ޕީއެންސީގެ ކެންޑިޑޭޓުން ބައިތިއްބައިގެން އެއްބަޔަކަށް މުއިއްޒު އެ ބަހާލީ 16 މިލިއަން ރުފިޔާ: މެމްބަރު އައްބާސް
ވެރިޔަކު މުނާފިގު ވާނީ މިހާވަރަށް ކަމަށް އައްބާސް ވިދާޅުވި.
ރައީސް މުހައްމަދު މުއިއްޒު ސިނަމާލެ އަދި މާލެހިޔާ ފްލެޓްތަކުގައި ދިރިއުޅޭ ފަރާތްތަކާ ބައްދަލުކުރައްވައި، 100،000ރ. ދެއްވަން ރިޔާސީ ގަނޑުވަރު މުލީއާގޭ ގައި ބޭއްވި ބައްދަލުވުމުގައި ޕީއެންސީގެ ކެންޑިޑޭޓުން ވަނީ ބައިވެރިވެފައި. | އެކްސް
ލޯކަލް ކައުންސިލް އިންތިޚާބާއި އަންހެނުންގެ ތަރައްގީ އަށް މަސައްކަތް ކުރާ ކޮމިޓީގެ އިންތިޚާބު ބޯމަތިވެފައި އޮއްވާ ސަރުކާރު ހިންގާ ޕާޓީ - ޕީއެންސީ ގެ ކެންޑިޑޭޓުން ކުރިމަތީގައި ބައިތިއްބައިގެން ރައީސް ޑރ. މުހައްމަދު މުއިއްޒު 16 މިލިއަން ރުފިޔާ ބަޔަކަށް ބަހާލުމުގެ ކަންބޮޑުވުން ވެލިދޫ ދާއިރާގެ މެމްބަރު މުހައްމަދު އައްބާސް ފާޅު ކުރައްވައިފި އެވެ.
އަންގާރަ ދުވަހު އެކްސް ގައި ކުރެއްވި ޕޯސްޓެއް ގައި އައްބާސް ވިދާޅުވީ، ރައްޔިތުން 5 އަހަރުގެ ދައުރަކަށް އިންތިޚާބުކުރި ކައުންސިލްތަކުގެ ދައުރުން ފަހު އަހަރު ކައުންސިލްތަކަަށް އަލަށް އެއްވެސް ޕްރޮޖެކްޓެއް ނުފެށޭގޮތަށް ހަދާ، މުވައްޒަފުން ނުނެގޭ ގޮތަށް ހެދީ ކޮރަޕްޝަން ހުއްޓުވުމަށްކަމަަށް މުއިއްޒު ސަރުކާރުން ބުނާ ކަމަށެވެ.
"ހަމަ އެމީހުން، ކައުންސިލް އިންތިޚާބަށް ކުރިމަތިލީ ޕީއެންސީ ގެ ކެންޑިޑޭޓުން ކުރިމަތީ ބައިތިއްބައިގެން، ކުލި ނުދައްކާ ގަވާއިދާ ހިލާފުވީ މީހުންގެ ކުލި މައާފުކޮށްދީފަ އެބަހާލީ 16 މިލިއަން ރުފިޔާ،" ކަމަށް އައްބާސް ވިދާޅުވި އެވެ.
ހޯމަ ދުވަހު މުއިއްޒު ވަނީ ސިނަމާލެ 1، 2، 3 އަދި 4 އާއި، މާލެހިޔާ 1 އަދި 2 ގެ ފްލެޓްތަކުގެ ވެރިފަރާތްތަކަށް ދޭ އިނާޔަތެއް ކަމަށް ވިދާޅުވެ، އެ ފްލެޓްތަކަށް ފައިސާ ދެއްކޭގޮތް ނުވުމުގެ ސަބަބުން މިހާތަނަށް އަރާފައިވާ ޖޫރިމަނާ އެއްކޮށް މަޢާފުކޮށްދެއްވުމަށާއި ފްލެޓްތައް ބައުވެ، ސްޓްރަކްޗަރ ހަލާކުވެފައިވާތީ އާއި، އެކަމަށް ހައްލެއް ހޯއްދަވައިނުދެވި ގިނަ ދުވަސްވެފައިވާތީ، މި ފްލެޓްތަކުގައި ދިރިއުޅޭ ފަރާތްތަކަށް އިނާޔަތެއްގެ ގޮތުގައި 100،000 (އެއްލައްކަ) ރުފިޔާ ދެއްވުމަށް ނިންމަވާފަ އެވެ.
މެމްބަރު އައްބާސް ވިދާޅުވީ، "ސުވާލަކީ ރާއްޖެތެރޭ ރަށްތަކުގައި ސޯޝަލް ހައުސިންގައި ކުއްޔަށް އުޅޭ ފަރާތްތަކަށް އެކަން އެގޮތަށް ނުކޮށްދެއްވީ ކީއްވެތޯ؟" އެވެ. އަދި "ވިނަރެސް ފުލެޓު ތަކާއި ހިޔާ ފުލެޓުތަކުގައި ދިރިއުޅޭ ރައްޔިތުންނަށް އެގޮތަށް ކަންތަށް ނުކޮށްދެއްވީ ކީއްވެތޯ؟" އެވެ.
މާލެ އާއި ރާއްޖެތެރޭގައި އެތައްހާސް ބަޔަކު ބޮޑު ކުލީގައި ދިރިއުޅޭއިރު އެރައްޔިތުންގެ ހައްޤު ކޮބައިތޯ ވެސް އައްބާސް ވަނީ ސުވާލު ކުރައްވާފަ އެވެ.
"ވެރިޔަކު މުނާފިގުވާނީ މިހާވަރަށް. ގޮތް ނިންމާނީ ރައްޔިތުން." އައްބާސް ވިދާޅުވި އެވެ.
ހޯމަ ދުވަހު ހަވީރު ރައީސް މުއިއްޒު ސިނަމާލެ އަދި މާލެހިޔާ ފްލެޓްތަކުގައި ދިރިއުޅޭ ފަރާތްތަކާ އެކު ރަސްމީ ގަނޑުވަރު މުލީއާގޭ ގައި ބޭއްވި ބައްދަލުވުމުގައި، މުއިއްޒު ވެރިކަން ކުރައްވާ ޕާޓީން މާލޭ ސިޓީގެ މޭޔަރު ކަމަށް ނެރުއްވާފައިވާ ކެންޑިޑޭޓް މޫސާ އަލީ ޖަލީލް އާއި، އެ ޕާޓީން އަންހެނުންގެ ތަރައްގީ އަށް މަސައްކަތް ކުރާ ކޮމިޓީގެ ރައީސް ކަމަށް ނެރެފައިވާ އައިޝަތު އަލައިކާ އަދުނާނުގެ އިތުރުން އެ ޕާޓީން ކައުންސިލަށް ވާދަ ކުރާ އިތުރު ކެންޑިޑޭޓުން ބައިވެރިކޮށްފައިވެ އެވެ. އެ ފަރާތްތައް މުލީއާގެ އަށް ގެންގޮސް ގެން ދައުލަތުގެ ވަސީލަތްތައް ނުހަމަ ގޮތުގައި ބޭނުން ކޮށް ކެމްޕޭން ހިނގަނީ ކަމަށް ބުނެ ގިނަ ބަޔަކު އަންނަނީ ފާޑު ކިޔަމުންނެވެ. މިއީ ކެންޑިޑޭޓުން މުލީއާގެ އަށް ގެންގޮސްގެން މުއިއްޒު ބޭއްވެވި މިފަދަ ފުރަތަމަ ބައްދަލުވުން ނޫން ކަން ވެސް ފާހަގަ ކުރެވެ އެވެ.
