ފަހު ވަގުތު ޕީއެންސީގެ ކެންޑިޑޭޓް މޫސާ އަލީ ޖަލީލް ބަހުސް ގައި ބައިވެރި ނުވާކަން އަންގައިފި
ރާއްޖެޓީވީ އިން އިންތިޒާމުކުރާ މާލެ ސިޓީގެ މޭޔަރު ކެންޑިޑޭޓުންގެ ބަހުސްގައި ބައިވެރިވުމަށް ޕީއެންސީގެ ކެންޑިޑޭޓް މޫސާ އަލީ ޖަލީލް ފިޔަވައި އެހެން ހުރިހާ ފަރާތްތަކުން ވަނީ އެއްބަސްވެފަ. އަންނަ މާރޗު މަހުގެ ފަހުކޮޅު ބޭއްވުމަށް ތައްޔާރުވަމުންދާ މި ބަހުސްގެ ފޯމެޓާއި ތަފްސީލުތައް ކަނޑައަޅާނީ ބައިވެރިވާ ކެންޑިޑޭޓުންނާ މަޝްވަރާ ކުރުމަށް ފަހުގަ. މި ބަހުސް ބާއްވާނެ ތާރީޚެއް ވަރަށް އަވަހަށް އިއުލާނުކުރާނެ.
ކުރީގެ ޗީފް އޮފް ޑިފެންސް ފޯސް މޭޖަރ ޖެނެރަލް ރިޓަޔަރޑް މޫސާ އަލީ ޖަލީލު ރާއްޖެޓީވީ ގެ ފަށާއިރު ސޯވ ގައި ބައިވެރިވަނީ. | ރާއްޖެއެމްވީ
ކުރިއަށް އޮތް ކައުންސިލް އިންތިޚާބުގައި މާލެސިޓީ މޭޔަރު ގެ މަގާމަށް ކުރިމަތިލައްވާ ކެންޑިޑޭޓުންނަށް ބާއްވާ ބަހުސްގައި ޕީއެންސީގެ ގެ ކެންޑިޑޭޓް މޫސާ އަލީ ޖަލީލް ބައިވެރިވެވަޑައި ނުގަންނަވާނެ ކަމަށް އެ ޕާޓީ އިން ބުނެފި އެވެ.
މި ބަހުސްގެ އެންމެ ފަހުގެ ތައްޔާރީތައް ރާއްޖެޓީވީ އިން ވަމުންދާއިރު މާލޭ ސިޓީ ކައުންސިލް ގެ މޭޔަރު ކަމަށް ވާދަކުރައްވާ ހުރިހާ ބޭފުޅުންނަށް މި ބަހުސް ގައި ބައިވެރިވުމަށް ދައުވަތު ފޮނުވި އެވެ.
އެގޮތުން ބަހުސްގައި ބައިވެރިވުމުގެ ދައުވަތު ގަބޫލުކުރުމާއި މެދު ގޮތެއް ނިންމުމަށް ދީފައިވާ މުއްދަތު 15 ފެބްރުއަރީ 2026 ވަނަ ދުވަހުގެ 16:00 އަށް ހަމަ ވިއިރު، ޕީއެންސީ ގެ ކެންޑިޑޭޓް މޫސާ އަލީ ޖަލީލް ފިޔަވާ ހުރިހާ ކެންޑިޑޭޓުން ވަނީ އެ ދައުވަތު ގަބޫލުކޮށްފަ އެވެ. މޫސާ އަލީ ޖަލީލް ބަހުސް ގައި ބައިވެރިނުވާކަން ޕާޓީ ގެ ފަރާތުން އެންގީ ބައިވެރިވުމަށް ކަނޑައެޅި ސުންގަނޑި ހަމަވާން ކުޑަތަން ވެފައި ވަނިކޮށްނެވެ.
މި ބަހުސް އާ ގުޅިގެން ރާއްޖެޓީވީ ގެ ޑެޕިއުޓީ ޗީފް އޮޕަރޭޓިންގ އޮފިސަރ (ޑެޕިއުޓީ ސީއޯއޯ) ނާޒްމީ ސައީދު ވިދާޅުވީ ބަހުސް ބާއްވާނެ ތާރީޚް ވަރަށް އަވަހަށް އިއުލާނު ކުރައްވާނެ ކަމަށެވެ.
މި ބަލަނީ މި ބަހުސް މާރޗް މަހުގެ ފަހުކޮޅު ބޭއްވޭތޯ. ސްޓޭޝަނުން ވަރަށް ބޮޑަށް ތައްޔާރީތައް ވަމުން މިހާރުވެސް މި ގެންދަނީ ފުރިހަމަ ބަހުސް އަކަށް ހެދޭތޯރާއްޖެޓީވީ ގެ ޑެޕިއުޓީ ޗީފް އޮޕަރޭޓިންގ އޮފިސަރ (ޑެޕިއުޓީ ސީއޯއޯ) ނާޒްމީ ސައީދު
މި ބަހުސް ގެ ފޯމެޓާއި ބަހުސް ކުރިއަށް ދާނެ ގޮތުގެ އިތުރު ތަފްސީލް ތައް ފައިނަލް ކުރާނީ ވެސް ބައިވެރިންނާ މަޝްވަރާ ކުރުމަށް ފަހު ކަން ނާޒްމީ ވަނީ ފާހަގަކުރައްވާފަ އެވެ. ރާއްޖެ ޓީވީ އިން ވަނީ މީގެ ކުރިން ވެސް މިފަދަ ބޮޑެތި ބަހުސްތައް ކާމިޔާބުކަމާއި އެކު ކުރިއަށް ގެންގޮސްފަ އެވެ.
މާލޭ ސިޓީ ގެ މޭޔަރ ކަމަށް ވާކުރައްވާ ކެންޑިޑޭޓުންނަކީ، އާދަމް އާޒިމް (އެމްޑީޕީ)، މޫސާ އަލީ ޖަލީލް (ޕީއެންސީ), އަހްމަދު އައިހަމް (އަމިއްލަ ކެންޑިޑޭޓް)، އިސްމާއިލް ޒަރިޔަންދު (އަމިއްލަ ކެންޑިޑޭޓް)، އަދި އަބްދުﷲ މަހްޒޫމް މާޖިދު (އެމްޑީއޭ) އެވެ.
