ނޭޝަނަލް ކައުންޓަރ ޓެރަރިޒަމް ސެންޓަރުގެ ވެރިއަކަށް، މިނިސްޓަރު ފެންވަރުގައި މޫސާ އަލީ ޖަލީލް އައްޔަނު ކޮށްފި
28 އޮކްޓޯބަރު 2026 | ބުދަ 17:40ނޭޝަނަލް ކައުންޓަރ ޓެރަރިޒަމް ސެންޓަރު (އެންސީޓީސީ) ގެ ޑިރެކްޓަރ ޖެނެރަލްގެ މަގާމުގައި ހުންނެވި ވައިޘް ވަހީދު ވަކިކުރެއްވުމަށްފަހު، މިނިސްޓަރު ފެންވަރުގައި އެ މަގާމަށް މޭޖަރ ޖެނެރަލް (ރިޓަޔަރޑް) މޫސާ އަލީ ޖަލީލު ވަނީ އައްޔަނުކުރައްވާފަ. އަސްކަރީ ދާއިރާގައި ގިނަގުނަ ޚިދުމަތްތަކެއް ކުރައްވާފައިވާ މޫސާ އަލީ ޖަލީލު މި މަގާމަށް އައްޔަނުކުރެއްވިއިރު، އެންސީޓީސީއަކީ ރާއްޖޭގައި ޓެރަރިޒަމާއި ހައްދުފަހަނަޅައިދިއުމުގެ ފިކުރާ ދެކޮޅަށް މަސައްކަތްކުރާ މައި އިދާރާ.
ކުރީގެ ޗީފް އޮފް ޑިފެންސް ފޯސް މޭޖަރ ޖެނެރަލް ރިޓަޔަރޑް މޫސާ އަލީ ޖަލީލު | ރާއްޖެއެމްވީ
ނޭޝަނަލް ކައުންޓަރ ޓެރަރިޒަމް ސެންޓަރު، (އެންސީޓީސީ) ގެ ޑިރެކްޓަރ ޖެނެރަލްގެ މަގާމަށް މޭޖަރ ޖެނެރަލް (ރިޓަޔަރޑް) މޫސާ އަލީ ޖަލީލު އައްޔަނު ކޮށްފައިވާ ކަން އެނގިއްޖެ އެވެ.
ރާއްޖެއެމްވީ އަށް އިތުބާރު ހުރި މަސްދަރަކުން ކަށަވަރު ކޮށްދީފައިވާ ގޮތުގައި މިނިސްޓަރު ފެންވަރުގައި މޫސާ އަލީ ޖަލީލް އެ މަގާމަށް އައްޔަނު ކޮށްފައިވަނީ އެ ސެންޓަރުގެ ޑިރެކްޓަރ ޖެނެރަލްގެ މަގާމުގައި ހުންނެވި މޭޖަރ ޖެނެރަލް ރިޓަޔަރޑް ވައިޘް ވަހީދު ވަކި ކުރުމަށްފަހުގަ އެވެ. ވައިޘް އެ މަގާމުގައި ހުންނެވީ ޑެޕިއުޓީ މިނިސްޓަރު ފެންވަރުގަ އެވެ.
އެ މަގާމަށް އައްޔަނު ކޮށްފައިވާ މޫސާ އަލީ ޖަލީލް އަކީ މި އަހަރު ބޭއްވި ކައުންސިލް އިންތިޚާބުގައި މާލެސިޓީ މޭޔަރު ގެ މަގާމަށް ޕީއެންސީގެ ފަރާތުން ވާދަކުރެއްވި ކެންޑިޑޭޓެވެ. އޭގެ އިތުރުން އޭނާ އަށް 2024 ވަނަ އަހަރު ވަނީ ނިޝާން އަސްކަރީ ވެރިކަމުގެ އިއްޒަތް އަރުވާފަ އެވެ. އަދި ޖަލީލަށް މީގެ ކުރިން ޖިހާދުގެ ރަތް މެޑަލާއި ދިގުމުއްދަތެއްގައި ޚިދުމަތް ކުރުމުގެ މެޑަލްވެސް ވަނީ އަރުވާފަ އެވެ.
ނޭޝަނަލް ކައުންޓަރ ޓެރަރިޒަމް ސެންޓަރަކީ ޓެރަރިޒަމާއި ހައްދުފަހަނަޅައިދިއުމުގެ ވިސްނުމާ ދެކޮޅަށް މަސައްކަތްކުރުމަށް 25 ފެބުރުވަރީ 2016 ގައި އުފައްދާފައިވާ ސެންޓަރެކެވެ.
މި ސެންޓަރުގެ މައިގަނޑު މަސައްކަތަކީ، ޓެރަރިޒަމުގެ ހަރަކާތްތަކާއި ހައްދުފަހަޅައިދިއުމުގެ ވިސްނުމާ ދެކޮޅަށް ދިވެހިރާއްޖޭގަ އާއި، ބައިނަލްއަގްވާމީ މަސްރަޙުގައި މަސައްކަތް ކުރުމެވެ. އަދި ދިވެހި ސަރުކާރުގެ ވުޒާރާތަކާއި، އިދާރާތަކާއި މުވައްސަސާތަކާ ވިލަރެސްކޮށްގެން މިފަދަ ހަރަކާތްތަކާއި ވިސްނުންތަކާ ދެކޮޅަށް މަސައްކަތް ކުރުމެވެ.
