އިންތިޚާބު ބޯމަތިވެފައި ވަނިކޮށް، ޕީއެންސީ ކެންޑިޑޭޓުންގެ ހާޒިރުގައި ސިނަމާލެ އަދި މާލެހިޔާ ފްލެޓްތަކުގައި ދިރިއުޅޭ ފަރާތްތަކަށް އެއްލައްކަ ރުފިޔާ ދޭން މުއިއްޒު ނިންމަވައިފި
މި އިނާޔަތް ދިނުމުގައި ފްލެޓަށް ދައްކަންޖެހޭ ފައިސާ ހުރި ނަމަ އެ އަދަދުން އުނިކުރުމަށްފަހު ބާކީވާ ފައިސާ ވެރިފަރާތަށް ދިނުމަށާއި، ފައިސާ ދައްކާ ނިމިފައިވާ ފަރާތްތަކަށް މުޅި އަދަދު އެއްކޮށް ދިނުމަށް ވަނީ ހަމަޖެހިފައި. މީގެ އިތުރުން، ފްލެޓްތަކަށް ފައިސާ ނުދެއްކިގެން އަރާފައިވާ ހުރިހާ ޖޫރިމަނާއެއް މައާފުކޮށްދިނުމަށް ވެސް ރައީސުލްޖުމްހޫރިއްޔާ ވަނީ ނިންމަވާފައި.
ރައީސުލްޖުމްހޫރިއްޔާ، ސިނަމާލެ އަދި މާލެހިޔާ ފްލެޓްތަކުގައި ދިރިއުޅޭ ފަރާތްތަކާ ބައްދަލުކުރައްވައި، އެފަރާތްތަކުގެ ކަންބޮޑުވުންތަކަށް ހައްލު ހޯއްދަވައިދެއްވުމުގެ ގޮތުން ޚާއްޞަ އިނާޔަތެއް ދެއްވަން ނިންމަވައިފި | ރައީސް އޮފީސް
އިންތިޚާބު ބޯމަތިވެފައި ވަނިކޮށް، ޕީއެންސީ ކެންޑިޑޭޓުންގެ ހާޒިރުގައި ސިނަމާލެ އަދި މާލެހިޔާ ފްލެޓްތަކުގައި ދިރިއުޅޭ ފަރާތްތަކާ ބައްދަލުކުރައްވައި، އިނާޔަތެއްގެ ގޮތުގައި އެއްލައްކަ ރުފިޔާ ދޭން ރައީސް ޑރ. މުހައްމަދު މުއިއްޒު ނިންމަވައިފި އެވެ.
މާލެސިޓީގެ ގަލޮޅު އަވަށުގައި ހުންނަ ސިނަމާލެ އަދި މާލޭހިޔާގެ ފްލެޓްތަކުގައި ދިރިއުޅޭ ފަރާތްތަކާ ބައްދަލުކުރައްވައި، އެފަރާތްތަކުގެ ކަންބޮޑުވުންތަކަށް ހައްލު ހޯއްދަވައިދެއްވުމުގެ ގޮތުން ޚާއްޞަ އިނާޔަތެއް ހަމަޖައްސަވައިދެއްވުމަށް ނިންމެވީ، މުލީއާގޭގައި ހޯމަ ދުވަހު ހަވީރު އެވެ.
މި ބައްދަލުކުރެއްވުމުގައި، މާލެ ސިޓީ މޭޔަރު ކަމަށް މުއިއްޒު ނެރެގެން އުޅުއްވާ ކެންޑިޑޭޓް މޫސާ އަލީ ޖަލީލް އާއި މާލެ ސިޓީގެ ޑެޕިއުޓީ މޭޔަރު އަދި މި ފަހަރުގެ އިންތިޚާބުގައި މުއިއްޒުގެ ޕާޓީން ވާދަ ކުރައްވާ ކެންޑިޑޭޓެއްގެ ގޮތުގައި ހުންނެވި މުހައްމަދު އަރީޝް ހާޒިރުވެ ތިއްބެވި އެވެ.
ރައީސް އޮފީހުން ނެެރެފައިވާ ބަޔާނެއްގައި ބުނީ، ސިނަމާލެ އަދި މާލެހިޔާ ފްލެޓްތަކުގައި ދިރިއުޅޭ ފަރާތްތަކުން ވަނީ އެ ފްލެޓްތަކުގެ ހާލަތާއި، ދައްކަންޖެހޭ ކުއްޔާއި، ޖޫރިމަނާގެ ކަންކަމުގައި ހުރި ކަންބޮޑުވުންތައް މި ބައްދަލުވުމުގައި ރައީސުލްޖުމްހޫރިއްޔާ އަށް ހުށަހަޅާފައި ކަމުގަ އެވެ.
މި ކަންބޮޑުވުންތަކަށް ހައްލެއް ހޯއްދެވުމުގެ ގޮތުން، މި ބައްދަލުވުމުގައި ސިނަމާލެ 1، 2، 3 އަދި 4 އާއި، މާލެހިޔާ 1 އަދި 2 ގެ ވެރިފަރާތްތަކަށް އިނާޔަތެއް ދެއްވުމަށް ރައީސުލްޖުމްހޫރިއްޔާ ވަނީ ނިންމަވާފައި ކަމަށް ރައީސް އޮފީހުން ބުނެ އެވެ. އެގޮތުން، މި ފްލެޓްތަކަށް ފައިސާ ދެއްކޭގޮތް ނުވުމުގެ ސަބަބުން މިހާތަނަށް އަރާފައިވާ ޖޫރިމަނާ އެއްކޮށް މަޢާފުކޮށްދެއްވުމަށާއި ފްލެޓްތައް ބައުވެ، ސްޓްރަކްޗަރ ހަލާކުވެފައިވާތީ އާއި، އެކަމަށް ހައްލެއް ހޯއްދަވައިނުދެވި ގިނަ ދުވަސްވެފައިވާތީ، މި ފްލެޓްތަކުގައި ދިރިއުޅޭ ފަރާތްތަކަށް އިނާޔަތެއްގެ ގޮތުގައި 100،000 (އެއްލައްކަ) ރުފިޔާ ދެއްވުމަށް ރައީސުލްޖުމްހޫރިއްޔާ ވަނީ ނިންމަވާފައި ކަމަށް ވެސް ރައީސް އޮފީހުން ބުނެފައިވެ އެވެ.
އެގޮތުން، މި އިނާޔަތް ދިނުމުގައި ފްލެޓުގެ ވެރިފަރާތުން ފްލެޓަށް ދައްކަންޖެހޭ ޖުމުލަ ޢަދަދު 100،000 (އެއްލައްކަ) ރުފިޔާއަށްވުރެ ބޮޑުވާނަމަ، 100،000 (އެއްލައްކަ) ރުފިޔާއާ ހަމައަށް އުނިކުރެވޭނެ އެވެ. ފްލެޓަށް ދައްކަންޖެހޭ ޖުމުލަ ޢަދަދު 100،000 (އެއްލައްކަ) ރުފިޔާއަށް ވުރެ ކުޑަނަމަ، އެ މިންވަރެއް މަޢާފުކޮށްދެއްވުމަށް ފަހު، މި އަދަދުން ބާކީވާ މިންވަރެއް، ފްލެޓްގެ ވެރިފަރާތުގެ އެކައުންޓަށް ޖަމާކުރެވޭނެއެވެ. ފްލެޓް މިލްކުކުރުމަށް ފައިސާ ދައްކާ ނިންމާފައިވާ ފަރާތްތަކަށް 100،000 (އެއްލައްކަ) ރުފިޔާ އެއްކޮށް، އެޕާޓްމަންޓްގެ ވެރިފަރާތުގެ އެކައުންޓަށް ޖަމާކޮށްދެއްވުމަށް ރައީސުލްޖުމްހޫރިއްޔާ ވަނީ ނިންމަވާފައި ކަމަށް ވެސް ރައީސް އޮފީހުން ބުނެފައިވެ އެވެ.
ލޯކަލް ކައުންސިލް އިންތިޚާބާއި އަންހެނުންގެ ތަރައްގީ އަށް މަސައްކަތް ކުރާ ކޮމިޓީ ތަކުގެ މެމްބަރުންގެ އިންތިޚާބު އޭޕްރީލް 4 ވަނަ ދުވަހު ބާއްވަން ތައްޔާރުވަމުން ދާއިރު، ސަރުކާރު ހިންގާ ޕާޓީ ޕީއެންސީ ގެ ކެންޑިޑޭޓުންނަށް ތާއީދު ކުރާ ފަރާތްތަކަށް ސަރުކާރުގެ ކުންފުނިތަކުން ވަޒީފާ ދިނުމާއި، ޕްރޮމޯޝަން ދިނުމާއި، އަދި ސަރުކާރުގެ ކެންޑިޑޭޓުންނަށް ތާއީދު ނުކުރާ ކަމަށް ތުހުމަތު ކުރެވޭ ފަރާތްތައް ވަޒީފާ އަދާ ކުރާ ތަން ބަދަލު ކުރުމާއި، ވަޒީފާގެ އިންޒާރު ދިނުމާއި އަދި ބައެއް ފަރާތްތައް ވަޒީފާ އިން ވަކި ކުރުން ފަދަ ކަންކަންވެސް ވަނީ އާންމުވެފަ އެވެ.
