ޕީއެންސީ ކެނޑިޑޭޓުންނަށް ތާއީދު ހޯއްދަވަން ރައީސް މުޢިއްޒު "ދޮރުން ދޮރަށް"
19 ފެބުރުއަރީ 2026 | ބުރާސްފަތި 12:38ކުރިއަށް އޮތް ލޯކަލް ކައުންސިލް އިންތިހާބުގައި ޕީއެންސީގެ ކެންޑިޑޭޓުންނަށް ތާއީދު ހޯއްދެވުމަށް ރައީސް ޑރ. މުއިއްޒު މާލޭގެ ގޭގެއަށް ޒިޔާރަތްކުރައްވަން ފެއްޓެވިއިރު، އެ ޕާޓީން އަމާޒު ހިފާފައިވަނީ މަދުވެގެން 800 ގޮނޑި ކާމިޔާބު ކުރުމަށް. ނަމަވެސް، ރަށްރަށުގެ މަޝްރޫއުތައް ހުއްޓިފައި ހުރުމުގެ ސަބަބުން އަތޮޅުތެރޭގައި ސަރުކާރަށް އޮތް ތާއީދު ކުޑަވަމުންދާ ކަމަށް އިދިކޮޅު ފަރާތްތަކުން ދަނީ ބުނަމުން. އެހެންކަމުން، މި އިންތިހާބަކީ ސަރުކާރަށް އޮތް ތާއީދު ވަޒަންކުރެވޭނެ މުހިންމު އިމްތިހާބަކަށް ވެގެންދާނެ.
މުޢިއްޒު ދޮރުން ދޮރަށް | ސޯޝަލް މީޑިއާ
ކުރިއަށް އޮތް ލޯކަލް ކައުންސިލްތަކުގެ އިންތިހާބު ގައި ސަރުކާރު ހިންގާ ޕާޓީ ޕީއެންސީން މާލޭގެ ދާއިރާތަކަށް ކުރިމަތިލައްވާފައިވާ ކެންޑިޑޭޓުންނަށް ކެމްޕެއިން ކޮށްދެއްވަން "ދޮރުންދޮރަށް" ކެމްޕެއިން ހަރަކާތް ރައީސުލްޖުމްހޫރިއްޔާ ޑރ މުހައްމަދު މުއިއްޒު ފައްޓަވައިފި އެވެ.
ޕީއެންސީގެ ލީޑަރުގެ ހައިސިއްޔަތުން ރައީސް މުއިއްޒު ބުރާސްފަތި ދުވަހު މެންދުރު ވަނީ މާފަންނު ހުޅަނގު ދާއިރާގެ ބައެއް ގެތަކަށް ޒިޔާރަތްކުރައްވާފަ އެވެ. ރައީސްގެ އަރިހުގައި ބައެއް މިނިސްޓަރުންނާއި ޕީއެންސީގެ ލީޑަޝިޕްގެ ބޭފުޅުންނާއި އެ ޕާޓީގެ ޓިކެޓުގައި މާލޭގެ ދާއިރާތަކަށް ވާދަކުރައްވާ ކެންޑިޑޭޓުންނާއި ރައްޔިތުންގެ މަޖިލިހުގައި ޕީއެންސީ ތަމްސީލް ކުރައްވާ މެމްބަރުން ވެސް ކެމްޕެއިން ގެ ހަރަކާތުގައި ވަނީ ބައިވެރިވެފަ އެވެ.
އަދި އެ ޕާޓީގެ ޓިކެޓުގައި މާލޭގެ މޭޔަރުކަމަށް ވާދަކުރައްވާފައިވާ މޫސާ އަލީ ޖަލީލް ވެސް ރައީސް މުއިއްޒުގެ އަރިހުގައި ގޭގެއަށް ވަޑައިގެން ކެމްޕެއިން ކުރެއްވި އެވެ. އެންމެ ފަހުން ބޭއްވި ރައްޔިތުންގެ މަޖިލިހުގެ އިންތިހާބު ގައި ވެސް މުޢިއްޒު ވަނީ އޭރުގެ ޕީޕީއެމްގެ ކެންޑިޑޭޓުންނަށް ތާއީދު ހޯއްދަވަން ގޭގެއަށް ވަޑައިގެން ކެމްޕެއިން ކުރައްވައިފަ އެވެ.
އަންނަ އޭޕްރީލް ހަތަރުވަނަ ދުވަހު ބާއްވާ ލޯކަލް ކައުންސިލްތަކާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ އިންތިހާބު ގައި ޕީއެންސީގެ ކެމްޕެއިން މެނޭޖަރު އިބްރާހިމް ފަލާހު ވިދާޅުވެފައި ވަނީ އެ ޕާޓީން މަދުވެގެން 800 ގޮނޑި ކާމިޔާބު ކުރާނެ ކަމަށެވެ.
މީގެ އިތުރުން ބައެއް އިދިކޮޅު ފަރާތްތަކުން ފާހަގަކުރާ ގޮތުގައި މިސަރުކާރަށް ނޫނެކޭ ބުނާ މީހުން އިތުރުވެއްޖެ އެވެ. އަދި މި އިންތިހާބަކީ ސަރުކާރު ބަލިކުރާ އިންތިހާބަށް ވާނެ ކަމަށްވެސް އެފަރާތްތަކުން ދަނީ ބުނަމުންނެވެ.
ފާހަގަކޮށްލެވޭ ގޮތުގައި އަތޮޅުތެރޭގެ ރަށްތަކުން ސަރުކާރަށް އޮތް ތާއީދު ދަނީ ކުޑަވަމުންނެވެ. ސަބަބެއްކަމަށް ބޮޑަށް ބެލެވެނީ ސަރުކާރުން އެރަށްރަށުގައި ފަށާފައިވާ މަޝްރޫއުތައް ހުއްޓިފައި ހުރުމެވެ.
