، ޕެޕްސީ، މޮންސްޓަރ އަދި ރިލަޔަންސް ފަދަ ބޮޑެތި ބްރޭންޑްތަކަށް އަސަރުކުރި އެވެ. އަދި މި ލޭބަލް އުނިކުރުމުން ބްރޭންޑްތަކުގެ އަގު ވެއްޓިދާނެ ކަމުގެ ބިރު އޮތުމުން ވިޔަފާރިތަކުން ވަނީ އެކަމަށް ވަރަށް ބޮޑަށް ފާޑުކިޔާފަ އެވެ. ނަމަވެސް، މި މައްސަލަ ކޯޓަށް ހުށަހެޅީ ހަމައެކަނި ރެޑްބުލް އިންނެވެ.

ކޯޓުން ނިންމި ގޮތުގައި ރެގިއުލޭޓަރުން އެ އަމުރު ނެރެފައިވަނީ ކުންފުންޏަށް އެކަމުގައި އެއްވެސް ޚިޔާލެއް ފާޅުކުރުމުގެ ފުރުސަތެއް ނުދީ އެވެ.

މި މައްސަލަ އިސްތިއުނާފު ކުރުމަށް ރެގިއުލޭޓަރުން ނިންމާފައިވަނީ އާންމު ސިއްހަތަށް ރިއާޔަތްކޮށް ކަމަށް، އެ މައުލޫމާތު އެނގޭ އޮފިޝަލަކު ރޮއިޓާސް ނިއުސް އެޖެންސީއަށް މައުލޫމާތު ދީފައިވެ އެވެ.

ރެޑް ބުލް އިން ކޯޓަށް ހުށަހެޅި ޕެޓިޝަނުގައި ބުނެފައިވަނީ، މި މަނާކުރުން ކުރިމަތިކުރުވީ އުފެއްދުމުގެ މިންގަނޑުތަކަށް އެއްވެސް ބަދަލެއް ނުގެނެސް ކަމަށެވެ.

ކުންފުނިން ބުނި ގޮތުގައި ކުއްލިއަކަށް މިގޮތަށް މަނާކުރުމުގެ ސަބަބުން، ގާނޫނީ ގޮތުން ބޮޑެތި އޮޅުންތަކެއް ކުރިމަތިވެ، އިންޑިއާގައި މިހާރު ކޮށްފައިވާ އަދި ކުރަން ރާވާފައިވާ ވިޔަފާރީގެ އިންވެސްޓްމަންޓްތަކަށް ބޮޑެތި ގެއްލުންތަކެއް ލިބޭނެ އެވެ. އަދި މިއީ ބައިނަލްއަގުވާމީ ވިޔަފާރި ފަހިކޮށްދީ، އިންވެސްޓްމަންޓްތަކަށް ހިތްވަރުދީ، ވިޔަފާރިތަކަށް ޔަގީންކަން ހޯދައިދިނުމަށް އިންޑިއާ ސަރުކާރުން ގެންގުޅޭ ސިޔާސަތާ ޚިލާފު ކަމެއް ކަމަށް ވެސް އެ ކުންފުނިން އިތުރަށް ބުންޏެވެ.

މީގެ އިތުރުން، މި މަނާކުރުމުގެ ސަބަބުން ކުންފުނީގެ މުޅި ވިޔަފާރި އެއްކޮށް ހުއްޓުމަކަށް އަންނާނެ ކަމަށް ވެސް ރެޑްބުލް އިން ފާހަގަކުރި އެވެ.

ކޯޓުގެ މި ނިންމުން އައިސްފައިވަނީ، ކާބޯތަކެތީގެ ރައްކާތެރިކަން ކަށަވަރުކުރުމަށް ރެގިއުލޭޓަރުން ވަރުގަދަ ފިޔަވަޅުތަކެއް އަޅަމުންދާ ދަނޑިވަޅެއްގަ އެވެ. މީގެ ސަބަބުން އިންޑިއާގެ ގިނަ ރެސްޓޯރަންޓްތަކާއި މަޝްހޫރު ކާބޯތަކެތި ވިއްކާ ތަންތަން ބަންދުކުރަން ވެސް ވަނީ ޖެހިފަ އެވެ.

ޔޫރޯމޮނިޓަރގެ ތަފާސްހިސާބުތަކުން ދައްކާ ގޮތުގައި، އިންޑިއާގައި އެނާޖީ ޑްރިންކްގެ މާކެޓް އަހަރަކު 12.6 އިންސައްތައިގެ ދުވެލީގައި ކުރިއަރަމުންދެ އެވެ. މިއީ އެމެރިކާ އާއި ޗައިނާއަށްވުރެ ވެސް ހަލުވި ދުވެއްޔެކެވެ.

މި ކުރިއެރުން އައިސްފައިވަނީ 2017 ވަނަ އަހަރު ޕެޕްސީން "ސްޓިންގް" އެނާޖީ ޑްރިންކް ބާޒާރަށް ނެރުނު ފަހުންނެވެ.

2024 ވަނަ އަހަރު އިންޑިއާގައި ރެޑްބުލްއަށް ލިބުނު އާމްދަނީ 130 މިލިއަން ޑޮލަރަށް އަރާފައިވާއިރު، މިއީ މީގެ ހަތަރު އަހަރު ކުރިއާ އަޅާބަލާއިރު ދެގުނައަށްވުރެ ވެސް އިތުރު އަދަދެކެވެ.

"އެނާޖީ ޑްރިންކްސް" ގެ މަގުބޫލުކަން އިތުރުވަމުންދާތީ، ގިނަ ގައުމުތަކުގެ ރެގިއުލޭޓަރުން ދަނީ ސިއްހީ ކަންބޮޑުވުންތައް ފާޅުކުރަމުންނެވެ. މި ބުއިންތަކުގައި ގިނަ އަދަދަކަށް ކެފޭން، ހަކުރު އަދި "ޓައުރިން" ކިޔާ އެމީނޯ އެސިޑެއް ހިމެނޭއިރު، މީގެ ސަބަބުން ލޭގެ ޕްރެޝަރު މަތިވުމާއި ހިތުގެ ބަލިތައް ފަދަ ސިއްހީ މައްސަލަތައް ކުރިމަތިވާކަން ދިރާސާތަކުން ދައްކަ އެވެ.