ހައްތަހާ ވެސް ނޭތާޖީ!

އަވައްޓެރި އިންޑިއާގައި ހިނގި ކަމެކެވެ. އިންތިޚާބެއް ކުރިމަތިވެފައި އޮތް ދުވަސް ވަރެއްގައި، ސަރުކާރުގެ ވަޒީރަކު ނުވަތަ ހިންދީ ބަހުން ނަމަ ނޭތާޖީ އަކު، އިންޑިއާގެ ގޯވާ އަށް ވަޑައިގަންނަވަ އެވެ. އެ ސަރަހައްދުގައި ދިރިއުޅޭ އެތައް ހާސް ރައްޔިތުންނާ ބައްދަލު ކުރައްވައި ވިދާޅުވީ، ވަޑައިގެންނެވީ ސަރުކާރުގެ ފަރާތުން ކަމަށެވެ. އެ ސަރަހައްދުގެ ރައްޔިތުންނަށް ދަތިވެފައިވާ ކަންކަން ޙައްލު ކޮށްދެއްވާނެ ކަމަށާއި، ނަމަވެސް މިވަގުތު ކޮށްދެވޭނީ ދެ ކަމެއް ކަމަށް ވިދާޅުވި އެވެ. އެހެންކަމުން، އެންމެ ބޭނުން ޖެހިފައިވާ ދެ ކަމެއް ދެންނެވުމަށް ވަޒީރު ވިދާޅުވި އެވެ.

އެއާ އެކު، އެ ސަރަހައްދުގެ ރައްޔިތުން ވަޒީރަށް ދެންނެވީ އެ ސަރަހައްދުގައި ހޮސްޕިޓަލެއް ނެތް ކަމަށެވެ. ބޭސްފަރުވާ ކުރާނެ ފަސޭހަ އިންތިޒާމު ތަކެއް ނެތް ކަމަށާއި، އެކަމަށް ޙައްލެއް ހޯއްދަވައި ދެއްވުމަކީ ފުރަތަމަ ކަންތައް ކަމަށް ދެންނެވި އެވެ. އެއާ އެކު، ވަޒީރު ޖީބުން ފޯނު ނަންގަވައި މީހަކަށް ގުޅި އެވެ. ކަންކަން ވަރަށް ސަކަރާތް ކަމަށާއި، އެ ސަރަހައްދުގައި ހޮސްޕިޓަލެއް ނެތް ކަމަށް ވިދާޅުވެ އެވެ. އެހެންކަމުން ވަގުތުން ވަގުތަށް، އެ ސަރަހައްދުގައި ހޮސްޕިޓަލެއް ޤާއިމު ކޮށްދިނުމަށް އެންގުމާ އެކު ފޯނު ބާއްވަ އެވެ.

އެއަށް ފަހު ވިދާޅުވި އެވެ. މާދަމާ ހޮސްޕިޓަލްގެ މަސައްކަތް ފަށާނެ ކަމަށް ހާމަ ކުރެއްވުމާ އެކު، ރައްޔިތުން އުފަލުން އަތް ޖެހި އެވެ. ޝުކުރު އަދާ ކުރި އެވެ. ދެ ވަނަ ކަމަކީ ކޮން ކަމެއްތޯ ވަޒީރު އައްސަވައިފި އެވެ. ރައްޔިތުން ދަންނަވައިފި އެވެ. ވަޒީރެވެ. މި ސަރަހައްދުގައި އެއްވެސް ވަރަކަށް މޮބައިލް ނެޓްވޯކެއް ނެތެވެ. އެކަމުގެ ސަބަބުން ފޯނު ބޭނުން ނުކުރެވޭ ކަމަށާއި، އެ ސަރަހައްދުގައި މޯބައިކް ނެޓްވޯކު ޤާއިމު ކޮށްދިނުމަކީ ދެ ވަނަ ކަމުގެ ގޮތުގައި ވަނީ އެދިފަ އެވެ. ވަޒީރަށް ކުރިމަތިލާން ޖެހުނީ އިންތިހާ ލަދުވެތިކަމާ އެވެ.

އެއީ އިންޑިއާ އެވެ. މިއަދު އަޅުގަނޑުމެންގެ ރާއްޖެ އިން ވެސް ފެންނަމުން މި ދަނީ ހަމަ އެ މަންޒަރެވެ. ލޯކަލް ކައުންސިލް އިންތިޚާބާ ދިމާކޮށް ރައީސުލްޖުމްހޫރިއްޔާ އާއި، ސަރުކާރުގެ ވެރިން ރައްޔިތުންގެ ގާތަށް ވަޑައިގެން ދައްކަވާތީ އިވެނީ ހަމަ މިޒާތުގެ ވާހަކަ އެވެ. އެންމެ ބޭނުމެއްގަ އެވެ. ރައްޔިތަކަށް ކަމެއް ނުކޮށްދެވޭ ތަނުގައި، ރައްޔިތުންގެ ބޮލަށް ވާ ވައްދައި، ރައްޔިތުން ގުނބޯ ހެއްދުމަށް މަސައްކަތް ކުރައްވަނީ އެވެ. ސަރުކާރު ހިންގާ ޕީއެންސީގެ ކެމްޕެއިންގައި މިހާރު އިވެމުން ދަނީ މިޒާތުގެ ވާހަކަ އެވެ.

ޕީއެންސީ އަށް ނިސްބަތްވެ ވަޑައިގަންނަވައި، ރައްޔިތުންގެ މަޖިލީހުގެ މައްޗަންގޮޅި އުތުރު ދާއިރާގެ މެންބަރު އިބްރާހިމް މުޙައްމަދު (ޖަނާބު) ދެއްކެވި ވާހަކައިން ތަންކޮޅެއް އަޑު އިވުނެވެ. ރަސްމާލެ ހިއްކާ ނިމުމާ އެކު، އެ ސަރަހައްދުން ގޯތި ދޫކުރަން ފަށާނެ ކަަމަށާއި، އިދިކޮޅު ސިޓީ ކައުންސިލެއް އޮވެއްޖެ ނަމަ، އެ ގޯތި ތަކުގެ ރަޖިސްޓްރީ ހައްދައިދޭން ދެކޮޅު ހަދައިފި ނަަމަ ދެން ހަދާނީ ކިހިނެއްތޯ ޖަނާބު އައްސަވަ އެވެ. ދެރައީ މިވަރުގެ އޮޅުވާލުންތައް ރައްޔިތުންނަށް އޮޅުވާލަން ޖަނާބު މެން މަސައްކަތް ކުރާތީ އެވެ.

އެ ވިދާޅުވާ ރަސްމާލެ ހިއްކަމުން ދަނީ މާލެ އިން ފުރައިގެން 30 މިނެޓުން ދެވޭ ހިސާބެއްގަ އެވެ. އެއީ މާލެ އަތޮޅުގެ އަނެއް ބިތް ކަމަށްވާއިރު، ރަސްމާލެ އަށް ދެވެނީ ރާއްޖޭގައި އޮތް އެންމެ ބޮޑު އެއް ކަނޑު، ވާދޫ ކަނޑު ވެސް ހުރަސްކޮށްފަ އެވެ. އެއީ މާލެ އަތޮޅު ގުޅި ކައިރީގަ އެވެ. އެކަމަކު، އެ ސަރަހައްދުން ހިއްކާ ރަަސްމާލެ، މާލޭގެ އިޙުތިސާސްގެ ތެރެއަށް ވަންނާނެ ގޮތެއް ޖަނާބު ވިދާޅުވާން ޖެހޭނެ އެވެ. އެ ތަނުން ދޫކުރާ ގޯތީގެ ރަޖިސްޓްރީ އަކީ މާލޭ ސިޓީ ކައުންސިލުން ރަޖިސްޓްރީ ހަދައިދޭން ޖެހޭ ގޮތެއް ވެސް ސާފު ކޮށްދެއްވަން ވާނެ އެވެ. އެހެނީ، މިހާރު ދޫކުރާ ގޯތި ތަކުގެ ރަޖިސްޓްރީ ހައްދައި ދެނީ މާލޭ ސިޓީ ކައުންސިލުން ހެއްޔެވެ؟

ދެން ޖަނާބު ދެއްކެވި ވާހަކަ އަކީ، މާލެ އަށް ބޭނުން ވަނީ ވަރަށް ޑިސިޕްލިން، ތައުލީމީ، ޤާބިލު އަދި މާާލެ އަށް ދިމާވެފައިވާ މައްސަލަ ތަކަށް އިޖާދީ ހައްލެއް ގެންނާނެ މޭޔަރެއް ކަމަށެވެ. އެ މޭޔަރަކީ، ޕީއެންސީގެ ކެންޑިޑޭޓް މޫސާ އަލީ ޖަލީލް ކަމަށް ޖަނާބު ވިދާޅުވި އިރު، މާލޭގެ މޭޔަރު ކަމުގައި ދެ އަހަރު ވަންދެން މިހާރުގެ ރައީސް އަދި ޖަނާބުގެ ޅިޔަނު، މުޢިއްޒު ހުންނެވިކަން ހަނދާން ނެތީ ހެއްޔެވެ؟ މޭޔަރު ކަމުގައި ރައީސް މުޢިއްޒު ހުންނެވިއިރު، އެ ވިދާޅުވާ ޑިސިޕްލިން އާއި، ތައުލީމާއި، ޤާބިލު ކަމާއި އަދި އިޖާދީ ހައްލު ކޮބައި ހެއްޔެވެ؟ އޭރު އެކަން ކުރެވުނު ނަމަ، މިއަދު ޖަނާބުމެން އެ ވާހަކަ ދައްކަވަން ޖެހޭނެ ހެއްޔެވެ؟

މޫސާ އަލީ ޖަލީލް އަކީ ޤައުމަށް ވަރަށް ޚިދުމަތްތެރި، އަދި ބަޠަލެއް ކަަމަށް ވެސް ޖަނާބު ވިދާޅުވި އެވެ. ޤައުމަށް އެހާ ބޮޑު ޤުރުބާނީ އެއް ވެވަޑައިގެންނެވި ބޭފުޅަކަށް ވާއިރު، މިއަދު އެކަމުގެ އިނާމެއްގެ ގޮތުގައި މޭޔަރުކަން ދެއްވުން ކިހިނެއްވާނެތޯ ވެސް ޖަނާބު ވިދާޅުވެ އެވެ. އެކަމަކު، މޫސާ އަލީ ޖަލީލްގެ ޤައުމީ ޚިދުމަތާއި، ޤައުމަށްޓަކައި ވެވަޑައިގެންނެވި ޤުރުބާނީ އަށްޓަކައި ދޭން ޖެހޭ ޝަރަފާއި، މެޑައްޔާއި، އައްޑަން ވެސް ދިވެހި ރައްޔިތުން ދީފި އެވެ. އެކަމަކު، އެކަމަކީ މާލޭގެ މޭޔަރުކަން ދޭން ޖެހޭ ސަބަބެއް ނޫނެވެ. ހެއްވާ ކަމަކީ ގައުމު ރައީސްކަން ހައްގު ކަމަށް ޖަނާބަށް ވިދާޅުވާން ނުކެރުނު ކަމެއް. ވާނީ ވެސް އެހެންތާ އެވެ. އޭރުން ޅިޔަނަށް ލިބިފައި އޮތް މަގާމު މޫސާ ޖަލީލު ހޯއްދެވުމުން ކަމަކު ނުދާނެތާ އެވެ. މިހާ ބޮޑަށް އިމޯޝަނަލް ގޭމު ނުޖެއްސެވިޔަސް، ސިޔާސީ ކަންކަން ކުރެވޭނެ އެވެ.

ހައްތަހާ ވެސް ނޭތާޖީ ނޫން ހެއްޔެވެ؟ މި ސަރުކާރުގެ ވަޒީރުންނާއި، މެމްބަރުންނާއި، ކުންފުނި ތަކުގެ ވެރިން ވެސް މި ދައްކަވަނީ، ފެށުމުގައި މި ދެންނެވި އިންޑިއާގެ ވަޒީރު ދެއްކެވި ކަހަލަ ވާހަކަ ތަކެއް ނޫން ހެއްޔެވެ؟ ރައްޔިތުންނަަށް އޮޅުވާލުމަށް މި ކުރަނީ ހަަމަ އެ ކަހަލަ ކަމެއް ނޫން ހެއްޔެވެ؟