އެޗްޑީސީން މާލެސިޓީ މޭޔަރު ގެ މަގާމަށް ވާދަކުރާ ޕީއެންސީ ކެންޑިޑޭޓް މޫސާ އަލީ ޖަލީލް ޕްރޮމޯޓް ކުރާ މައްސަލައެއް
19 ފެބުރުއަރީ 2026 | ބުރާސްފަތި 08:46ހުޅުމާލެ ދެވަނަ ފިޔަވަހީގައި އެޗްޑީސީން ހުޅުވި އައުޓްޑޯ ޖިމްގެ ރަސްމިއްޔާތުގައި މާލެ ސިޓީގެ މޭޔަރު ކަމަށް ވާދަކުރައްވާ ސަރުކާރުގެ ކެންޑިޑޭޓް މޫސާ އަލީ ޖަލީލް ބައިވެރިވެވަޑައިގަތުމާ ގުޅިގެން ގިނަ ބައެއްގެ ފާޑުކިޔުން އެކުންފުންޏަށް ވަނީ އަމާޒުވެފައި. ސަރުކާރުގެ ކުންފުންޏަކުން ކެންޑިޑޭޓަކު ޕްރޮމޯޓްކުރާ ކަމަށް ބުނެ އާންމުން ކަންބޮޑުވުން ފާޅުކުރަމުންދާއިރު، މިއީ އިންތިޚާބަށް ނުފޫޒު ފޯރުވުން ކަމަށް ބައެއް ފަރާތްތަކުން ތުހުމަތުކުރޭ.
ހުޅުމާލެ ދެވަނަ ފިޔަވަހީގެ ފުރަތަމަ އައުޓްޑޯ ޖިމް ހުޅުވި ރަސްމިއްޔާތުގެ ތެރެއިން. | ހައުސިންގް ޑިވެލޮޕްމަންޓް ކޯޕޮރޭޝަން
ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ން ކުރިއަށް އޮތް ކައުންސިލް އިންތިޚާބުގައި މާލެސިޓީ މޭޔަރު ގެ މަގާމަށް ވާދަކުރާ ޕީއެންސީ ކެންޑިޑޭޓް މޫސާ އަލީ ޖަލީލް ޕްރޮމޯޓް ކުރާ މައްސަލައެއް ފެންމަތިވެއްޖެ އެވެ.
ބުދަ ދުވަހު އެޗްޑީސީން ވަނީ ޚާއްސަ ރަސްމިއްޔާތެއް ބާއްވާ، ހުޅުމާލެ ދެވަނަ ފިޔަވަހީގެ ފުރަތަމަ އައުޓްޑޯ ޖިމް ހުޅުވާފަ އެވެ. ކަސްރަތު ކުރުމަށް ބޭނުންކުރާ 22 ބާވަތެއްގެ އައުޓްޑޯ އިކުއިޕްމަންޓް ހިމެނޭ މި ޖިމް ރަސްމީކޮށް އިފުތިތާހުކޮށްދެއްވީ އެޗްޑީސީގެ މެނޭޖިންގ ޑިރެކްޓަރ އަލީ ޒުހައިރު އެވެ. އަރިހުގައި ޕީއެންސީ ކެންޑިޑޭޓް މޫސާ އަލީ ޖަލީލް ހުންނެވި އެވެ.
މި ރަސްމިއްޔާތުގެ ފޮޓޯ އެޗްޑީސީގެ އެކްސް އެކައުންޓުގައި ވަނީ ޕޯސްޓު ކޮށްފަ އެވެ.
އެކަމާ ގުޅިގެން އެޗްޑީސީއަށް ވަނީ ގިނަ ބައެއް ފާޑު ކިޔުން އަމާޒުވެފަ އެވެ. އަދި އައުޓްޑޯ ޖިމް ހުޅުވުމުގެ ރަސްމިއްޔާތަށް ޚާއްސަ މެހެމާނެއްގެ ގޮތަށް ވަޑައިގެންނެވީ ކޮން އުސޫލަކުންތޯ ގިނަ ބަޔަކު ސުވާލު އުފައްދާފައިވެ އެވެ. އަދި ސަރުކާރުގެ ކުންފުނިތަކުން ސަރުކާރު ކެންޑިޑޭޓުން މިފަދަ ގޮތަކަށް ޕްރޮމޯޓް ކުރާނަމަ އިންތިޚާބު ވެސް އިންސާފުވެރި ނުވާނެ ކަމަށް ބައެއް މީހުން ބުނެފައިވެ އެވެ.
މި ޖިމް ގާއިމްކޮށްފައިވަނީ ހުޅުމާލެ ފޭސް 2ގެ ޓަރފް ދަނޑު ކައިރީގައި އޮންނަ ބިމުގަ އެވެ. މިއީ ހުޅުމާލެ ދެވަނަ ފިޔަވަހީގެ ހިޔާ ފްލެޓްތައް ހިމެނޭ ސަރަހަދަށް ވާއިރު، މިރަސްމިއްޔާތުގެ ތެރެއިން ވެސް ގިނަ ބަޔަކާ ބައްދަލުކޮށް، ކެންޕޭންގެ އެކިއެކި ހަރަކާތްތައް ކުރިއަށް ގެންގޮސްފައިވާ ކަމަށް ބައެއް މީހުން ތުހުމަތު ކޮށްފައިވެ އެވެ.
މި މައްސަލައާ ގުޅޭގޮތުން ރާއްޖެއެމްވީއަށް އެޗްޑީސީން ބުނީ، ކިހިނެއް ހިނގާ ދިޔަ ކަމެއްކަން ނޭނގޭ ކަމަށާއި، ބުރާސްފަތި ދުވަހުގެ ހަވީރުގެ ވަގުތެއްގައި ކޮމެންޓެއް ދޭނެ ކަމަށެވެ.
