ތެޔޮ ޓޭންކަރަކަށް ދިން ހަމަލާއަކާ ގުޅިގެން އިންޑިޔާގެ ފަސް ރައްޔިތަކު ސަލާމަތްކޮށްފި
4 އޮކްޓޯބަރު 2026 | އާދީއްތަ 04:40ހުރްމުޒް ކަނޑުއޮޅިން ދަތުރުކުރި ކުވައިތުގެ ތެޔޮ ޓޭންކަރަކަށް ދިން ހަމަލާއަކާ ގުޅިގެން، އޭގައި ތިބި އިންޑިޔާގެ ފަސް ރައްޔިތަކު އޮމާންގެ އެހީތެރިކަމާއެކު ސަލާމަތްކޮށްފި. ސަރަހައްދީ ނުތަނަވަސްކަން ބޮޑުވެ ކަނޑުމަތީގެ ސަލާމަތަށް ނުރައްކާވެފައިވާ މި ދަނޑިވަޅުގައި، އިންޑިޔާ ސަރުކާރުން ވަނީ ބޭރު ގައުމުތަކުގައި މަސައްކަތްކުރާ އެ ގައުމުގެ ރައްޔިތުންގެ ރައްކާތެރިކަން ކަށަވަރުކޮށްދޭނެ ކަމުގެ ޔަގީންކަން ދީފައި
ހުރްމުޒް ކަނޑުއޮޅިން ދަތުރުކުރަމުން ދަނިކޮށް ހަމަލާއެއް އަރާފައިވާ އުޅަނދެއްގައި ރޯވެ، އަނދަމުންދާ މަންޒަރު | އަނަދޮލު އޭޖެންސީ
ތެޔޮ ޓޭންކަރަކަށް ހުރްމުޒް ކަނޑުއޮޅީގައި ދިން ހަމަލާއަކާ ގުޅިގެން އިންޑިޔާގެ ފަސް ރައްޔިތަކު ސަލާމަތްކޮށްފައިވާ ކަމަށް އިންޑިޔާއިން ހޮނިހިރު ދުވަހު ބުނެފި އެވެ. ހަމަލާ ދީފައި ވަނީ ކުވައިތުގެ އުޅަނދަކަށް ކަމަށް ރިޕޯޓުތައް ބުނެ އެވެ.
އޮމާންގައި ހުންނަ އިންޑިޔާގެ އެމްބަސީން ބުނީ، "ހުރްމުޒް ކަނޑުއޮޅީގައި ޕްރޮޖެކްޓައިލްއެއް [މިސައިލް] ބޭނުންކޮށްގެން ހަމަލާދިން" ކުވައިތުގެ ދިދަ ޖެހި ޓޭންކަރު، އެމްޓީ ކާޒިމާ 3 ގައި ތިބި އިންޑިޔާގެ ފަސް ރައްޔިތުން ސަލާމަތްކުރުމުގެ މަސައްކަތް އެ ފަރާތުން ވިލަރެސްކޮށްފައިވާ ކަމަށެވެ.
"އިންޑިޔާގެ 5 ރައްޔިތުން ވެސް ވަނީ ރައްކާތެރިކަމާއެކު އެއްގަމަށް ގެންދެވިފައި،" އެމްބަސީން ބުނެފައިވެ އެވެ. އަދި, "އޮމާންގެ ކަމާބެހޭ ފަރާތްތަކުން ދެއްވާ މެދުކެނޑުމެއްނެތް އެއްބާރުލުމާއި އެހީތެރިކަމަށް އަޅުގަނޑުމެން ޝުކުރު އަދާކުރަން،" ކަމަށް ސޯޝަލް މީޑިއާގައި ޝާއިރުކުރި ޕޯސްޓެއްގައި އިންޑިޔާގެ އެމްބަސީން ބުންޏެވެ.
"ގައުމުން ބޭރުގައި ތިބޭ އަޅުގަނޑުމެންގެ ކަނޑުމަތީގެ މަސައްކަތްތެރިންގެ ސަލާމަތާއި ރައްކާތެރިކަމާއި ލާބަޔަށް އަޅުގަނޑުމެން ދެމިތިބޭނަން" މި ހާދިސާއާ ގުޅޭގޮތުން އިންޑިޔާގެ ޚާރިޖީ ވުޒާރާގެ ތަރުޖަމާނު ރަންދީރް ޖައިސްވާލް ވިދާޅުވި އެވެ.
ފެބުރުވަރީ މަހުގެ 28 ވަނަ ދުވަހު އެމެރިކާއާއި އިސްރާއީލް ގުޅިގެން އީރާނާ ދެކޮޅަށް ފެށި ޣައިރުގާނޫނީ ހަނގުރާމައިގެ ސަބަބުން ސަރަހައްދީ ނުތަނަވަސްކަން ވަނީ ބޮޑުވެފަ އެވެ. މިއާއެކު, މުޅި ސަރަހައްދުގައިވާ އިސްރާއީލްގެ އަމާޒުތަކަށާއި އެމެރިކާގެ އަސްކަރީ މަރުކަޒުތަކަށް އީރާނުން ރައްދު ދިނުމަށް ވަނީ މަގުފަހިވެފަ އެވެ.
މި ހަނގުރާމައިގެ ސަބަބުން، ދުނިޔޭގެ ހަކަތަ ފޯރުކޮށްދިނުމުގެ މުހިންމު މަގަކަށްވާ ހުރްމުޒް ކަނޑުއޮޅިން ދަތުރުފަތުރު ކުރުމަށް ވެސް ވަނީ ވަރަށް ބޮޑަށް ހުރަސްއެޅިފަ އެވެ. އޭގެ ފަހުން އީރާނުން ވަނީ ހުރްމުޒް ކަނޑުއޮޅި އެއްކޮށް ހުޅުވާލުމާ ގުޅޭގޮތުން ޝަރުތުތަކެއް ކަނޑައަޅާފަ އެވެ. އޭގެ ތެރޭގައި ހަމަލާބަދަލުކުރުން ހުއްޓާލުމާއި، ދަތިކުރުމުގެ ފިޔަވަޅުތަކަށް ލުޔެއް ދިނުމާއި، ހިފަހައްޓާފައިވާ މުދަލާއި ފައިސާ ދޫކޮށްލުމުގެ އިތުރުން ވޮޝިންގޓަނުން ވެފައިވާ ވައުދުތައް ތަންފީޒުކުރުން ހިމެނޭކަމަށް އީރާނުން ބުނެފައިވެ އެވެ. ނަމަވެސް، އެމެރިކާގެ ރައީސް ޑޮނަލްޑް ޓްރަމްޕް ވަނީ އެ ޝަރުތުތަކަށް އިންކާރު ކުރައްވާފަ އެވެ.
މަސްދަރު: އަނަދޮލު އޭޖެންސީ
