ރާއްޖެއަށް އެހީވުމަށް އިންޑިއާއިން ހަމަޖައްސައިދިން 30 ބިލިއަން ރުޕީސްގެ ކަރަންސީ ސްވަޕް އެއްބަސްވުމުގެ މުއްދަތު އިތުރުކޮށްދިނުމަށް ދިވެހި ސަރުކާރުން އެދިއްޖެ
14 އޮކްޓޯބަރު 2026 | ބުދަ 07:39ގާތްގަނޑަކަށް 316 މިލިއަން ޑޮލަރުގެ މި ފެސިލިޓީ ދެއްކުމުގެ މުއްދަތު ހަމަވާތީ، އެ މުއްދަތު އިތުރުކުރުމުގެ މަޝްވަރާތައް ކުރިއަށްދާކަން ސަރުކާރުން ވަނީ ކަށަވަރުކޮށްދީފައި. ރާއްޖޭގެ އިގްތިސާދީ ހަމަޖެހުން ދެމެހެއްޓުމަށް އިންޑިއާއިން ދީފައިވާ މި އެހީތެރިކަމަކީ ބޭރުގެ މާލީ ގޮންޖެހުންތަކުން އަރައިގަތުމަށް ސަރުކާރުން ކުރާ މަސައްކަތަށް ލިބޭ ބޮޑު ބާރެއް
2024 ވަނަ އަހަރު އިންޑިއާއަށް ކުރެއްވި ރަސްމީ ދަތުރުފުޅުގެ ތެރެއިން ރައީސް ޑރ. މުހައްމަދު މުއިއްޒު އިންޑިއާގެ ބޮޑުވަޒީރު ނަރެންދުރަ މޯދީއާ ބައްދަލުކުރައްވަނީ | ރައީސް އޮފީސް
ރާއްޖޭގެ މާލީ ހާލަތަށް އެހީތެރިވުމުގެ ގޮތުން އިންޑިއާއިން ހަމަޖައްސައިދީފައިވާ 30 ބިލިއަން އިންޑިއާ ރުޕީސްގެ ކަރަންސީ ސްވަޕް އެއްބަސްވުމުގެ މުއްދަތު ރޯލްއޯވާކޮށްދިނުމަށް ދިވެހި ސަރުކާރުން އިންޑިއާ ސަރުކާރުގައި އެދިއްޖެ އެވެ.
މި ކަރަންސީ ސްވަޕްގެ މުއްދަތު ކުރިއަށް އޮތް ދިހަވަރަކަށް ދުވަހުގެ ތެރޭގައި ހަމަވާތީ އެ ފައިސާ އަނބުރާ ދެއްކުމުގެ މުއްދަތު އިތުރު ކޮށްދިނުމަށް ދިވެހި ސަރުކާރުގެ ފަރާތުން އިންޑިއާ ސަރުކާރުގައި ވަނީ އެދިފަ އެވެ. އަދި އެގޮތަށް ސަރުކާރުން އެދިފައިވާކަމާއި، އޮންނަ އުސޫލުގެ ތެރެއިން އެ މަޝްވަރާތައް ކުރިއަށްދާކަން ސަރުކާރުގެ ތަރުޖަމާނު މުހައްމަދު ހުސައިން ޝަރީފް (މުންދު) ވަނީ ރާއްޖެއެމްވީއަށް ކަށަވަރު ކޮށްދެއްވާފަ އެވެ.
30 ބިލިއަން އިންޑިއާ ރުޕީސް މިއީ އެމެރިކާ ޑޮލަރުން ބަލާނަމަ ގާތްގަނޑަކަށް 316 މިލިއަން ޑޮލަރެވެ. މި ކަރަންސީ ސްވަޕް އެއްބަސްވުމަކީ ރާއްޖޭގެ އިގްތިސާދީ ހާލަތު ހަރުދަނާ ކުރުމަށް އިންޑިއާއިން އޭރު ދީފައިވާ މުހިންމު އެހީތެރިކަމެކެވެ.
އޭރު ސަރުކާރުގެ ފަރާތުން ޚާރިޖީ ވުޒާރާއިން ނެރުނު ބަޔާނުގައިވާ ގޮތުން ކުރީގެ ސްވޮޕަށް 400 މިލިއަން ޑޮލަރު ދެއްކުމުން އިތުރު ސްވޮޕެއް ދީފައިވަނީ އިންޑިއާ ރުޕީސް އިންނެވެ.
ފޮރިން މިނިސްޓްރީ އިން ބުނެފައިވަނީ މެދުއިރުމަތީގެ މަސްރަހަށް އަންނަމުންދާ ބަދަލުތަކާއެކު ރާއްޖޭގެ އިގްތިސާދީ ހަމަޖެހުން ދެމެހެއްޓުމަށް ސަރުކާރުން ގެންގުޅޭ ސިޔާސަތުތަކަށް މި 30 ބިލިއަން ރުޕީގެ ސްވޮޕް ފެސިލިޓީގެ ސަބަބުން ބޮޑު އެހީތެރިކަމެއް ލިބިގެންދާނެ ކަމަށެވެ.
